Къэбэрдей-Балъкъэрым и щIалэгъуалэ зэгухьэныгъэхэм къызэрагъэпэщ дауэдапщэхэм Зеущэ Алёнэ жыджэру зэрыхэтымкIэ къэтцIыхуащ. Иджыблагъэ ар иджыри зы ехъулIэныгъэкIэ къыхэщхьэхукIащ - «Сабий творчествэм и IуэхущIапIэу» Бахъсэн къалэм дэтым и унафэщI хъуащ.
Алёнэ Дыгулыбгъуей къуажэм къыщалъхуащ. Курыт еджапIэ нэужьым абы къиухащ КъБКъУ-м тхыдэмкIэ и къудамэр. 2011 гъэм Бахъсэн къалэ администрацэм къыщызэрагъэпэща ЩIалэгъуалэ советым и унафэщIу хахащ. Жылагъуэ-политикэ лэжьыгъэм пыщIа Iуэхухэм тыншу пэлъэщу, кърихьэжьар и кIэм нигъэсыу, ищIэр хъууэ - апхуэдэщ Алёнэ.
Зеущэм и лэжьыгъэ гъуэгуанэр «Псынэ» журналым къыщожьэ. ЕджапIэ нэхъыщхьэм щIэсу ар псэемыблэжу хуэлэжьащ адыгэ журналым, еджэнымрэ рекламэмкIэ менеджер къалэнхэмрэ зэдихьу. Абы щыгъуэ жылагъуэ-политикэ лэжьыгъэм хыхьащ.
- Сыт хуэдэ Iуэху къетхьэжьами, щIэгъэкъуэн ди куэду, дакъыгурыIуэу, дызыхащIыкIыу лэжьыгъэшхуэ дыублат абы щыгъуэм. Дызыдэлажьэ къулыкъущIэхэм, нэхъыжьхэм, жылэм ди мурадхэр къыддаIыгъ-ти, тхузэфIэмыкIын щымыIэу къытщыхъурт. Абы апхуэдизкIэ ди гукъыдэжыр къиIэтырти, илъэситIым къриубыдэу ди цIэр республикэ псом щыдгъэIуат, ди зэгухьэныгъэм хуэдэ адрей щIыпIэхэм къыщызэрагъэпэщыну мурад зыщIхэр чэнджэщакIуэ къытхуэкIуэрт, - жеIэ пщащэм.
Апхуэдэу Алёнэ къыгурыIуащ политикэмрэ жылагъуэ лэжьыгъэмрэ къызэрыхуигъэщIар. Абы щыхьэт техъуэу 2013 гъэм Зеущэр «Урысей зэкъуэт» партым и «ЩIэблэщIэ гвардие» щIыпIэ къудамэм и унафэщIу хахащ. И IэнатIэр фIэфIу зэрызэрихьэмкIэ, и гупсысэкIэмрэ лэжьэкIэмкIэ адрейхэм къахэщхьэхукI щыхъум, КъБР-м и Парламентым и ЩIалэгъуалэ палатэм хагъэхьащ икIи Бахъсэн къалэм и лIыкIуэу, абы Егъэджэныгъэмрэ щIэныгъэмкIэ и комиссэм и унафэщIу щыIащ. А псом и щIыIужкIэ, Алёнэ дэлажьэрт «Адыгэбзэ хасэм».
- 2016 гъэм Бахъсэн къалэм и щIыпIэ самоуправленэм и депутатхэр щыхахым сыхэтат, ауэ «резервым» сыкъыщынащ. Абыи щхьэусыгъуэ иIащ - хэхыныгъэхэр фокIадэм и 18-м екIуэкIащ, етIуанэ махуэм бын згъуэтати, унагъуэр нэхъапэ изгъэщри, сыкъызэтеувыIат, - пещэ Зеущэм. - Жылагъуэ-политикэ лэжьыгъэр хьэлъэщ, ар гурэ псэкIэ фIыуэ умылъагъумэ, упэлъэщынукъым. Я Iуэхум хуэпэж, гъащIэм и мыхьэнэр абы халъагъуэу, щапхъэ зытесхынрэ гъуазэ схуэхъунрэ цIыху куэд срихьэлIащ. Псом япэ си адэ-анэр изогъэщ. Абыхэм лэжьыгъэм сытрагъэгушхуэу, гукъыдэж къызату, къыздаIыгъыу сыкъекIуэкIащ. Си адэм «укъимыкIуэт!» жиIэрт сытым дежи. Ар сигу изубыдащи, сыт хуэдэ Iуэху сыпэрыувэми къысхуагъэлъагъуэми, сыкъикIуэтыркъым, сытегушхуэ мыхъумэ. АдэкIэ, администрацэм сыщыщыIэм Быр-хьэм Залинэ и лэжьэкIэр згъэщIагъуэрт икIи абы хуэдэу сыщытыну сехъуапсэрт. Бахъсэн дэт курыт еджапIэ №4-м, тхыдэмкIэ езгъаджэу сыздэщыIэм, сэ щапхъэ дахэ схуэхъуащ абы и унафэщI Багъэтыр Маринэ. Парламентым и гугъу пщIымэ, абы щыла-жьэ дэтхэнэ зыри и Iуэхум хьэщыкъ хуэхъуа защIэщ. КъБР-м и Парламентым и УнафэщI Егоровэ Татьянэ, абы и къуэдзэ Жанатаев Сэлим, «Урысей зэкъуэт» фракцэм и тхьэмадэ АфэщIагъуэ Михаил, ЕгъэджэныгъэмкIэ, щIэныгъэмрэ щIалэгъуалэ политикэмкIэ комитетым и унафэщIу щыта Азычэ Светланэ сымэ дадэлэжьащ, дагъэгушхуэу, чэнджэщэгъу къытхуэхъуу.
