Бажэр къызэрагъэпцIар

Таурыхъ

Гъатхэ пщэдджыжь дахэт, дыгъэпсыр кърикIыхыу. Ауэ гукъыдэж имыIэу зы бажэжь цIыкIу мэзым щIэтт, къиущыхьу. Абы и цыр уат, ныбаджэт: махуищ хъуауэ зигъэнщIу шхатэкъым. Ар епхъуэрт удзыпэхэм, жыг тхьэмпэхэм, уеблэмэ хьэпIацIэхэми ещакIуэрт. АрщхьэкIэ и мэжалIэр абыкIэ икIыртэкъым. Бетэмал, лы мыгъуэт зыхуейр!
Памэурэ къыздижыхьым, Iэуэлъауэ къызэхех. КъызэтоувыIэ, гупсэхуу зеплъыхьри, къелъагъу тхьэкIумэкIыхь анэ гъурц лъабжьэм кIэщIэсщ, и шыр цIыкIухэр къепщIэкIауэ. «Лы къэзгъуэтащ!», - жиIэри абыкIэ иунэтIащ бажэм. Ар къэзылъэгъуа тхьэкIумэкIыхь зэрыбыныр щтэри щIэпхъуащ.
 Ауэ дэнэ кIуэнт шырхэр бажэм IэщIэкIыу? ТхьэкIумэкIыхь анэм мурад ищIащ Iэмал хуекIуэну. Абы игу къэкIыжащ мыжыжьэу мащэ гуэр зэрыщыIэр, и щхьэр къуацэкIэ щIэхъумауэ. Дыгъуасэ абы кIуэцIрымыщэту тхьэкIумэкIыхь анэр щхьэщыкIат, ауэ езым нэхърэ куэдкIэ нэхъ хьэлъэ бажэр зэримышэчынур гурыIуэгъуэт. Арати, моуэ жеIэ тхьэкIумэкIыхь анэм:
- Уа, бажэжь цIыкIу, си шырхэр иджыри цIыкIунитIэхэщ, къыдэкIуэтея нэужь ахэри пшхыну ухущIыхьэнщ. Иджыпсту джэд пшэрышхуэ пшхымэ, ар нэхъыфIтэкъэ?
- Дауи, нэхъыфIт. Ауэ дэнэ ар къыздикIынур?
- Абы щхьэкIэ умыгузавэ. Сэ сощIэ джэд хъушэ здэщыIэр. Си ужь къиуви, абы усшэнщ, хьэи, бгъэи, цIыхуи къыптемыплъэу.
Арати, тхьэкIумэкIыхьым бажэр ирешажьэ. Ауэрэ мащэм нэсахэщ. ТхьэкIумэкIыхьыр аргуэрыжу кIуэцIрымыхуу мащэм щхьэщыкIащ, ауэ абы и ужьым ит бажэр пхрыщэтри, «барфэ» жиIэу мащэм ехуэхащ.
- Уэ сыунэхъу мыгъуэщ,- мащэ куум къигурымыкIащ бажэр. – Сэ псори къэзгъапцIэрти, иджы тхьэкIумэкIыхь фейцейр къызэбзэджэкIащ!..
АдэкIэ бажэм жиIахэм тхьэкIумэкIыхьыр едаIуэххакъым. Ар лъейуэ кIуэжащ и шыр цIыкIухэр къыщигъэна щIыпIэм.