ЩIышылэр жыжьэжкъым

Улахуэхэр

Иужь зэманым ди къэралым нэхъыбэрэ щытепсэлъыхь хъуащ цIыхухэм яIэрыхьэ хэхъуэхэр къэIэтыным. Зи гугъу ящIри къэрал IуэхущIапIэхэм Iутхэрщ. Ахэр, дохутырхэрщ, егъэджакIуэхэрщ, щIэныгъэмрэ щэнхабзэмрэ я лэжьакIуэхэрщ. ЩIышылэ мазэм абыхэм я улахуэхэм яхущIагъун зэрыхуейр иджыблагъэ жиIащ УФ-м и Президент Путин Владимир. Абы ягу къигъэкIыжащ илъэсипщI и пэкIэ, 2012 гъэм, къыдигъэкIа указым апхуэдэ къалэн щыгъэувауэ зэрыщытар. Псалъэм и хьэтыркIэ, къыщыгъэлъэгъуат бюджетым ирипсэухэм я лэжьапщIэхэр зыхыхьэ щIыналъэмм ику иту щызекIуэ улахуэхэм ирапхыну. «Нобэр къыздэсым щIыналъи 10 къудейщ бюджетым ирипсэу псоми ехьэлIауэ зыхуэдгъэувыжа мурадхэр къанэ щымыIэу щыпхагъэкIыр. Ар хъунукъым, - къыхигъэщхьэхукIащ Путин Владимир.

 Абы кIэщIу яужь иту финансхэмкIэ министр Силуанов Антон жиIащ дызыхуэкIуэ илъэсым и щIышылэм зи гугъу тщIы цIыхухэм я улахуэхэр проценти 8-кIэ къызэраIэтынур. 2023 - 2025 гъэхэм тещIыхьа къэрал бюджетым а Iуэхум ахъшэ щыхухихакIэщ.  

УФ-м и Правительствэм и деж щыIэ финанс университетым и профессор Сафонов Александр и псалъэхэм ятепщIыхьмэ, абы къокIыр, ищIагъ щIэт IуэхущIапIэхэр зиIэ министерствэ псоми лэжьапщIэу ятын папщIэ ахъшэу проценти 8-кIэ нэхъыбэ яIэрыхьэну. Улахуэхэм къадэкIуэу, заIэтынущ саугъэту ятхэми, лэжьыгъэм зэрытрагъэгушхуэ псоми.

ЗэкIэ мыпхуэдэущ Iуэхухэр зэрыщытар: Урысейм СтатистикэмкIэ и къэрал комитетым къызэритамкIэ, УФ-м ику ит улахуэр сом мин 62-м хуэдиз щохъу. Ауэ школ егъэджакIуэхэм ику иту яIэрыхьэр сом мин 47,5-рэщ, пэщIэдзэ классхэм щезыгъаджэхэм-сом мин 40,6-рэщ. Вузхэм щезыгъаджэхэм я деж а бжыгъэр сом мини 102-м, дохутырхэм - сом мин 95,4-м, щIэныгъэ лэжьакIуэхэм - сом мини 112,5-м щынос. АрщхьэкIэ щэнхабзэм и лэжьакIуэхэм иратыр сом мин 48-рэщ.