Алёнэ и адэр къыщхьэщытыжкъым, ауэ дэгъэзеигъуэхэм тригъэгушхуэу къыбгъурытщ и щхьэгъусэр. Абы къыдеIыгъ и сыт хуэдэ лэжьыгъэри.
КъызыхэкIа лъэпкъым и бзэм, и тхыдэм, и хабзэм Алёнэ пищIын щыIэкъым. Ар хэкупсэщ. А гурыгъуазэращ ар 2008 кърихужьэу, «Псынэ» журналым къезышэлIари.
Зыхуеджар егъэджакIуэ IэщIагъэми, политикэм дихьэхами, къызыхуигъэщIауэ къилъытэжа Iуэхум къигъэзэжащ Алёнэ. Ар нобэкIэ Бахъсэн къалэм дэт «Сабий творчествэм и IуэхущIапIэм» и унафэщIщ.
- Бахъсэн къалэ администрацэм и Iэтащхьэ Мэмхэгъ Хьэчим мы лэжьыгъэр къыщысхуигъэлъэгъуам Iэнкун сыхъуат. Къапщтэмэ, сэ курыт еджапIэм илъэс куэдкIэ сыщылэжьати, сабийхэм дэлэжьэным сесэжауэ щытын хуейт, ауэ унафэщI къалэным сыщышынат. Арами, «укъимыкIуэт» псалъэр си тхьэкIумэм итти, сытегушхуащ, пэжыр жысIэнщи, сыхущIегъуэжакъым. Алъандэрэ си щхьэм илъа лэжьыгъэр нахуа- пIэ сщIыну Iэмал къызэзыта IэнатIэм махуэ къэс фIыщIэ хузощI сигукIэ. Сабийхэр курыт еджапIэр къаухын хуейуэ гъащIэм къегъэуври, макIуэ. Ди деж къыщIэкIуэр яфIэфIщи аращ. Щхьэж зыхуэIэзэ, дэзыхьэх, и псэм фIэфI IэщIагъэм теухуауэ зиужьыну Iэмал къыщагъуэт ди деж. А цIыкIухэр нэжэгужэу, пIащIэу къызэрыкIуэм, я егъэджакIуэхэр къаухъуреихьауэ уэршэру, зыгуэрхэм тепсэлъыхьу зэхэту сащыIуплъэкIэ, нэхъыбэж сщIарэт, мыхэр цIыхум яхэсшарэт, сIэтарэт, псоми къезгъэцIыхуарэт жысIэу сохъу, - жеIэ Алёнэ.
«Сабий творчествэм и IуэхущIапIэм» цIыкIу 1610-рэ йокIуалIэ иджыпсту. Ахэр унэтIыныгъэ 26-м теухуауэ мэлажьэ, тхьэмахуэ къэс зэпеуэ, зэIущIэ зэмылIэужьыгъуэхэр щрагъэкIуэкI, «Успех каждого ребёнка», «Доступная среда» къэрал программэхэр щагъэзащIэ.
- Иджыри унэтIыныгъэ зыбжанэ къызэIусхыну сохъуапсэ: сурэт щIыныр, театрыр, къафэр, IT технологиехэр щагъэунэху, анэдэлъхубзэмкIэ гупжьейхэр, нэгъуэщIхэри. Сыхуейт иужьрей IэмэпсымэхэмкIэ къызэгъэпэща унэ щхьэхуэ диIэу, абы дыщылэжьэну. Сабийхэм нобэ яхэтлъхьэращ гъащIэм Iэпэгъуу щаIэнур, зыхуэдгъасэращ лъабжьэ яхуэхъунур. Си къа-рум фIэкIа зыми сыщымыгугъыу къэскIуащ а гъуэгуанэри, зищIысыр сощIэ. ЦIыхум и чэзум щIэгъэкъуэн, тезыгъэгушхуэн, зыунэтIын игъуэтын хуейщ. Иджыпсту апхуэдэ дунейщ дыщыпсэури, бзылъхугъэм лэжьыгъэри, унагъуэри, унэгуащэ, нысэ, пхъу къалэнхэри, сабийхэри екIуу зэдехьыф. Аращи, бзылъхугъэхэм я махуэшхуэм ирихьэлIэу захуэзгъэзэну сыхуейт мыпхуэдэ псалъэхэмкIэ - адыгэ бзылъхугъэу дунейм фытет, фи быныр фIым хуэвгъасэ, хабзэм щIэфпIыкI, анэдэлъхубзэр яIурыфлъхьэ, хэкур фIыуэ евгъэлъагъу, нэхъыжьхэм пщIэ хуевгъэщI. СощIэ, ар лэжьыгъэ хьэлъэщ, ауэ мыри зыщывмыгъэгъупщэ - фи щхьэ фIыуэ флъагъуж, пщIэ зыхуэфщIыж!