Дали Сальвадор

         ХудожествэхэмкIэ испан, франджы академиехэм хэта испан художник, литератор, режиссёр, киносценарист  Сальвадор Дали и цIэр зэрихьэу Париж дэт музейр цIыху кIуапIэщ. Ар Монмартр щыIэщ, зыгъэпсэхуакIуэ кIуахэмрэ художникхэмрэ куэду щыпэкIу щIыпIэм.

         Сальвадор Дали 1904 гъэм накъыгъэм и 11-м Испанием хыхьэ Фигерас къалэм къыщалъхуащ. ИлъэсиплI щыхъум ар  сурэт щIыным дихьэхат. Художественнэ школым сурэтыщI гъуазджэм щыхуеджащ.  СурэтыщI гъуазджэхэмкIэ Мадрид и академием и щIэныгъэм щыпищащ. И ныбжьыр илъэс 14 щыхъум, и лэжьыгъэхэр  япэу щагъэлъэгъуат Фигерас къалэм и театрым.    КъыкIэлъыкIуэу, 1929 гъэм, Париж и Геман галереем и лэжьыгъэхэр щигъэлъэгъуащ. Дуней псом цIэрыIуэ щыхъуа нэужь, къэрал куэдым и выставкэхэр къыщызэрагъэпэщащ, Урысейри хыхьэу.

         Литературэм, мифологием, тхыдэм, диным ехьэлIа куэдым триухуащ Сальвадор и сурэтхэр. Псом хуэмыдэу литературэ тхыгъэ цIэрыIуэхэм хуищIа и лэжьыгъэхэм къыщигъэлъэгъуащ и гупсысэхэр. Сабийхэм щIэщыгъуэ ящохъу «Алиса в стране чудес», «Космический слон», «Ромео и Джульетта» тхыгъэхэр я лъабжьэу ищIа скульптурэхэмрэ графикэ лэжьыгъэхэмрэ. Данте и "Божественная комедия" тхыгъэм Сальвадор ксилографие лэжьыгъи 100 хурагъэщIащ, итальян тхакIуэр къызэралъхурэ 1951 гъэм илъэс 700 зэрырикъум и щIыхькIэ. Дэтхэнэ гравюрэми щхьэхуэу  цIэ фIищат Дали.

         Дали Сальвадор и гъащIэм щыщ IыхьэфI Париж щигъэкIуащ. Ар япэу а къалэм къыщыкIуар 1921 гъэрщ, Сан-Францискэ гъуазджэхэмкIэ и Пащтыхь академием къыщыщIагъэкIыжам.  Абы щыгъуэ  абы къицIыхуащ  ныбжьэгъу хуэхъуа Пикассо Пабл'.  

1989 гъэм дунейм ехыжащ Сальвадор. КъыщIэна лэжьыгъэ псори Испанием тыгъэ хуищIащ. Сальвадор дунейм ехыжу илъэситI дэкIа нэужь, "Стратон" фондым Монмартр къыщызэIуихащ Дали Сальвадор и цIэр зезыхьэ музейр. Абы къакIуэхэм  гъуэгугъэлъагъуэ ират, бзэ зэмылIэужьыгъуэхэмкIэ тхауэ, урысыбзэри хэту. НэхъыбапIэм Дали Сальвадор и гъащIэмрэ гуащIэмрэ теухуа фильмкIэ ирагъажьэ музейм зыщаплъыхьыныр.  

 Сальвадор и лэжьыгъэ 300-м щIигъу щахъумэ музейм:  гравюрэхэр, сурэтхэр, скульптурэхэр. КъыжыIапхъэщ, Европэ псор къапщтэмэ,  абы и скульптурэхэм я нэхъыбэр а музейрщ щызэхуэхьэсар. А лэжьыгъэхэм я фIыгъэкIэ Дали дуней псом цIэрыIуэ щыхъуащ. Музейм екIуалIэ зыплъыхьакIуэхэр ирагъэдаIуэ Сальвадор и макъ ирагъэтхам, макъамэ щIэту.

Лондон зэпымыууэ щагъэув «Вселенная Дали» выставкэм хагъэхьэ Сальвадор и Iэдакъэ къыщIэкIа «Профиль времени», «Улитка и Ангел», «Алиса в стране чудес», «Посвящение Терпсихоры», «Космическая Венера», «Святой Георгий и дракон», «Видение Ангела», «Космический слон» лэжьыгъэ телъыджэхэр. А скульптурэхэр щIэщыгъуэщ икIи узыгъэгупсысэщ. Дэтхэнэми щIэ гуэр хелъагъуэ зыми емыщхь а лэжьыгъэхэм.

Музейм куэду щахъумэ Дали и гравюрэхэмрэ литографиехэмрэ. Псом хуэмыдэу щIэщыгъуэ ящохъу литературэ тхыгъэ цIэрыIуэхэм яхуищIахэр. Апхуэдэщ Шекспир и «Ромео и Джульетта», «Дон Кихот», «Тристан и Изольда», «Алиса в стране чудес» серием щыщхэр, нэгъуэщIхэри. Музейм и блынхэм фIэлъщ   художникым и сурэтхэр, интервьюхэм къыхахыжа Iыхьэ   гъэщIэгъуэнхэр, щIэныгъэрэ гушыIэкIэ  гъэнщIахэр.   

Сальвадор Дали киноми хэлъхьэныгъэфI хуищIащ. Ар хэлэжьыхьащ "Андалузский пёс", "Золотой век", "Завороженный" фильмхэм. Апхуэдэу и Iэдакъэ къыщIэкIащ "Тайная жизнь Сальвадора Дали, рассказанная им самим", "Дневник одного гения", "Трагический миф Анжелюса Милле" тхылъхэр. И литературэ тхыгъэхэмрэ усэхэмрэ щIэупщIэ яIэу щытащ. Сальвадор  "Уолт Дисней" IуэхущIапIэм дэлэжьащ икIи художникым и "Destino" мультфильмыр 2003 гъэм къыдигъэкIащ. Дуней псом щыцIэрыIуэ чупа-чупс карамелым и дизайныр зыщIари Сальвадор Далищ.