Зэгуэр адэжь щIыналъэм къращIылIа лъапсэрых зауэм я щхьэр хахыу ди лъэпкъэгъу куэдым тIысыпIэ ящIауэ щытащ Сирие къэралыгъуэр. ХамэщIым гугъу щехьами, лъабжьэ быдэ ящIауэ, зыхыхьа лъэпкъым и пщIэр къалэжьауэ къэгъуэгурыкIуащ ахэр. Ауэ, аргуэрыжьти, щIыпIэм къыщыхъуа зауэм, илъэсищэ бжыгъэ дэкIыжауэ, гузэвэгъуэ хидзащ. Я щхьэр мафIэм къыхахын хуей щыхъум, абыхэм я псэхэр кърахьэлIэжащ я адэжь щIыналъэм. Абыхэм ящыщщ Лэскэн районым хыхьэ Ерокъуэ къуажэм дэс Мурий-Мустэфахэ я унагъуэр. Абы я Iуэху зыIутым, щIыпIэм щекIуэкI гъащIэм зэрыхэзэгъэжым, я гурыгъу-гурыщIэхэм дыщигъэгъуэзащ я унэгуащэ Майядэ.
- Дауи, укъыщалъхуа, укъыщыхъуа, уи гъащIэм и зэхуэдитIыр щыбгъэкIуа щIыналъэр убгынэу, нэгъуэщI щIыпIэ укIуэу щIэрыщIэу псэукIэ зэбгъэпэщыжыныр зэрымытыншыр дэтхэнэ зыми къыгуроIуэ, - къыщIидзащ псалъэмакъыр Майядэ. - Ауэ Iэмалыншагъэм урихулIэмэ, сыт хуэдэ хэкIыпIэри къэбгъэсэбэпынущ. Дэ ди Iуэхур апхуэдэу щыхъуми, хэщIапIэ тхуэхъужащ адыгэ щIыналъэр, ди Iуэхури фIы дыдэу зэрызэтеувэжынум шэчи къытетхьэркъым. Гузэвэгъуэ зытелъыр а мафIэ лыгъейм къыхэнарщ, абыхэм я Iуэхур зэрыхъунум дегъэгумэщI.
Пэжыр жыпIэмэ, дыкъыщыкIуэжагъащIэм гугъу дехьащ, ди Iуэхухэр тэмэму дэмыкIыурэ екIуэкIащ. Гугъу дехьами, зауэм дыкъызэрелар, дэхуэха дызэрымыхъуар ди гурыфIыгъуэщ. Абы щыгъуэм «Джайлыкъ» пансионатым дыщыпсэуащ. Ди Iуэхур къызэрытщагъэпсынщIэным псори хущIэкъуащ, цIыхухэр яхузэфIэкIхэмкIэ къыддэIэпыкъуащ. Сэ си щхьэгъусэм и къуэпсхэр къыщежьар мы щIыналъэращ, аращи, ди унагъуэм и адэжь хэкум къигъэзэжауэ къызолъытэ. ЩIалитIрэ зы хъыджэбзрэ диIэщ. Мыбы къэдгъэзэжын ипэ чэнджащэ куэдым дыхэтащ. Сириеми дигу щIэныкъуэ куэд къыщызэднэкIын хуей хъуащ: псэукIэ зэIузэпэщыр, лэжьыгъэр, Iыхьлы-благъэхэр. ФIыуэ плъагъу, узэса Iыхьлыхэр, благъэхэр, ныбжьэгъухэр къыпкъуэмытыныр гугъущ.
Мыбы къызэрыдгъэзэжам зыкIи дыхущIегъуэжыркъым. Си щхьэгъусэм и хъуэпсапIэт и адэжь щIыналъэр псэупIэ хуэхъужыныр. Зэрыхьзэрий дызыхэхуам ди дунейр хэплъэгъуэ ищIат. Апхуэдэу щыхъуми, Iуэхум фIы гуэр къыхэтлъыхъуэну доплъри, зауэр и щхьэусыгъуэу щытми, си щхьэгъусэм илъэс куэдкIэ и гум щигъэфIа и адэжь лъахэр зэригъуэтыжар куэд и уасэщ. ДыкъыздэкIуэжами, цIыхухэр къызэрытпыкъуэкIынур сыт хуэдэ щIыкIэми тщIэртэкъым. Дызэримыгугъауэ хъарзынэу дыкърагъэблэгъэжащ. Насыпырыхьтэкъэ къуажэхэм унэ зратыну ящIа пхъэидзэм ди унэцIэр къызэрикIар?! Дэ абы егъэлеяуэ дыщыгуфIыкIащ. Лъапсэр ущыпсэуным хуэдэу дгъэхьэзырыным тIэкIу гугъу дыдехьащ, зэгъэпэщыжыныгъэ лэжьыгъэ гуэрхэр унэм етщIылIащ. Дигу къэмыкIхэмкIэ, ди гупсысэ зыхунэмысхэмкIэ ди гъунэгъухэри къыддэIэпыкъуащ. ЖыпIэнурамэ, я чэнджэщи къыдахьэлIащ, ерыскъыкIи къытпэIэбащ. ГъунэгъуфIхэр дызэриIэмкIи иджыри ди насып къикIауэ къызолъытэ.
