«НэгъуэщI щIалэхэмкIэ уемыплъэкI» уэрэд цIэрыIуэр жызымыIа уэрэджыIакIуэ диIэу къыщIэкIынкъым. УФ-м щIыхь зиIэ и артист, Къэбэрдей-Балъкъэрым и Музыкэ театрым и уэрэджыIакIуэ Хъупсырджэн Альберти ар къызэхъулIэхэм ящыщщ.
Альберт школ-интернатым щыщIэсым щегъэжьауэ духовой оркестрым хэту кларнетымрэ накъырэмрэ еуэрт, хор гупми уэрэд щыжиIэр. АрщхьэкIэ, сыт хуэдэ щIалэ цIыкIуми хуэдэу, абы футболыр псом япэ иригъэщырти, класс нэхъыжьхэм щыщIэсым Бахъсэн и «Автомобилист» футбол клубым щыджэгун щIидзат. Зы махуэ гуэрым ар ирагъэблагъэ пшыхьым уэрэд щыжиIэну. Гитарэ макъамэ щIэту Альберт а пщыхьэщхьэм жиIащ «Сэрмахуэ» уэрэдыр. ЩIалэм и макъыр абы щыгъуэм зэхихащ Къэбэрдей-Балъкъэрым и оперэ уэрэджыIакIуэ нэхъыфI дыдэхэм ящыщ, Ленинград консерваторэр къэзыуха Къуэдзокъуэ Владимир. Абы Хъупсырджэным къыжриIащ уэрэд жыIэныр IэщIагъэ ищIмэ зэрыщымыуэнур, и макъым хуэдэ зиIэр зэрызырызыхэр…
Абы лъандэрэ илъэс зыкъом дэкIыжащ, зэрыжаIэуи, псы куэд ежэхащ. Хъупсырджэным Воронеж консерваторэр къыщиухащ, оперэ уэрэджыIакIуэу I50-м нэблагъэ хэту Новосибирск щекIуэкIа зэхьэзэхуэм нэхъыфIу къалъыта цIыхуи I0-м ящыщ хъуащ. А ехъулIэныгъэм иужькIэ Альберт ирагъэблэгъат Мурманск филармонием, Свердловск, Воронеж, Новосибирск оперэ театрхэм, арщхьэкIэ абы и плъапIэр Налшыкт. Музыкэ театрым зэрыщылажьэрэ Хъупсырджэныр оперэ, опереттэ зэмылIэужьыгъуэхэм партие нэхъыщхьэу 33-рэ щигъэзэщIащ.
«УФ-м щIыхь зиIэ и артист» цIэ лъапIэр къызэрыфIащами и хъыбар кIэщI иIэжщ. I995 гъэм Къэбэрдей-Балъкъэрым и махуэхэр Москва и «Россия» концерт тыпIэм щекIуэкIыу, Хъупсырджэным Мистер Икс и ариер игъэзэщIат. Абы едэIуа Ельцин Борис абдеж унафэ щищIащ, артистыр и щIыналъэ зэрихьэжу, «УФ-м щIыхь зиIэ и артист» цIэр фIащыну…
«Гъуазджэм и лIэужьыгъуэ нэхъ гугъухэм ящыщщ оперэр. Хъупсырджэн Альберт а къалэным йохъулIэри, псалъэм я нэхъ гуапэр абы хуэфащэщ. Ар ящыщщ лъэпкъыр щIэгушхуэн цIыху пажэхэм, абы къыхэкIыуи и цIэм дропагэ», - жеIэ КъБР-м щIыхь зиIэ и артист Зеущэ Iэуес.
