КъБР-м и Правительствэм и УнафэщI Мусуков Алий иригъэкIуэкIащ гулъытэ зыхуэщIыпхъэ Iуэхугъуэхэм щытепсэлъыхьа зэIущIэ.
Республикэм и зыгъэпсэхупIэхэр егъэфIэкIуэным тещIыхьа проектым тепсэлъыхьащ КъБР-м курортхэмрэ туризмымкIэ и министрым и къалэнхэр зыгъэзащIэ Шаваев Ислъам. Ар тещIыхьащ зэпкърылъхьэн фIэкIа хуэмейуэ хьэзыр ухуэныгъэхэр (модульные) щIынымкIэ КъБР-р 2023 - 2024 гъэхэм субсидие щат зэпеуэ хэгъэтыным.Абы кърикIуэнум теухуауэ УФ-м и щIыналъэхэм федеральнэ мылъкум щыщ ахъшэ иратынущ модуль ухуэныгъэхэр щIыным е къэщэхуным теухуа хьэрычэт Iуэху зезыхуэхэм. КъБР-м и Правительствэмрэ «Урысейм и Сбербанк» акционер зэгухьэныгъэмрэ иджырей технологие-хэм тещIыхьауэ зэдэлэжьэну зэраухылIа зэгурыIуэныгъэр игъэбелджылащ КъБР-м экономикэ зыужьыныгъэмкIэ и министр Рахаев Борис.
КъБР-м мэкъумэш IэнатIэмкIэ и министр Сыжажэ Хьэсэн къытеувыIащ Гъатхэмрэ лэжьыгъэмрэ я махуэшхуэм, 1941 - 1945 гъэхэм екIуэкIа Хэку зауэшхуэм ТекIуэныгъэ Иныр къызэрыщытхьрэ илъэс 78-рэ зэрырикъум я щIыхькIэ шыгъажэхэр зэрекIуэкIынум, Къэралыгъуэм и махуэр Къэбэрдей-Балъкъэрым щагъэлъапIэу «Кубок Эльб-руса-2023» XVIII дунейпсо шыгъажэ Iуэхушхуэр къызэрызэрагъэпэ-щынум.
КъБР-м щIалэгъуалэм я IуэхухэмкIэ и министр Лу Азэмэт тепсэлъыхьащ Профсоюзхэм щэнхабзэмкIэ я унэу щIалэгъуалэ центру ягъэпсыжыр зыхуей хуэгъэзэным республикэм и мылъку зэрытекIуэдэнум. Абы папщIэ зэхъуэкIыныгъэ халъхьэнущ «КъБР-м и щIалэгъуалэм зегъэужьын» программэм.
ЗэIущIэм щыхэплъащ республикэм и цIыху дэхуэхахэм зэрадэIэпыкъунум теухуауэ ягъэбелджыла проект зыбжанэм. Ахэр зыхуэдэм тепсэлъыхьащ КъБР-м лэжьыгъэмрэ цIыхухэм социальнэу къащхьэщыжынымкIэ и министр Асанов Алим.
Къэбэрдей-Балъкъэр Республикэр къызэрыунэхурэ илъэси 100 зэрырикъуам и щIыхькIэ республикэм и щIыналъэхэм я лIыкIуэхэр КъБР-м и Правительствэм и зэIущIэм щагъэлъэпIащ. КъБР-м и муниципалитетхэм я зэгухьэныгъэм и правленэм и унафэщI Пэнагуэ Максим жиIащ ЩIыпIэ самоупрапленэхэмкIэ зэгухьэныгъэхэм я урысейпсо ассоциацэ нэхъыщхьэм КъБР-м и Iэтащхьэ КIуэкIуэ Казбек, муниципалитетхэм я унафэщI нэхъ жыджэрхэм фIыщIэрэ гулъытэрэ къазэрыхуищIар.
- ЩIыпIэ самоуправленэм зегъэужьынымкIэ урысейпсо ассоциацэм и совет нэхъыщхьэм и унафэкIэ Къэбэрдей-Балъкъэрыр илъэси 100 зэрырикъум и щIыхькIэ КъБР-м и Iэтащхьэ КIуэкIуэ Казбек медаль къыхуагъэфэщащ щIыналъэм и социально-экономикэ зыужьыныгъэм, щIыналъэхэм ядэлэжьэным хэлъхьэныгъэшхуэ зэрыхуищIам папщIэ, - жиIащ Пэнагуэм. Апхуэдэу ди Iэтащхьэр хагъэхьащ щIыналъэхэм зегъэужьынымкIэ УФ-м и Президентым и деж щыIэ Советым.
Ассоциацэм и медаль иратащ Бахъсэн щIыналъэм и унафэщI Балъкъыз Артуррэ Аруан щIыналъэм и унафэщI Ажий Валерэрэ.
«ЩIыпIэ самоуправленэм и унафэщI нэхъыфI» цIэр къыфIащащ Дзэлыкъуэ щIыналъэм и унафэщI Джатэ Руслан, Налшык къалэ администрацэм и унафэщI Ахъуэхъу Таймураз, Май щIыналъэм и унафэщI Саенкэ Татьянэ сымэ. ЩIыпIэ самоуправленэм щыIэ псэукIэм, экономикэм, щэнхабзэм, егъэджэныгъэм, медицинэм хуищIа хэлъхьэныгъэм папщIэ Бахъсэн къалэмрэ Шэджэм щIыналъэмрэ я администрацэхэм щIыхь тхылъкIэ я цIэр къраIуащ. ФIыщIэ тхылъ хуагъэфэщащ Прохладнэ къалэм, Iуащхьэмахуэ, Лэскэн щIыналъэхэм я администрацэхэм. Муниципалитетхэм я жылагъуэ конгрессым щIыхь тхылъ яхуигъэфэщащ Шэрэдж, Прохладнэ щIыналъэхэм.
