Спортсмен цIэрыIуэ, ушумкIэ дунейпсо мастер, каскадёр, Новосёлов Игорь зи унафэщI агенствэм трюкхэр щызыгъэув, УФ-м и Кинематографистхэм я зэгухьэныгъэм хэт ТхьэйцIыху Анзор фэзгъэцIыхуну сыхуейщ.
Анзор и адэ Александр лъэпкъкIэ Тэрч щIыналъэм щыщщ, МГУ-м и математикэ факультетыр къиухащ. ЩIэныгъэхэмкIэ Урысей Академием Экономикэмрэ математикэмкIэ и институт нэхъыщхьэм щригъэджащ.
Александррэ абы щхьэгъусэ хуэхъуа Соринэ Риммэрэ унагъуэ дахэ яухуэри бынитI зэдапIащ.
Анзор 1972 гъэм Москва къалэ къыщалъхуащ. Курыт еджапIэм щыщIэсым фехтованием кIуэуэ щытати, зэпеуэ куэдми хэтащ. Илъэс зыбжанэ дэкIа иужьк1э ар дахьэхащ бэнэкIэ лIэужьыгъуэхэм. Абы и зэфIэкIым гу лъызыта и гъэсакIуэм къыжриIат спортыр IэщIыб имыщIыну. АдэкIэ щIалэм Ушум кIуэн щIидзащ. 1989 гъэм щыщIэдзауэ абы зыщигъэсащ спортсмен цIэрыIуэхэу Инжеватов Денисрэ Юнсян Люйрэ (КНР) я деж. Мы спорт лIэужьыгъуэр абы фIыуэ зэрилъэгъуар зи фIыщIэр и адэращ, аращ ар абы япэу зышари тезыгъэгушхуари. КъыкIэлъыкIуэ илъэситIым Анзор ушу-таолум зыхуигъэсащ, зэрыжаIэщи зыщымысхьыжу. Зэман дэкIри, Урысейм и гуп къыхэхам хагъэхьащ.
ТхьэйцIыхум спортым ехъулIэныгъэфIхэр щызэIэригъэхьащ. 1994 гъэм Мюнхен Европэм и чемпионат щекIуэкIам къыщихьащ дыжьын медаль. А гъэ дыдэм Польшэм ушумкIэ дунейпсо зэпеуэм етIуанэ щыхъуащ, 1993 гъэм Европэм и кубокыр къихьащ, ди къэралым щекIуэкIа зэпеуэ куэдым къыщыхэжаныкIащ. Ар ящыщщ 1994 гъэм Пекин дунейпсо кубокыр къыщызыхьахэм.
УшумкIэ спортым и мастер хъуащ 1994 гъэм.
ЩIалэм жеIэ абы и дежкIэ ушур спорт лIэужьыгъуэ къудейуэ зэрыщымытыр, абы куэдым зэрыхуигъэсар. Анзор къызэрилъытэмкIэ, абы уи къарум хегъахъуэ, Iэпкълъэпкъыр IэтIэлъатIэ ещI, бэшэч уещI, узыншагъэмкIи сэбэпышхуэ пылъщ.
- Ушум сэ фIыуэ къызгуригъэIуащ нэхъыбэ зэрысхузэфIэкIынур. «Сэ ар схуэщIэнукъым» гупсысэм себакъуэу, схузэфIэкIынур зыхуэдизыр згъэунэхуну Iэмал къызитащ. Мурад пщIам ерыщу ухуэкIуэу, гушхуэныгъэ пхэлъу, Iуэхум псынщIэу хэкIыпIэ къыхуэбгъуэтыфу урегъасэ. Псалъэм папщIэ, сэ сызыхэт ушу–таолу спорт лIэужьыгъуэр ар Iэщэ зэмылIэужьыгъуэхэр къыщыбгъэсэбэпу дахэу зыкъыщыбгъэлъагъуэ теплъэгъуэщ. Абы цIыхум IэпкълъэпкъкIи псэкIи зрегъэужь.
