Кавказым и теплъэ телъыджэр

Ди республикэм тхьэмахуэм нэскIэ щекIуэкIащ «Урысейм и Кавказ щIыналъэр зыдогъэцIыху» фIэщыгъэр зиIэ ещанэ форумыр. Абы хэтащ къэрал 15-м щылажьэ еджапIэ нэхъыщхьэхэм я студентхэм я лIыкIуэхэр.

Зэхуэсыр къызэзыгъэпэщар Къэрал зэхуаку зэхущытыкIэхэмкIэ Москва дэт институтымрэ (МГИМО) Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетымрэщ. Форумым къекIуэлIащ Сирием, Венгрием, Тыркум, Ираным, Белоруссием, нэгъуэщI къэралхэми щыщ студентхэр. ЩIалэгъуалэ зэхуэсым апхуэдэу хэтащ Донецк ЦIыхубэ Республикэм къикIа хьэщIэхэри.

«Урысейм и Кавказ щIыналъэр зыдогъэцIыху» проектым и мурад нэхъыщхьэр Кавказымрэ абы и цIыхухэмрэ ятеухуауэ ди къэралми хамэ щIыпIэхэми щыщыIэ гупсысэ мыхъумыщIэхэм лъабжьэ зэрамыIэр, ар хьэщIэр зи щIасэ мамыр щIыналъэу зэрыщытыр псоми нэрылъагъу ящыщIынырщ. Езы зэхуэсми къыщаIэтар апхуэдэ Iуэхугъуэхэщ: къэрал зэмылIэужьыгъуэхэм я щIалэгъуалэм, студентхэм яку дэлъ зэпыщIэныгъэхэр нэхъри гъэбыдэн, абыхэм адэкIи зегъэужьын, щIалэгъуалэ политикэм, щIэныгъэмрэ егъэджэныгъэмрэ ятещIыхьа проект пэрытхэм, цIэрыIуэхэм зэгъусэу елэжьын, жэрдэмыщIэхэм гъуэгу етын.

Егъэджэныгъэ Iыхьэ купщIафIэм къыдэкIуэу, форумым хэтащ нэгузегъэужь Iуэхухэри. Зыгъэпсэхугъуэ махуэм хьэщIэхэр Iуащхьэмахуэ лъапэ яшащ. Кавказым и къурш лъагэхэм я теплъэ телъыджэм, ди щIыналъэм и щIыуэпсым и дахагъым дихьэхащ форумым хэтахэр, Iэмал яIэмэ, иджыри къытрагъэзэну я мураду зэбгрыкIыжащ.