Къэбэрдей-Балъкъэрым и хабзэгъэув IэнатIэм физическэ щэнхабзэмкIэ, спортымкIэ, туризмэмкIэ и комитетым Сабий стадионым зэIущIэ щригъэкIуэкIащ. Ар теухуауэ щытащ ныбжьыщIэхэмрэ щIалэгъуалэмрэ тэмэму гъэса хъунымкIэ физическэ щэнхабзэмрэ спортымрэ ягъэзащIэ къалэнымрэ абы и мыхьэнэмрэ. ЗэIущIэм хэтащ КъБР-м и Iэтащхьэмрэ Правительствэмрэ, суд къэрал къулыкъущIапIэхэм я лIыкIуэу Парламентым щыIэ ДыщэкI Мадинэ, депутатхэр, спорт школхэм я унафэщIхэмрэ гъэсакIуэхэмрэ.
ЗэIущIэр къызэIуихащ комитетым и унафэщI Бэрэгъун Арсен. Абы жиIащ къаIэта Iуэхум мыхьэнэшхуэ зэриIэр икIи къыхигъэ-щащ Урысейм гъэсэныгъэ и лъэныкъуэкIэ щыIэ лъапIэныгъэхэр хъумэным теухуауэ щэнхабзэм, щIэныгъэм, спортым я Iэмалым къезэгъ жыпхъэ пыухыкIахэр зэрыщыIэр.
- Сабийм и псэкупсэ гъэсэныгъэм, абы цIыху щхьэхуэ къищIыкIыным и IуэхукIэ къалэнышхуэ ягъэзащIэ унагъуэм, жалыгъуэм, школым, апхуэдэуи спорт IуэхущIапIэхэм. Сэ сыщыIащ апхуэдэ зыбжанэм икIи слъэгъуащ гъэсакIуэхэм сабийхэм лэжьыгъэшхуэ зэрыдрагъэкIуэкIыр. ЕгъэджакIуэ, гъэсакIуэ, психолог къалэнхэр зэдахькIэрэ, абыхэм къытщIэхъуэ щIэблэм и зыужьыныгъэм хэлъхьэныгъэшхуэ хуащI, - жиIащ Арсен.
КъБР-м спортымкIэ и министрым и къуэдзэ Хэжь Заур абы и лъэныкъуэкIэ ирагъэкIуэкIхэм щытепсэлъыхьым, жиIащ министерствэр, къэрал, муниципальнэ спорт IуэхущIапIэхэр, спорт лIэужьыгъуэхэмкIэ щIыналъэ спорт федерацэхэм я лэжьыгъэр УФ-м и Президентым «Урысей псэкупсэ-гъэсэныгъэ лъапIэныгъэ нэхъыщхьэхэр хъумэнымкIэ икIи егъэфIэкIуэнымкIэ къэрал политикэм и лъабжьэр гъэувыным теухуауэ» къыдигъэкIа унафэм тету зэраубзыхур.
Урысей псэкупсэ-гъэсэныгъэ лъапIэныгъэ нэхъыщхьэхэм зыщрагъэубгъун, ахэр яхъумэн папщIэ спорт зэхыхьэхэр щызэхашэкIэ, махуэшхуэ иращIэкIыу, УФ-м, КъБР-м я къэрал ныпхэр яIэту, гимныр кърагъауэу къызэIуах. Абыхэм хьэщIэ лъапIэу кърагъэблагъэ IэнатIэм щIыхь щызиIэ тренерхэр, спортсмен цIэрыIуэхэр, спортым и ветеранхэр. Зэхьэзэхуэм кърихьэлIахэм, спортсмен ныбжьыщIэхэм я пащхьэм къыщыщыпсалъэкIэ, абыхэм урысей псэкупсэ-гъэсэныгъэ лъапIэныгъэхэр хъумэнымкIэ, егъэфIэкIуэнымкIэ, къытщIэхъуэ щIэблэр хэкупсэу къэгъэхъунымкIэ щыIэ хэкIыпIэ нэхъыщхьэхэм и гугъу ящI, апхуэдэуи къыхагъэщ зэныбжьэгъугъэр гъэбыдэн зэрыхуейр, цIыхубэ спортым и мыхьэнэр зэрыиныр.
ЩIалэгъуалэр Iуэху мыхъумыщIэхэм димыхьэхын папщIэ балигъыпIэ имыува ныбжьыщIэхэр спорт школхэм зэрырашэлIэным теухуа Iуэху щхьэхуэхэр ирагъэкIуэкI.
Заур тепсэлъыхьащ спортымкIэ щIыналъэм иIэ ехъулIэныгъэхэм, спорт школхэм, щIыналъэ спорт федерацэхэм я лэжьыгъэр зэрекIуэкIым, гъащIэ узыншэ ехьэкIыным къыщыхураджэ зэхыхьэхэр хэту ведомствэм къызэригъэпэщ зэIущIэ зэхуэмыдэхэм.
