Дзюдо
Балъкъэр лъэпкъыр къэгъэщIэрэщIэжыным и махуэм ирихьэлIэу Налшык, хабзэ зэрыхъуам тету, спортсмен 200 хэту дзюдомкIэ зэхьэзэхуэ щекIуэкIащ. Мыбы хэтахэр илъэс I2 – I4 зи ныбжьхэрщ. Дыдейхэм нэмыщI, ди гъунэгъу республикэхэу Къарэшей-Шэрджэсым, Ингушым, Осетие Ищхъэрэ - Аланием, Ставрополъ крайм къикIат.
Ди дзюдоистхэм мыбы медал I3 къыщахьащ. И хьэлъагъ елъытакIэ зыхэта гупым щытекIуахэщ Гаев Алан, Къазий Ислъам, Беслъэней Дамир сымэ. ЕтIуанэ увыпIэр Къамбий Сэфарбий, ЦокIыл Ахьмэд, Мэшыкъуэ Инал, ЖьакIэмыхъу Ренат, ещанэр Тау Инал, Дэхъу Адэм, Шэрджэс Инал, Мурачаев Абдульсамат, Мизиев Хаджимуса, Жылэ Идар сымэ къахьащ.
Шахматхэр
ШахматхэмкIэ IуэхущIапIэ «Каисса», Налшык къалэ и Къэбэрдей уэрамым тетым, зэпеуэ щекIуэкIащ, абы дихьэх ныбжьыщIэхэм я Iэзагъэм хагъэхъуэным теухуауэ. Я ныбжьрэ нобэкIэ зэфIэкI яIэмрэ елъытауэ зэдэджэгуахэр гупитIу ягуэшат. Нэхъыжьхэр зыхэта «А» гупыр 28-рэ хъурт. Мыбы щытекIуащ Текуев Эмир. ЕтIуанэ увыпIэм щытщ Танэ Артур. Ещанэр- Жабоев Адэмщ.
Разряд щIэбэну зэпеуа ныбжьыщIэхэм ящыщу бжьыпэр зыубыдар Журавлев Максимщ. ЕтIуанэ увыпIэр къылъысащ Ахкубеков Руслан, ещанэщ Богомолов Даниил. НэхъыщIэхэм я «Б» гупым шахматист 48-рэ щызэхьэзехуащ. Япэ увыпIэр Чылар Диниуар, етIуанэр Сергеевэ Дарье, ещанэр Текуев Алан сымэ къахьащ. Иджыри разряд зимыIэ гупым зэфIэкI къыщызыгъэлъэгъуам ящыщщ япэ увыпIэр зыубыда Алэкъей Темыркъан, етIуанэр къэзыхьа Абаевэ Тамилэ, ещанэ хъуа Абаевэ Тамилэ сымэ. Нэхъ зэфIэкI зиIэхэм яхэтащ Индием къикIауэ Къэбэрдей-Балъкъэр университетым щеджэ Чаухан Санжайрэ Кушваха Шашванкрэ.
Баскетбол
Краснодар крайм хиубыдэ Кропоткин къалэм баскетболымкIэ Кавказ Ищхъэрэм и сабий командэхэм я зэхьэзэхуэм и ещанэ джэгугъуэ Iыхьэр щызэхэтащ. Мыбы ди хъыджэбз цIыкIухэм я командэм къыщыпэщIэтащ Волгоград, Дон Iуфэ Iус Ростов, Кърымым къикIахэм нэмыщI, езы Кропоткинрэ Краснодаррэ я баскетболисткэхэри. Я ныбжь емылъытауэ, Iэзэу джэгуащ ди ныбжьыщIэ цIыкIухэр. Абы щыхьэт тохъуэ Краснодарым зэрытекIуа бжыгъэшхуэ къудейр - I06:32. Щхьэ къэIэтыпIэ ирамыту хагъэщIащ. Апхуэдэу адрей къапэщIэтахэми текIуэри, япэ увыпIэр къахьащ. Зэхьэзэхуэм хэтахэм зыми гъунэгъуу хузэфIэкIакъым ди джэгуакIуэ Къул Амелие хуэдэу очко 45-рэ зэхуихьэсыфын. Мыдрей хъыджэбз цIыкIухэу зи зэфIэкI къалъытэу, псоми ягу ирихьауэ къыхагъэщахэм ящыщщ Хьэнэ Ланэ, Бережная Софье, Газаевэ Сальмирэ, Бэджий зэтIэлъхуэныкъуэхэу Даринэрэ Дарянэрэ сымэ.
ФIыщIэ лей хуэфащэщ а ехъулIэныгъэр зи фIыщIэ гъэсакIуэ Тхьэкъуахъуэ Риммэ.
Псы есынымкIэ зэпеуэ
Кавказ Ищхъэрэм и ныбжьыщIэхэм псы есынымкIэ я зэпеуэ, спортсмен 200 хэту, Краснодар щекIуэкIащ. Мыбы хэта щIалэ, хъыджэбз цIыкIухэм я зэфIэкIыр лIэужьыгъуитхукIэ ягъэунэхуати, ди командэм щыщу къыхэжаныкIар Гурциев Болэтщ. Абы зы етIуанэ, зы ещанэ увыпIэхэр къихьащ. Иджы ар хагъэхьащ Кавказ Ищхъэрэм и командэ къыхэхам икIи Урысейм и чемпионатым хэтынущ. Ар щекIуэкIынур мэлыжьыхьым и I6-22 махуэхэрщ, езыгъэблэгъэнури Татэрстэным и къэлащхьэ Къазанщ. Ди спортсменым и гъэсакIуэщ Газатулин Марат.
Алыдж-урым бэнэкIэ Алыдж-урым бэнэкIэмкIэ Кавказ Ищхъэрэм и зэхьэзэхуэ Черкесск къалэм щекIуэкIащ спортсмен 300 хэту. Мыбы щызэбэнахэр илъэс I6-м итхэрщ. КъБР-м, Дагъыстэным, Ингушым, Осетие Ищхъэрэ - Аланием, Къэрэшей-Шэрджэсым, Ставрополь крайм щыщхэу.
Къэбэрдей-Балъкъэрым икIащ бэнакIуэ 55-рэ. Я хьэлъагъ елъытакIэ зыхэта гупым япэ увыпIэр къыщахьащ Кыл Алихъанрэ (килограмм 68-рэ) Емуз Тамерланрэ (килограмм 75-рэ). ЕтIуанэ хъуащ ТIэхъу Идаррэ Бэмбэт Андемыркъанрэ (килограмм 32-рэ), Дзу Аслъэн (килограмм 4I-рэ), Бэрбэч Тамерлан (килограмм 44-рэ), Лыджыдэ Имран (килограмм 57-рэ), Атэлыкъ Темыркъан (килограмм 62-рэ), Къардэн Ибрэхьим (килограмми II0-рэ). Ещанэ увыпIэр къэзыхьахэм ящыщщ ХьэщIэлI Нурдин (килограмм 32-рэ), Тет Данил (килограмм 57-рэ), Къудей Арсен (килограмм 62-рэ), Къанкъул Темырлан (килограмм 62-рэ), Ингуш Къантемыр (килограмми I00). ИщхьэкIэ зи цIэ къитIуа бэнакIуэхэр Урысейм и чемпионатым хэтынущ. Ар Уфа щекIуэкIынущ накъыгъэм и 23-26 махуэхэм.
