ГъэпцIакIуэхэм защыфхъумэ!

Урысейм и Социальнэ фондым и къудамэу Къэбэрдей-Балъкъэрым щыIэм фигу къегъэкIыж гъэпцIакIуэхэм зыщыфхъумэн зэрыхуейр. 

Социальнэ фондым и лэжьакIуэ хуэдэу къэпсэлъам фэ фтеухуауэ зыри жевмыIэ. Фондым и IэщIагъэлIхэр зэи щIэупщIэркъым СНИЛС-м, паспортым, банк картэм и номерым, абы и ПИН-кодым е паролым. Апхуэдэ хъыбарыр ­телефонкIэ жефIэну къэлъаIуэр гъэпцIакIуэхэрщ. 
Абыхэм фыкъагъэгугъэнкIэ хъунущ пенсэм хагъэхъуэну, юридическэ дэIэпыкъуныгъэ къыватыну. Языныкъуэ IэщIагъэлI нэпцIхэм цIыхухэм хъыбар ирагъащIэ пособиехэр къыIэрагъэхьэн папщIэ ятеухуахэр къапщытэж хуэдэу. Социальнэ фондым чэнджэщ къывет къэпсэлъа мыцIыхум дзыхь хуэвмыщIыну, шэч къытефхьэмэ, икIэщIыпIэкIэ те­лефоныр зэпевгъэудыж.
Апхуэдэуи Социальнэ фондым и IэщIагъэлIхэм унэ-унэкIэрэ къакIухьыркъым пенсэм ехьэлIа Iуэхутхьэбзэхэр хуагъэлъагъуэу. Апхуэдэ къевмыджа хьэщIэхэр къакIуэу Социальнэ фондым и лэжьакIуэу жаIамэ, фысакъ. Зыщывмыгъэгъупщэ, фондым Iуэхутхьэбзэ псори щызэфIех езыр цIыхухэм щадэлажьэ IэнатIэхэмрэ «Госулуги» порталым - онлайн IэмалкIэ. Iуэху­тхьэбзэхэр сыт щыгъуи пщIэншэщ. Ахъшэхэр зыхуагъэувахэм хуагъэхь, лъэIу тхылъыр къата иужь е нэхъ пасэу фондым щIалъхьа тхылъхэр я тегъэщIапIэу.