Париж и Гранд операр

Гранд опера е Гарнье опера хъужыр – франджым и театр нэхъыщхьэрщ икIи ар дуней псом и оперэ сценэ нэхъ ин дыдэхэм ящыщщ.
А уардэунэрщ Прокофьевымрэ Стравинскэмрэ я лэжьыгъэ телъыджэхэр париждэсхэм япэу щызэхахар. Езы Пикассо декорацэхэр зыхуищIа, фэилъхьэгъуэхэм я художникыу Шанель щылэжьа театырр дуней псом и щэнхабзэ хъугъуэфIыгъуэхэм ящыщу къалъытэр. 
Щэнхабзэм и лъагапIэм нэсахэрщ абы ирагъэблагъэр. А театрым, псалъэм папщIэ, Iэгуауэшхуэ щыхуаIэтащ Шаляпин Фёдор, Вишневская Галинэ, Нуреев Рудольф, Нижинский Вацлав сымэ. 

Гарнье операм и тхыдэр

Театрым и тхыдэр 1669 гъэм къыщожьэр, Людвиг XIV-м и тетыгъэум хиубыдэу. Гранд операр а зэманым Париж щаухуа концерт гъэлъэгъуапIэ 13-нэ хъуащ. Франджым къыщыхъуа революцэ иным щыщIэдзауэ XIX лIэщIыгъуэм и пэщIэдзэ пщIондэ, театрым и фIэщыгъэр мызэ-мытIэу яхъуэжащ. Ар зэм ГъуазджэхэмкIэ театр, зэм Оперэ театр, зэм макъамэмрэ къафэмкIэ Пащтыхь академием хуэкIуэжырт. 
Гарнье операм и иджырей архитектурэ теплъэр зи фIыщIэр Наполеон III-рщ. Архитекторхэм я зэпеуэм щытекIуа Гарнье Шарль. и лэжьыгъэр адрейхэм ефIэкIыу къалъытат. Уахътыншэ хъуа уардэунэ къехъулIат IэщIагъэлIым, ухуэныгъэм илъэс 15 тригъэкIуэдами. 
Гранд операр 1875 гъэм щIышылэм къызэIуахащ. Пащтыхьым и ухуэныгъэм франк мелуан 36-рэ текIуэдащ, ар и кIэм зэрынамыгъэсыпауи. КъыжыIапхъэщ, театр яухуэн ямыух щIыкIэ Наполеон III-р дунейм зэрехыжар. 

Гранд операм и теплъэр

Гарнье операм и ипщэ лъэныкъуэр IуплъапIэщ, абы и дахагъэр цIыхухэм ягъэщIагъуэу. Ар пасэрей маскэхэмрэ дамыгъэхэмкIэ гъэщIэрэщIащ. Абы щыболъагъу композитор цIэрыIуэхэм я бюстхэр: Бетховен, Моцарт, Россини, нэгъуэщIхэри. Гранд операм и къухьэпIэ лъэныкъуэмкIэ щагъэуващ ухуэныгъэр зи Iэдакъэ къыщIэкIа Гарнье Шарль и бюстыр. А лъэныкъуэм хуозэ Наполеон III-р гуимэкIэ театрым Iухьэфын хуэдэу ящIа пандусыр. Абдеж иджы щытщ «Фантом» шхапIэр. Ищхъэрэ щIыхьэпIэращ театрым и лэжьакIуэхэм къагъэсэбэпыр. 
Гарнье операм щIыхьэхэр япэу зыIущIэр метр 30 зи лъагагъ мрамор дэкIуеипIэрщ. Гупыж зыщIа дэтхэнэ зыплъыхьакIуэри нобэ хуитщ абы къыщикIухьыну. 
Операм и къухьэпIэ лъэныкъуэм, пащтыхьым и Ротондэ-кIэ зэджэм, библиотекэ-музейр щыIэщ. Абы щахъумэ сурэтхэр, театр декорацэхэм я макетхэр. 

Театр пэшыр

Гранд операм и лэжьыгъэ псори щагъэлъагъуэм нал теплъэ иIэщ икIи ар дыщафэ-плъыжьыфэщ. Унащхьэм фIадзащ тонний хъу абдж люстрэ абрагъуэр. Ар зрагъэува плафоныр 1964 гъэм зи Iэдакъэ къыщIэкIар ди хэкуэгъу художник Шагал Маркщ. Пэшышхуэм щIэтщ театреплъ 1900-рэ щытIысын къэдабэ шэнтжьейхэр. Метр зэбгъузэнатIэ 220-рэ хъу лэжьыгъэр зи плъыфэкIэ зэщхьэщыкI Iыхьитхуу гуэшат дэтхэнэми классикэ оперэ е балет теплъэгъуэ къищу. Апхуэдэщ «Тристан и Изольда», «Ромео и Джульетта», «Жар-птица», «Дафнис и Хлои», «Лебединое озеро» «Жизель», «Борис Годунов», «Волшебная флейта», «Пеллиас и Мелизанда» лэжьыгъэхэр. Апхуэдэу Марк гулъытэ яхуищIащ композиторхэу Бизе, Верди, Бетховен, Глюк сымэ я лэжьыгъэхэми. 

КъэфапIэр

Театр сценэм адэкIэ, къэдабэ Iупхъуэхэр зыIулъ щхьэгъубжэхэм ухуэкIуэмэ, къэфапIэ утым уохьэ. Дыщафэ блынхэр зэбэкI пэшыр сыткIи хуэщIащ балет труппэхэр утыку ихьэн ипэкIэ зыкъызэщIагъэплъэным. А блынхэр ягъэдахэ Франджым, дуней псом я балеринэ цIэрыIуэхэм я сурэтхэм. 

Хъыбар гъэщIэгъуэнхэр

Гранд-операм и щIыунэм, мафIэс къэхъу хъумэ жаIэу щагъэува псы гуэным карпхэр хэсщ. Бдзэжьейхэм театрым и лэжьакIуэхэм я нэIэ тетщ, ягъашхэ. Театрым и унащхьэм бжьэ матэхэр тетщ, Париж и нэгъуэщI унэхэми хуэдэу. 
1907 гъэм «Граммофон» франджы IуэхущIапIэм и унафэщIым Гранд операм и блынхэм щIэблэм папщIэ щигъэпщкIуат уэрэд диск 24-рэ. 1988 гъэрщ ахэр къыщагъуэтар, Гарнье операр щызэрагъэпэщыжым. Илъэси 100 дэкIа нэужь къагъуэта лэжьыгъэхэр EMI IуэхущIапIэм щIэрыщIэу къыдигъэкIыжащ.