Ивашко Владимир цIэрыIуэу щытакъым, куэдми яцIыхуркъым. Ауэ Горбачев Михаил и къулыкъум текIа иужь аращ КПСС-м и ЦК-м и Секретарь нэхъыщхьэм и къалэнхэр зыгъэзэщIар икIи тхыдэм и зыгъэзэкIэр нэгъуэщIу щытамэ, СССР-м и Iэтащхьэ хъункIэ зэхуэIуа щыIэтэкъым.
Парт къулыкъущIэшхуэхэм я къекIуэкIыкIар зэщхьщ. Ахэр псори мытыншу псэуа унагъуэ къызэрыгуэкIхэм къыщыхъуащ. Нобэ зи гугъу фхуэтщIри абыхэм ящыщщ. I932 гъэм Украинэм щыщ Полтавэ къалэм къыщалъхуащ, курыт школыр дыщэ медалкIэ къиуха иужь, Харьков и бгы институтым инженер IэщIагъэр щызэригъэгъуэтащ, а еджапIэми егъэджакIуэу къагъэнэжащ. ИужькIэ а къалэм и еджапIэ нэхъыщхьэ зэмылIэужьыгъуэхэм щылэжьащ. Жылагъуэ гъащIэми жыджэру хэтт. Абы гу къылъатэри, I979 гъэм Украинэм и Компартым и Харьков обкомым и къудамэм и унафэщIу, илъэси 5 дэкIри, и секретару хахащ.
I980 гъэм парт чэнджэщэгъуу ягъэкIуащ советыдзэхэр зраша Афганистаным. Къулыкъу ищIащ хахуэу. Моджахедхэм, уеблэмэ щIыпIэ газетхэм къытрадзауэ щытащ ар зыукIым доллар мелуан иратыну къызэрагъэгугъэ тхыгъэ.
Къигъэзэжа иужь, Ивашко аргуэру парт лэжьыгъэм пэрыхьэжащ. I987 гъэм Украинэм и Компартым и Днепропетровск обкомым и унафэщI хъуащ. Ар пщIэшхуэт: зэгуэр а къулыкъур яIыгъат генсек Брежнев Леонидрэ Украинэм и Компартым и ЦК-м и япэ секретарым нэс дэкIуея Щербицкий Владимиррэ.
Зи илъэси нэхъ дэмыкIыу Ивашко Киев къыщыхутащ Украинэм и КП-м и ЦК-м и етIуанэ секретару, Щербицкэр пенсэм кIуа иужькIэ, абы и пIэ иуващ. Владимир къыщIэкIащ Москва а къулыкъур зрита иужьрей цIыхуу.
А къулыкъур зэрыIэрыхьэу Ивашко украиныбзэрыпсалъэ хъуащ- арат зэманым къезэгъыр. I990 гъэр къэсащ. Иджыри зыкъомым СССР-м и Iэтащхьэ Горбачев иригъэкIуэкI зэхъуэкIыныгъэхэр даIыгът, ауэ а илъэс дыдэм Совет Нэхъыщхьэр щыхахым белджылы хъуащ КПСС-м иригъэкIуэкI политикэр, псом хуэмыдэу экономикэм хуэгъэзауэ къызыхуриджэхэр, зэрамыфIэкъабылыр.
Владимир къилъытэрт партыр либерал хабзэхэм техьэн хуейуэ. Ауэ республикэм и области 7-м коммунистхэм я Iуэхур къызэрыщимыкIам ар игъэгупсысащ. Парт къулыкъущIэхэр цIыхубэм яхыхьэн, я мурадхэр, зыхущIэкъухэр гурагъэIуэн хуейщ. АрщхьэкIэ я ныкъуэкъуэгъухэм ятекIуэныр тынштэкъым. Сыт хуэдэу щымытами, Украинэм и кум, къуэкIыпIэ, ипщэ лъэныкъуэхэм щыIэ областхэм я хьэкъкIэ коммунистхэм Радэм нэхъыбапIэр щызэIэрагъэхьащ, «239-м я гупыр» къызэрагъэпэщри.
Абы и фIыгъэкIэ Ивашко I990 гъэм и мэкъуауэгъуэм УССР-м и Совет Нэхъыщхьэм и унафэщIу хахащ, апхуэдэ щIыкIэкIэ парт, хабзэгъэув властыр къанэ щымыIэу и IэмыщIэ къихутащ. Абы езым къыдэщIхэр къигъэдэIуащ парламентым и комитетхэм я Iыхьэ щанэр «ЦIыхубэ радэм», («РУХ») и цIэкIэ депутат хъуахэм иратыну-жэуапыр псоми зэдагуэшын мурадкIэ. Ауэ щытыкIэр нэхъ хьэлъэ хъурт, цIыхухэм нэхъ ткIийуэ жаIэрт зэрымыарэзыр. ЩIыпIэ къулыкъущIэхэм хэкIыпIэхэр, Iуэхухэр зэрырагъэфIэкIуэжыну Iэмалхэр ялъагъуртэкъым, куэди жьы хъуат. Ивашко пIалъэ кIэщIым щIыналъэ 25-м ящыщу I6-м обкомхэм я япэ секретархэр, Совет Нэхъыщхьэхэм я Iэтащхьэхэм я Iыхьэ щанэр зэрихъуэкIащ.
Владимир пщIэшхуэ къыхуащIырт, абы къыхэкIыу куэдым къагурыIуакъым Киев къигъанэу Iуэхухэр щызэхэзэрыхьа Москва щIэкIуам и щхьэусыгъуэр. КПСС-м и ЦК-м и Секретарь нэхъыщхьэ Горбачев Михаил къилъытащ езым къуэдзэ иIэн икIи ар Ивашко Владимиру щытын хуейуэ. АрщхьэкIэ щытыкIэр зэIыхьат йомыгъэфIэкIуэжыфыну. Ивашко лъэкIакъым кIуэ пэтми щIэхуабжьэу Iуащхьэм ежэх шэрхъыр къигъэувыIэфын. А псори игу темыхуэу Владимир сымаджэ хъури, I994 гъэм лIащ, Харьков щыщIалъхьащ.
Шэч хэлъкъым, Москва мыкIуамэ, Ивашко хамэ унафэ щIэмыт Украинэм и президент хъуну зэрыщытам. ЗэрыгурыIуэгъуэщи, итIанэ а къэралым и теплъэр нэгъуэщIу щытынут: националистхэм властыр яубыдынутэкъым, щIыналъэхэми абы къыхэкIын Iуэхуи зэрахуэнутэкъым-хуитыныгъэкIэ псори зэхуэдэнут, урысыбзэр паубыдынутэкъым. Нэхъыщхьэращи иужьрей къаугъэр къэхъеинутэкъым.
