Лъэпкъ псор зэрыгушхуэАдыгэ къафэм и щIыхьыр яIэту сыт щыгъуи утыку итщ «Кабардинка» къэфакIуэ гупым хэт щIалэгъуалэр. Абыхэм ящыщщ зэщхьэгъусэхэу КъБР-м щIыхь зиIэ и артист Куэтэншы Русланрэ Каринэрэ (Щоджэнхэ япхъущ). Лъэпкъ къафэм иIэ мыхьэнэм, ар абыхэм гъащIэ зэрахуэхъуам, нэгъуэщI Iуэхугъуэхэми теухуауэ абыхэм жаIэр гъэщIэгъуэнщ. - Къафэр си гъащIэм щыщ Iыхьэ нэхъыщхьэ хъуным егугъуар си анэшхуэ Тамарэщ, - къыщIедзэ Руслан. - Ар пшынэ еуэрт, абы и макъамэм сэ зыдэсщIыу сыкъыдэфэрт. Нэхъ сыкъыдэкIуэтея иужькIэ, къафэм къызэрымыкIуэу сызэрыдихьэхыр си адэ-анэм щалъагъум, «Кавказ пшэплъхэр» сабий ансамблым сыхагъэхьащ. 1997 гъэм къыщыщIэдзауэ, илъэсищкIэ а гупым сыхэтащ. 2000 гъэм «Кабардинка»-м зэхьэзэхуэкIэ къэфакIуэщIэхэр къыхишырти, сэри си зэфIэкIым абы сыщеплъыжыну сыкIуат. Пэжыр жысIэнщи, си ныбжьым елъытауэ фIыуэ нэхъ сыцIыкIут а зэманым. Апхуэдэу щыхъум ансамблым и художественнэ унафэщIыр къызэупщIащ: «Уи адэ-анэр лъагэ?», - жиIэри. «НтIэ», - щыжысIэм, гупым и къэфакIуэхэм ящыщ зы сыхъуащ. - А дакъикъэхэм зыхэпщIэрэт дуней псом цIэрыIуэ щыхъуа ансамбль лъэщ узэрыхэхуар? - Шэч хэмылъу. Япэ махуэм щегъэжьауэ ноби сакъыу сыбгъэдохьэ си лэжьыгъэм. КъызгуроIуэ адыгэ лъэпкъ псом дежкIэ мыхьэнэшхуэ зиIэ Iуэхум сызэрыхэтыр. Лъэпкъ щэнхабзэмрэ гъуазджэмрэщ дгъэлъагъуэр - а къалэныр жэуап зыпылъщ. - Каринэ, ди гуапэт уэри нэхъ гъунэгъуу зыкъэдыбгъэцIыхуамэ. - Сэ Мысостей (Аруан) къуажэ сыкъыщалъхуащ. Курыт еджапIэм етхуанэ классым сыщIэсу ГъуазджэхэмкIэ сабий школым си зэчийм щыхэзгъэхъуэну сыщIэтIысхьауэ щытащ. Абы къафэм и щэхухэм дыщыхигъэгъуэзат «Кабардинка» къэфакIуэ гупым хэта ДзыхьмыщI Зарэ. 2007 гъэм Къэбэрдей-Балъкъэр къэрал университетым и «Къафэ» ансамблым сыхыхьащ. Абы сыщыхуэзащ Руслан. Къафэр псэуэ схэтщи, дыщымылажьэ зыгъэпсэхугъуэ махуэхэр, уеблэмэ къызохьэлъэкI. - Руслан, зэрысщIэмкIэ КъБКъУ-м и биологие факультетым географиемкIэ и къудамэр къэбухащ. Уи IэщIагъэм урилэжьэн мурад уиIэ? - Географием школым сызэрыщIэсрэ сыдихьэхт, ауэ ар IэщIагъэ схуэхъуным зэи сегупсысатэкъым. Си ныбжьэгъухэм сыщытрагъэгушхуэм, ар къэзухащ. КъэкIуэну