Гъэсыныпхъэхэр

США-м и жыIэм щIэт Евросоюзыр зыкъом щIауэ хущIокъу экономикэ и лъэныкъуэкIэ Урысейр лъагуэжьэмыщхьэу игъэтIысыну, ар лъэрымыхь ищIыну. Уеблэмэ жеIэ ди газым пыкIыну. Апхуэдэу зэдауэшхуэ къикIащ ягъэува уасэхэмкIэ фIэкIа ди щIыдагъэр зэрамыщэхунум теухуауэ къыхалъхьам. Польшэмрэ Балтикэ къэралхэмрэ къагъэувырт зы щIыдагъэ бареллыр доллар 30-кIэ фIэкIа ямыщэхуну. Пэжщ, адрейхэр Iуэхум нэхъ зэпэшэчауэ бгъэдыхьэрт. Абы щыгъуэми, Урысейм гурыIуэгъуэу жиIакIэт къезэгъпщалъэхэм тету фIэкIа а гъэсыныпхъэ лIэужьыгъуэр зэрахуимыутIыпщынур: хьэпшыпыр зеирщ уасэхэр зыгъэувыпхъэр, модрейхэр хуитщ ар ящэхунуми ямыщэхунуми. Апхуэдэуи къекIуэкIащ сыт щыгъуи. ЩIыдагъэмрэ газымрэ я уасэхэр хуабжьу щыдэкIуеи щехуэхи щыIащ.

Псалъэм и хьэтыркIэ, 2008 гъэм и мэкъуауэгъуэм «дыщэ фIыцIэ» зы баррелым доллари 137-рэ щIатырт. Апхуэдизу лъапIэ хъуныр къызыхэкIар США-р 2003 гъэм Иракым зэрытеуамрэ «Катринэ» толкъун къэубеяхэм 2005 гъэм Мексикэ псы дэжыпIэм щIыдагъэ къыщIэшыпIэ куэд зэрыщызэтрикъутамрэт. АрщхьэкIэ, ищхьэкIэ зэрыщыжытIащи, пуд дыдэу щрагъэкIаи къэхъуащ: 1973 гъэм екIуэкIа хьэрып-израиль зауэм и пэIуэкIэ зы баррелым и уасэр доллари 2 - 5-м щIигъуртэкъым.

Ауэ зэман дэкIри, псори и пIэ иувэжащ.

Газым и гугъу пщIымэ, ар егъэлеяуэ лъапIэ хъуат мы гъэм и гъатхэпэм. Уеблэмэ зы кубометр миныр доллар мини 3, 7-кIэ щрагъэкI къэхъуащ. Ауэ ящыгъупщэжакъым 2020 гъэм и гъатхэпэм короновирусым и зэранкIэ зы кубометр миныр доллар 35 - 40-кIэ фIэкIа щамыщэхуари.