ТхьэйцIыху Анзор Сабийхэмрэ ныбжьыщIэхэмрэ папщIэ Москва къалэм дэт спорт школ №34-м ушумкIэ гъэсакIуэ-егъэджакIуэу щылэжьащ.
1996 гъэ щегъэжьауэ ар хэтщ «Благъуэ ныбжьыщIэ» фIэщыгъэм щIэту ушумкIэ илъэс къэс зэхашэ дунейпсо зэпеуэр къызэзыгъэпэщхэмрэ езыгъэкIуэкIхэмрэ. Мы зэманкIэ ар ушумкIэ щхьэхуэу ядолажьэ зи ныбжьыр илъэси 8-м щегъэжьа ныбжьыщIэхэмрэ балигъхэмрэ. Ар и гъэсэнхэм я гъусэу мызэ-мытIэу хэтащ Пекин къыщызэрагъэпэщ зэпеуэхэм.
Гулъытэ, пщIэ щхьэхуэ хуэфащэщ Анзор и етIуанэ лэжьыгъэми. ИщхьэкIэ зэрыжытIащи, ар каскадёрщ. Куэдым ящIэ апхуэдэ IэщIагъэ ди къэралым зэрыщымыIэр. Абы еджапIэ гуэрым ущыхуеджэфынукъым, езыр-езыру утегушхуэу зыхуумыгъасэмэ.
Адыгэ щIалэр каскадёр зэрыхъуари гъэщIэгъуэнщ. Езым зэрыжиIэмкIэ, ар я фIыгъэщ абы и гъэсэну щытахэм язым. Абы циркым щыхуагъасэ училищэр къиухри, кинокаскадёру кIуати, Анзори абы хишащ.
1995 гъэм щегъэжьауэ Анзор Stunt Agency агенствэм каскадёру щолажьэ.
ЩIалэм жеIэ абы ехьэлIа дэтхэнэ зы Iуэхугъуэри игу къызэринэр. Ар IэщIагъэ шынагъуэщ, ухуейрамэ, гъащIэм и нэзым тету къакIухьу жыпIэмэ ущыуэнукъым.
- Кином хэт актёрхэр щыпсалъэкIэ таурыхъ Iэджэ жаIэж, кино щытрахым зыхэта хуэдэу ящI псэзэпылъхьэпIэм теухуауэ, - жеIэ Анзор.- ПцIыщ. Ахэр псори сэ схуэдэ защIэщ зыщIэр. Псалъэм папщIэ режиссёр Туманишвили Михаил триха «Дорога счастья» фильмым автомашинэр щхьэпридзу хэт теплъэгъуэр сэращ зыгъэзащIэр.
2008 гъэм щыщIэдзауэ трюкхэр зыгъэув, актёр IэнатIэм ирилажьэ Анзор щIэупщIэ зиIэхэм ящыщщ. А пIалъэм къриубыдэу ар проект 80-м хэтащ.
Ар хэтащ фильм, сериал зэмылIэужьыгъуэхэу «Консервы», «Розы для Эльзы», «Побег», «Антикиллер 1, 2» (режиссёрыр Кончаловский Егорщ), «Последний бронепоезд», «СМЕРШ» (режиссёрыр Ройзман Зиновийщ), «Однажды в провинции» (режиссёрыр Шагаловэ Екатеринэщ), «Капкан для киллера» (режиссёрыр Гаспаров Самвелщ), нэгъуэщIхэми.
Зыхэт дунейм фIыуэ къыщацIыху, пщIэ къыщызылэжьа Анзор жеIэ, каскадёр IэщIагъэм гугъуехь ин пылъми, ар къызэрыхуэмыгъэнэнур. Зи гупсысэ пэжу зэтеува Анзор ещIэ IэщIагъэм къыдэкIуэ насыпым хэлъ фIагъ псори.