зэманым, хэт ищIэрэ, зэзгъэгъуэта IэщIагъэм срилэжьэнкIи хъунщ, иджыпсту зыри схужыIэнукъым абы теухуауэ: си гупсысэ псори зэтар къафэрщ. - Зы IэнатIэ фызэрыIутым гугъуехь гуэрхэр къыхэкIрэ хьэмэрэ зы Iуэху зэрызэдэфщIэм лэжьыгъэм нэхъ фытригъэгушхуэрэ? - Апхуэдэу нэхъ тыншыххэщ. Зыщ ди лэжьыгъэри, ди гупсысэр зэтохуэ. - КъафэмкIэ сыт хуэдэ ехъулIэныгъэхэр фиIа? Руслан: Лъэпкъхэм я зэныбжьэгъугъэр зыгъэбыдэ фестивалхэр Кавказ Ищхъэрэм и щIыналъэхэм илъэс къэс щрагъэкIуэкI. Абыхэм ящыщ зы нэхъ лейуэ сигу къокIыж щIэх-щIэхыурэ. Ар «Кавказым и дуней» зэхыхьэрт, щекIуэкIар Осетие Ищхъэрэ-Алание республикэрщ. «Кабардинка»-м «Уэркъ къафэр» дгъэлъэгъуащ. Пшыхь нэужьым фестивалым хэтахэр псори Iэнэм драгъэблэгъат. Псом я ужьу «Кабардинка»-р пэшым дыщыщIыхьам, къызэхуэсауэ хъуар зэуэ зэщIэтаджэри, Iэгу тхуеуащ. Абы къигъэлъагъуэрт ди лъэпкъ къафэр дахэу, екIуу утыку къызэритхьар. Абы дрипагэт. Каринэ: Апхуэдэ зы гуфIэгъуэ махуэт Русланрэ сэрэ ислъэмей дыкъызэдэфэу «Урысей студент гъатхэ» зэхьэзэхуэм япэ увыпIэ къыщытхьауэ зэрыщытари. - Къэфэным нэмыщI, нэгъуэщI сытхэм фыдихьэхрэ: кино, театр, спорт? - Руслан: «Кабардинка» ансамблым хэт къэфакIуэ зыбжанэ ди Музыкэ театрым долажьэ, балетым хэтщ. Абыхэм я зэфIэкIым тфIэгъэщIэгъуэну дыкIэлъоплъ. ДыкIуэ хабзэщ ЩоджэнцIыкIу Алий и цIэр зезыхьэ Къэбэрдей къэрал театрым и спектаклыщIэхэм. Театр лэжьакIуэхэр езыхэри ди пшыхьхэм къыдогъэблагъэ, зыр зыхунэсам адрейм зыщегъэгъуазэ. Щэнхабзэм нэгъуэщIу ухэтыфынукъым. «Адыгэ къафэр нэсу зэвгъэхъулIа хьэмэ иджыри зэлэжьын хуей щыIэ?», - жысIэу Русланрэ Каринэрэ сащеупщIкIэ, тIуми зы жьэу жаIэ: «Хьэуэ. Ар и кIэм нэсу зэи пхузэгъэщIэнукъым. Абы уигурэ уи псэрэ хэлъу зэ убгъэдыхьамэ, сыт щыгъуи узэлэжьын бгъуэтынущ. «Къафэм и щэху псори къэсхутащ», - жызыIэр а дакъикъэм щыуащ». Епсэлъар БАГЪЭТЫР Луизэщ.
Поделиться:
Читать также:
14.04.2024 - 10:54 →
Куэд къэзымыгъащIэу куэд зылэжьа
10.04.2024 - 12:00 →
ЕгъэджакIуэр ящыгъупщэркъым
31.03.2024 - 09:22 →
Зыужьыныгъэм и лъагъуэм ирокIуэ
17.03.2024 - 11:10 →
Илъэс 40 гъуэгуанэ
17.03.2024 - 10:08 →
СурэтыщI, егъэджакIуэ
|