Псэкупсэ, хэкупсэ, физическэ гъэсэныгъэр и лъабжьэу КъБР-м Егъэджэныгъэмрэ щIэныгъэмкIэ и министерствэм иригъэкIуэкIхэм тепсэлъыхьащ министрым и къуэдзэ Мокаев Ашэмэз. Абы къызэрилъытэмкIэ, цIыхум зиужьынымкIэ мыхьэнэшхуэ иIэщ а Iуэхугъуищри зэгъусэу лэжьыгъэм къыщыгъэсэбэпыным. НыбжьыщIэхэр хахуэу, зэпIэзэрыту, бэшэчу, зыхущIэкъур зрагъэхъулIэфу гъэсэнымкIэ физическэ щэнхабзэмрэ спортымрэ хыхьэ джэгукIэ, зэпеуэ зэхуэмыдэхэр къызэрагъэпэщ. КъищынэмыщIауэ, еджакIуэхэр жыджэру хашэ жылагъуэ Iуэху зэхуэмыдэхэм, волонтёр зэщIэхъееныгъэхэм. Апхуэдэу «ДыгъафIэ къалэм» къыщызэIуахащ «Юнармием и унэ», кадет школ-интернат №3-м илъэс псом щолажьэ дзэ-хэкупсэ гъэсэныгъэмкIэ «Авангард» егъэджэныгъэ-методикэ центр.
«Дэтхэнэ зы сабийми и ехъулIэныгъэ» федеральнэ проектым хыхьэу, 2014 гъэм щегъэжьауэ курыт школи 163-м я спорт пэшу 174-рэ зэрагъэпэщыжащ. 2023 гъэм апхуэдэ пэшу иджыри 5 зы-хуей хуагъэзэжынущ, спорт щIыпIэу 8 зэIузэпэщ ящIыжащ. Абы-хэм я фIыгъэкIэ спортым дихьэх ныбжьыщIэхэм я бжыгъэм хэхъуэнущ, еджапIэхэм спорт клубхэм зыщегъэужьынымкIэ Iэмал хъарзынэщ. Мы зэманым спорт клубу 159-рэ мэлажьэ, абыхэм зыщагъасэ еджакIуэ мин 17-м.
КъБР-м ЩIалэгъуалэ IуэхухэмкIэ и министерствэм и къудамэм и унафэщI Мамаев Таулан тепсэлъыхьащ я ведомствэр щIалэгъуа-лэ спорт зэгухьэныгъэхэм зэрыдэIэпыкъум, спорт зэхыхьэр зэрыригъэкIуэкIым, «уэрам» спорт лIэужьыгъуэм зегъэужьынымкIэ щыIэ «Урысейм и уэрамхэр» жылагъуэ зэгухьэныгъэм и щIыналъэ къудамэм зэрыдэлажьэм. 2022 гъэм и шыщхьэуIу мазэм КъБР-м Егъэджэныгъэмрэ щIэныгъэмкIэ, ЩIалэгъуалэ IуэхухэмкIэ и министерствэхэм даIыгъри, республикэм щекIуэкIащ щIыналъэм щыпсэухэри КИФЩI-м и хэгъэгухэм къикIахэри зыхэта, «Street Workout» спорт лIэужьыгъуэмкIэ Япэ чемпионат зэIуха.
ЩIалэгъуалэр хэкупсэу гъэсэным, дзэ къулыкъум хуэгъэхьэзырыным хуэунэтIауэ Урысейм и ДОСААФ-м и Къэбэрдей-Балъкъэр къудамэм щIыгъуу «АрМИ», «Зарница» дзэ-спорт зэхьэзэхуэхэр щIэх-щIэхыурэ къызэрагъэпэщ.
2023 гъэм ирагъэкIуэкIыну я мурадщ «уэрам» щэнхабзэм и фестиваль, къыщызэдэжэ марафонхэр, картингымкIэ, нэгъуэщI спорт лIэужьыгъуэхэмкIэ республикэ чемпионатхэр.
ЗэIущIэм къыщаIэтащ спорт IуэхущIапIэхэр зыхуей-зыхуэфIкIэ къызэрызэгъэпэщам, гъэсэныгъэмкIэ къагъэсэбэп Iэмалхэм, КъБР-м Егъэджэныгъэмрэ щIэныгъэмкIэ и министерствэмрэ тренерхэмрэ зэрызэдэлэжьэнум, Олимп джэгухэм щыхуагъэхьэзыр еджапIэ щIыналъэм къыщызэIухынымкIэ щыIэ хэкIыпIэхэм, спортым и лэжьакIуэхэм я Iэзагъэм хэгъэхъуэным, нэгъуэщI Iуэхугъуэхэми теухуа упщIэхэр.
ЗэIущIэм кърикIуам ипкъ иткIэ, депутатхэм ягъэбелджылащ зытепсэлъыхьа Iуэхухэр зи къалэн IэнатIэхэм гулъытэ зыхуащIыпхъэ лэжьыгъэхэр.
