Псори автобусым фынитIысхьэ!

«Мыгъэрей «Си щIыпIэ жыжьэ» фестивалыр Къэбэрдей-Балъкъэрым и щыхьэр Налшык щокIуэкI», - къыддогуашэ и нэгу щIэкIахэр къызэрыщыхъуамкIэ Адыгэ республикэм къыщыдэкI «Маяк» газетым и корреспондент Васильевэ Нафисэ.

«Фестивалым хухаха зэманыр щIэгъэхуэбжьауэ йокIуэкI. Лэжьэгъухэм уаIущIэныр, зэпеуэм кърагъэхьа лэжьыгъэхэр къыупщытэныр, телевидениемрэ радиомрэ хуагъэхьэзыра нэтынхэр зэпэплъытыныр, а псор къызэрыпщыхъуам утепсэлъыхьыжыныр – лэжьыгъэм жьы дэхупIэ къигъанэркъым. Иджы, мис, къыкIэлъыкIуэ унэ лэжьыгъэ къыдат – «Шэрхъым тесу ятха репортаж» дгъэхьэзырын хуейщ. Дэ дызыхыхьэ гупыр Гуэл ЩхъуантIэхэм яшэ. «Псори автобусым фынитIысхьэ!» - гъуазэ къытхуащIа Дарья гъуэгуанэм дрегъэблагъэ.

Сыт автобусым димытIысхьэу щIэмыхъунур? Дэтхэнэ нэгузыужьри а «бензинкIэ лажьэ шы цIыкIур» хэмыту къыдэхъулIэнукъыми. Гъуэгугъэлъагъуэ къытхуэхъуа Хьэмид-псэлъэгъуей IэщIэкIахэр ди экскурсовод Смирновэ Ларисэ ирырегъэкъуж. Зэпыу имыIэу, сыхьэтрэ ныкъуэкIэ ар егъэлеяуэ гъэщIэгъуэну къытхутепсэлъыхьащ мы щIыналъэм и тхыдэм, абы щызекIуэ хабзэхэм, щыпсэу цIыхухэм. Дэтхэнэ зы теплъэгъуэри сурэтым къиднэну дыщIэхъуэпсырт, псом хуэмыдэу гъуэгу дыздытетым дыкъыщыувыIэ тхыдэ фэеплъхэр. ИужькIэ а псори унэм декIуэлIэжмэ ди Iыхьлыхэм яжетIэжыфын хуэдэу. АрщхьэкIэ аргуэру «псори автобусым фынитIысхьэ» жаIэри, зыдочыж. Аращи, ди нэкIэ тлъэгъуа дахагъэм и щыхьэт наIуэхэр зэрытхуэчэмынур тщIэуэ дотIысхьэж.

Сыт хуэдизу дигу хэхъуэрэт къуршыщхьэ акъужьым дыхэтыхукIэ! Гъуджэм иплъэ нэхъей, жыгхэр зыщхьэщыгъуэлъхьа, нэпсым хуэдэу къабзэ Гуэл ЩхъуантIэхэм дыщыхэплъэкIэ! «КъуэкIыпIэ бэзэрыр»-щэ! IэфIыкIэрэ цыхэкI фэилъхьэгъуэхэмрэ зыщэ бзылъхугъэ гуакIуэхэмрэ щIалэ тхьэIухудхэмрэ яIэщIэлъ хьэпшыпхэм, малъхъэдисым ещхьу, узыщIашэрт. Абыхэм защыдмыгъэнщIу, аргуэру Ларисэ и макъыр къоIу: «Псори автобусым фынитIысхьэ!»

Апхуэдэ щIыкIэу екIуэкIащ гу зыщыдмыхуа нэгузыужь махуэ зыбжанэр. Ар къызэзыгъэпэщахэм фIыщIэшхуэ яхудощI».