Къэбэрдей-Балъкъэр Республикэм и ЦIыхубэ фронтым Налшык къалэм щIыпIэ унафэр щызехьэнымкIэ и IуэхущIапIэм зи узыншагъэкIэ сэкъат зиIэхэм щхьэкIэ щыIэ автомашинэ гъэувыпIэхэм гулъытэ хуащIыну, щыщIэныгъэ яIэхэр зэрагъэзэкIуэж унафэхэр къащтэну лъэIукIэ иджыблагъэ зыхуигъэзащ.
Жылагъуэ зэгухьэныгъэм и лэжьакIуэхэм я жэрдэмкIэ щIэуэ зэрагъэпщыжа гъуэгухэм я фIагъыр къапщытащ, 2022 гъэм «ФIагъ лъагэ зиIэ гъуэгу шынагъуэншэхэр» лъэпкъ проектым ипкъ иткIэ тралъхьа зекIуапIэхэмрэ лъагъуэхэмрэ зыхуэдэри зэрагъэщIащ.
«Щыхьэрым и уэрам нэхъыщхьэхэм я теплъэм къызэрымыкIуэу зихъуэжащ, – къыхагъэщащ ЦIыхубэ фронтым и лэжьакIуэхэм. – ПIалъэ кIэщIым къриубыдэу зэгуэр пIащIэу тралъхьауэ щыта асфальт къилъэлъыр трахри, геотекстиль иралъхьащ, абы къатитIу зэтелъ асфальбетоныр къытраубгъуэжащ. Гъуэгухэм я кIыхьагъкIэ ирикIуэ турыр къыхалыкIыжащ, лъэс лъагъуэхэр щIэрыщIэу яукъуэдиижащ, зэпрыкIыпIэхэмрэ зэблэкIыпIэхэмрэ яхуэфащэ нагъыщэхэмкIэ къыхагъэщащ, зекIуэкIэ хабзэхэм япыщIа IэрыщI гъуазэхэр гъуэгущхьэхэм трагъэуващ. Апхуэдэу щыт пэтми, зи узыншагъэкIэ сэкъат зиIэхэм хуэгъэпса зекIуапIэхмэрэ автомашинэ гъэувыпIэхэмрэ гулъытэшхуэ ягъуэтауэ жыпIэ хъунукъым. ЩыIэхэри гъуэгу хабзэм и мардэхэм техуэркъым. IуэхущIапIэхэмрэ тыкуэнхэмрэ я екIуэлIапIэхэм зи узыншагъэкIэ сэкъат зиIэхэм щхьэкIэ хэхауэ екIуэлIапIэхэр зыщIыпIи иIэкъым. Ар къэгъэнауэ, машинэр Iуву щызэхэзекIуэ щIыпIэхэм гъуэгум укъытехьэжыну Iэмалу щыIэр мащIэ дыдэщ, къытехьэжыпIэ зэримыIэм къыдэкIуэу, гъуэгу леи къызэпыпчын хуи мэхъу».
Апхуэдэу жылагъуэ лэжьакIуэхэм я лъэIу тхылъым къыщыхагъэщащ Лениным и цIэр зезыхьэ уэрамым тет «Урысей» хьэщIэщым, ЩоджэнцIыкIу Алий и цIэр зезыхьэ уэрамым тет мэжджытым, КIыщокъуэ Алим и цIэр зрихьэу Налшык къалэм щIыпIэ унафэр щызехьэнымкIэ и IуэхущIапIэм блэкI уэрамым, нэгъуэщI щIыпIэхэми зекIуапIэхэр зэIузэпэщ зэрыхъуар, ауэ гъуэгу турхэр апхуэдизкIэ лъагэу Iэтащи, зи узыншагъэкIэ сэкъат зиIэхэр къызэрырашэкI гухэр зекIуэгъуей зэрыщыхъур.
«НэгъуэщI мыхъуми, уэрамыр зи кIыхьагъым зи узыншагъэкIэ сэкъат зиIэхэр пэрыуэгъуншэу щызекIуэн зы гъуэгу зэпрыкIыпIэрэ екIуэлIапIэ зыбжанэрэ яIэн хуейщ. Ауэ, ди жагъуэ зэрыхъунщи, цIыху щхьэхуэхэм я гъуэгур къащызыгъэпсынщIэ Iэмалхэр дыщызэхэзекIуэ щIыпIэхэм щыплъагъуркъым, арыххэуи, цIыху гуп щхьэхуэхэм я хуитыныгъэхэр къызэпыуда мэхъу. Дыщогугъ, гу зылъытта Iуэхугъуэхэр пIалъэ кIэщIым вгъэзэкIуэжыну, зекIуапIэхэри зыхуей хуэвгъэзэжыну», – къыхощ лъэIу тхылъым.
КъБР-м и ЦIыхубэ фронтым и лэжьыгъэм жыджэру хэт Бэкъей Евгений зэрыжиIамкIэ, гъуэгуухуэ лэжьыгъэхэр щрагъажьэкIэ, ар унэтIауэ, цIыху гуп щхьэхуэхэми яфI зыхэлъ Iуэхугъуэхэр къыщылъытауэ щытын, а мардэхэр зэрыгъэзэщIам щыщIэныгъэ имыIэмэ, арэзы утехъуэн хуейуэ аращ. Армыхъумэ, далэ мащIэ дыдэ фIэкIа дэмыкIыу цIыхухэм я тхьэусыхафэхэм зыкъызыщIаIэтэу хуожьэ.
Къэбэрдей-Балъкъэрым и ЦIыхубэ фроным гъуэгухэм я фIагъыр къыщалъытэм, гу зылъата щыщIэныгъэхэр зэгъэуIуауэ къулыкъущIэхэм я пащхьэ иралъхьащи, щогугъ псалъэмакъ лей къыхэмыкIыу ахэр зэрагъэпэщыжыну, зи узыншагъэкIэ сэкъат зиIэ цIыхухэми я Iуэхум гулъытэ иIэн хуейр ирагъэгъуэтыжыну.
