Щэрмэт Людмилэ, артисткэ:

Псыпэр зэрыкIуэм

 
Гъуазджэм и лэжьакIуэ ухъун щхьэкIэ ухуеин къудейр мащIэщ, ар икIи уи лъым хэлъыпхъэу къыщIэкIынущ. Сэ IэщIагъэ схуэхъуауэ си гъащIэм къыщыздэгъуэгурыкIуэри си адэ-анэм я деж къыщожьэ. Абыхэм артистыгъэр яхэлът. Къуажэм щагъэува «Къамботрэ Лацэрэ» спектаклым тIури зэрыхэтам и мызакъуэу, си анэр гъащIэми щыджэгурейт…
Республикэ газетхэм ящыщ зым театр студием ягъэкIуэн щIалэгъуалэ къызэрыхахым теухуа тхыгъэм къыщыщеджэм, си адэм гукъэкI ищIащ абыхэм сазэрыхэзэгъэнур. А зэманым щэнха¬бзэмкIэ министру щыта Ефэнды Джылахъстэн и нэIэм щIэту Советхэм я унэм дыкъыщыхахат Москва ягъэкIуэнухэр. Щукиным и цIэр зэрихьэу Москва дэт театр училищэр ¬I975 гъэм къэзухыу Налшык къызэрызгъэзэж лъандэрэ, ЩоджэнцIыкIу Алий и цIэр зезыхьэ Къэбэрдей къэрал драмэ театрым сыщолажьэ.
 

Насыпыр плъыфэбэщ

 
Сэ хьэкъыу спхыкIащ ди гъащIэ псор зэрытеатрыр, дэ дызэрыактерыр. Сценэм хуэдэу сэ гъащIэм сыщыджэгуфынутэкъым зэкIэлъымыкIуагъэ псоми срабийщи. Слъагъу хъур¬къым цIыхум пцIы иупсу, бзэгу зэрихьэу, абы щыгъуэми пэжым и телъхьэ цIыху захуэу зыкъыпщигъэхъуну щыхэтым деж. Сэ къызэрысфIэ¬щIымкIэ, уи напэр къабзэу, ущIэукIытэн ббгъэдэмылъу, цIыхум и гум узэреуэн псалъэ Iей къыбжьэдэмыкIыу упсэуныр насып плъыфэбэм и зы налъэ инщ.
 

Сызыхуэпабгъэр, сызыгъэпIейтейр

 
Сыт артистыр зыхуейр? Лэжьыгъэм тезыгъэгушхуэ щытыкIэ театрым иIэрэ утыку къихьэмэ, джэгурэ спектаклым къэкIуахэм Iэгуауэр хуаIэтмэ, дунейм теткъым яхуумыщIаи, ар зыхузэфIэкIын лъэпкъ Тхьэм дищI. Псом нэхърэ нэхъ си жагъуэ хъур, сезыудыхыр сытми пщIэрэ уэ, Залинэ?! Уи мыIуэху зумыхуэ щыжаIэм и дежщ. Ар къызэмыузмэ - срипсэлъэнукъым, сыщигъэпIейтейкIэ - си Iуэхущ. 
 
 
 
 
 
Зытхыжар ИСТЭПАН Залинэщ.
Поделиться: