Интернетым дыкъыщоджэКхъузанищ - ПщIэрэ уи цIыхугъэм уэр щхьэкIэ жиIар? – хуэтхьэусыхэну къригъэжьащ зыгуэр лIы Iущ гуэрым. - Зэ догуэ! – къигъэувыIэжащ ар модрейм. – Иджыпсту къызжепIэну зыбгъэхьэзырар кхъузанищым щIэгъэпщ. - Сыт кхъузанищым къибгъэкIыр? - Зыгуэр жыпIэн ипэ, ар щэ щIэбгъэпщын хуейщ. Япэ кхъузанэр – пэжырщ. ЖыпIэнур пэжрэ-мыпэжрэ зэхэбгъэкIа, шэч къытуомыхьэжын хуэдэу? - Хьэуэ, сэ сызытепсэлъыхьынур яIуэтэжу зэхэсхауэ аращ. - АтIэ пэжрэ пцIырэ умыщIэ хъыбар умыIуати нэхъыфIщ. ЕтIуанэ кхъузанэми щIэгъэпщ абы щыгъуэ. Ар гуапагъэрщ. Си цIыхугъэм щхьэкIэ жыпIэну хъыбарым гуапагъэ гуэр хэлъ? - Хьэуэ, Iейщ жысIэнур… - Уэ абы щхьэкIэ Iей гуэр къызжепIэну ухэтщ. Ауэ ар пэжрэ пцIырэ зэхэбгъэкIыхакъым. Ар хъунукъым. Ещанэ кхъузанэми щIэбгъэпщын хуейщ жыпIэну узыхуейр. Ар сэбэпынагъэм и кхъузанэрщ. Iэмалыншэу щыт а къызжепIэнур? КъызжумыIэу щытмэ, тхуэмыгъэзэкIуэжын гуэр къэхъункIэ хъуну? - Хьэуэ, жызмыIэми зыри къэхъунукъым. - АтIэ уэ къызжепIэну узыхэтым пэжи, гуапагъи, сэбэпынагъи хэлъкъым. Сыт щIыжыпIэнум и мыхьэнэр? ЖумыIэ! – къыпидзащ лIы Iущым.
Мывэ хьэлъэхэр Бзылъхугъэ гуэрым бэзэрым гъавэхэкI къыщищэхуат. Къэсыжрэ къэлътмакъыр къиунэщIмэ, и щхьэм гъавэхэкIым щыщ телъми, и лъабжьэм мывэ щIакIутат. Бзылъхугъэм и жагъуэ хъуащ къызэрагъэпцIар, ауэ щIэх дыдэ теужри, и Iуэху иужь ихьэжащ. Илъэс тIощI дэкIауэ и унэм зыгуэрхэр къытеуIуащ. Бжэр Iуихмэ, лIыжьитI щытт. - Зэгуэр укъэдгъапцIэри, гъавэхэкIым и пIэкIэ мывэ уэтщауэ щытащ. Къытхуэбгъэгъуну дынолъэIуну дыкъэкIуащ, - жаIэ. - СощIэж. Зыри къэхъуакъым. Мывэхэр а махуэ дыдэм щIэсхри искIутыжащ сэ. Ауэ фэ илъэс тIощIкIэ фи плIэм илъащ ахэр! - къажриIащ абы.
ФIы хьэмэрэ Iей? ЛIы гуэрым мэзым шы къыщигъуэтри, унэм къихуащ. И гъунэгъухэр къехъуэпсащ «сыту уехъулIа!» - жаIэри. - СщIэркъым. СехъулIагъэнкIи семыхъулIагъэнкIи хъунщ, - жиIащ лIым. Шыр мыгъасэти, махуэ гуэрым лIым и къуэр къридзыхри, и лъакъуитIыр къутащ. - Еууей. Сыту Iейуэ къыпщыщIа, уи къуэм и лъакъуэхэр Iейуэ хилъхьа? - жаIащ гъунэгъухэм. - СщIэркъым, - жиIащ лIым, - Iейуэ къыщIэкIынкIэ хъунщ, фIыуи къыщIэкIыфынущ. Куэд дэмыкIыфу зауэ къэхъури, гъунэгъухэм я къуэхэр абы дашащ, хэти хэкIуэдащ. Зи лъакъуэхэр къута щIалэр къэнащ дамышу. - Сыту уехъулIа, уи къуэр зауэм дашакъым! - жаIащ гъунэгъухэм. - СехъулIагъэнкIи хъунщ, семыхъулIэгъаххэнкIи хъунщ, хэт ищIэрэ ар? - жиIэрт аргуэру лIым.
Поделиться:
Читать также:
19.05.2024 - 13:50 →
ЩIыхь тхылъхэр яритащ
18.05.2024 - 10:48 →
Унагъуэращ Хэкур къыщежьэр
16.05.2024 - 19:35 →
ГукъэкIыжхэр гъащIэм щыщу
16.05.2024 - 17:30 →
Гулъытэр зиIэ ныбжьыщIэхэр
16.05.2024 - 15:24 →
Европэр насыпыншагъэм къезыгъэла щIалищ
|