ДжэгуакIуэшхуэм и дуней телъыджэ

Налшык къалэ админист­рацэм егъэджэныгъэмкIэ и департаментым и лэжьа­-кIуэ ЛIыIэщын Людмилэ зэ­фIих лэжьыгъэ дахэхэм ящыщщ адыгэ лъэпкъым и цIыху ­щэджащэхэр гъэ­лъэ­пIэныр, абыхэм ятеухуауэ зэIущIэ­хэр, дерс зэIухахэр, къэ­хутэныгъэ лэжьыгъэхэр еджа­пIэхэм ще­гъэ­кIуэ­кIы­ныр. Апхуэдэхэм я щап- хъэщ Кэнжэ дэт курыт еджапIэ №20-м «ЛIэ­ужь дахэ» фIэщыгъэр иIэу иджыблагъэ къыщызэрагъэпэща пшыхь екIур. Ар зытеухуар Къэбэрдей-Балъкъэр АССР-м и цIыхубэ уса­кIуэ, тхакIуэ, уэрэдус икIи джэгуакIуэ цIэрыIуэу щыта ХьэхъупащIэ Амырхъан Iэс­хьэд и къуэрат. 
ЕджапIэм и бжэхэр гуапэу хьэщIэхэм къахузэIуихащ. Апхуэдэхэт къалэм дэт школхэм адыгэбзэмрэ литературэмрэ щезыгъэджхэр, абы­хэм я гъэсэнхэр, ХьэхъупащIэ Амырхъан и благъэхэр, Iыхь­лыхэр. Ахэр ирагъэблэгъащ Iуэхур щекIуэкIа пэш хуитым. ХьэщIэхэм япэщIыкIэ щы­гъуазэ зыхуащIащ пшыхьым къыхузэрагъэпэща гъэлъэ­гъуэныгъэ купщIафIэм. Абы хэлът Амырхъан теухуа къэ­хутэныгъэ лэжьыгъэхэр, су­рэт зэмылIэужьыгъуэхэр. 
ФIэхъус гуапэкIэ зэIущIэр къызэIуихащ школым и уна­фэщI Аслъэн Майе. ЕджапIэм и пашэм и псалъэхэм ­пищащ ЛIыIэщын Людмилэ. Абы къызэрыхигъэщащи, лъэп­къым и иужьрей джэ­гуакIуэ ХьэхъупащIэ Амыр­хъан ноби цIыхубэм ягу къы­зэрагъэкIыжыр фIы и лъэ­ныкъуэкIэщ. «Амырхъан адыгэ­бзэ дахэ Iурылъа къудейкъым, атIэ пэжыр зи гъуа­зэ и тхыгъэхэм IуэрыIуатэм ижь ящIихуащ», - жиIащ ЛIы­Iэщыным. 
АдэкIэ утыкур хуит хуащIащ Iуэхум жэуаплыныгъэ хэлъу зыхуэзыгъэхьэзыра еджакIуэ цIыкIухэм. Абыхэм утыкум ща­гъэIуащ ХьэхъупащIэм и Iэдакъэ къыщIэкIа тхыгъэ-хэр, уэрэдхэр ягъэзэщIащ. Адыгэ фащэкIэ хуэпа ныбжьыщIэхэм ягъэлъэгъуа къа­фэхэм удахьэхырт. Псоми яфIэтелъыджэт ХьэхъупащIэ Амырхъан езыр усэ къеджэу, уэрэд жиIэу кърихьэлIахэм «зэрызакъыхуигъэзар». 
ЗэIущIэм кърихьэлIа дэтхэнэми мы дакъикъэхэм загъэпсэхуа къудейкъым, атIэ иджыри зэ наIуэ ящыхъуащ ХьэхъупащIэм адыгэбзэ къабзэ Iурылъу зэрыщытар. Ахэр яфIэхьэлэмэту щыхьэщIахэщ джэгуакIуэшхуэм и дуней телъыджэм. Абыхэм иджыри зэ наIуэ ящыхъуащ Амырхъан гъащIэм къыщыхъу, щызе­кIуэ Iуэхугъуэ зэмылIэужьыгъуэхэм гулъытэ хуищIу зэ­рыщытар. Абы и щыхьэтт ­хабзэ-нэмысым, цIыхубэр зыхэт кIыфIыгъэм къыхэ­шы­ным, хъуэхъу псалъэ-ущие­хэм, къы­хуеджэныгъэ лъэщ­хэм я щапхъэу пшыхьым щыIуахэр. 
Зэхыхьэр къызэзыгъэпэщар къэбэрдей-шэрджэсыбзэр школым щезыгъэджхэу Тэтэр Ларисэ, Къэзанш Нинэ, Мамий Маритэ сымэщ. Абы­хэм зэрыжаIэмкIэ, зэIущIэм и къалэн нэхъыщхьэу щыта­-хэм ящыщт лъэпкъым и цIыху телъыджэхэм ящыщ ХьэхъупащIэ Амырхъан бгъэдэлъа зэфIэкIым, абы къыщIэна щIэин лъапIэм, и лъэужь нэхум къыдэкIуэтей щIэблэр щыгъуазэ хуэщIыныр. Ап­хуэдэ IэмалхэмкIэ ныбжьы­щIэхэм нэхъыфIу ибогъэ­цIыхуфI къызыхэкIа лъэп­къым и цIыху пэрытхэр, цIэ­рыIуэхэр, я анэдэлъхубзэми ябгъэдэлъ зэхэщIыкIми адэ­кIэ зрагъэужь егъэджа­кIуэ­хэм. 
Къызыхуэтыншэу къызэрагъэпэщащ икIи купщIафIэу ирагъэкIуэкIащ пшыхьыр. Абы зи зэфIэкI езыхьэлIа дэтхэнэми фIыщIэ ини пщIэи яхуэфащэщ, дауи.