Бжыгъэр и лъабжьэу

Къэрал статистикэмкIэ федеральнэ ­къулыкъущIапIэм и унафэщI Малков Павел КъБР-м и Iэтащхьэ КIуэкIуэ Казбек лэжьыгъэ IуэхукIэ Москва щыхуэзащ.

Ахэр тепсэлъыхьащ дяпэкIэ зэрызэдэлэжьэну щIыкIэм. Апхуэдэуи статистикэр щызэхуахьэскIэ иджырей технологиещIэхэр къагъэсэбэпу зэрызэтраублэнум и гугъу ящIащ.
ЗэIущIэр зэрекIуэкIам теухуауэ КIуэкIуэ Казбек и телеграм-каналым къритхащ: «Мы илъэсым и пэм щегъэжьауэ зи щхьэ хуэлэжьэж цIыхухэмрэ хьэрычэтыщIэ Iуэхум епхахэмрэ, хьэрычэт IуэхущIапIэ цIыкIухэри я гъусэу, я статистикэ хъыбархэр электрон Iэмалым тету ятыну аращ. Бжыгъэр зи лъабжьэ Iэмалым дыхуэкIуэмэ, отчётхэр щащI пIалъэхэр игъэмэщIэнущ, хъыбархэри нэхъ псынщIэу къулыкъущIапIэхэм яIэрыхьэнущ. Абыхэм я фIыгъэкIэ щIыналъэм и социально-экономикэ щытыкIэм, цIыхухэм я псэукIэм нэхъ псынщIэу зиужьынымкIэ къащтэ унафэхэр куэдкIэ нэхъ псынщIэ, купщIафIэ хъунущ».