Абазэм я дзыхь ирагъэз

КъБР-м и Парламентым и депутат Абазэ Албэч республикэм и хабзэубзыху орган нэхъыщхьэм къыбгъэдэкIыу УФ-м и Федеральнэ Зэхуэсым и Къэрал Думэм епха ЩIалэгъуалэ парламентым хагъэхьэным иджыблагъэ арэзы техъуащ.
КъБР-м и Парламентым ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым и унафэщI Емуз Нинэ зэрыжиIэмкIэ, ЩIалэгъуалэ палатэм теухуа Положенэм игъуэта зэхъуэкIыныгъэхэм япкъ иткIэ, абы хагъэхьэнухэр мы зэманым къыхах къэралым и щIыналъэхэм я хабзэубзыху орган нэхъыщхьэхэм я депутатхэм. ЩIалэгъуалэ парламентым политик ныбжьыщIэхэр хэтмэ, абы и лэжьыгъэр нэхъ купщIафIэ хъуну къалъытэ. КъищынэмыщIауэ, абы хэхуэну Iэмал нэхъыбэ зиIэнухэм ящыщщ дзэм къулыкъу щызыщIахэмрэ Украинэм къулыкъу щезыхьэкIахэмрэ. 
Апхуэдэу комитетым и дзыхь зригъэза Абазэ Албэч юрист щIэныгъэ нэхъыщхьэ иIэщ, лэжьыгъэ IэнатIэм илъэс15-м щIигъуауэ пэрытщ. КъБР-м и Парламентым и ЩIалэгъуалэ палатэм и 4-нэ, 5-нэ, 6-нэ зэхуэсыгъуэхэм хэтащ. 2015 гъэ лъандэрэ ар «Урысей зэкъуэт» партым и «ЩIалэгъуэ гвардие»-м и щIыналъэ штабым и унафэщIщ, апхуэдэуи 2018 - 2022 гъэхэм «ЩIалэгъуэ гвардием» и Iуэхухэр КИФЩI-м щызэщIигъэуIуэу лэжьащ.
КъищынэмыщIауэ, Албэч хьэрычэт Iуэхуми хэтщ. Коронавирусым зыщиубгъуа зэманым щыгъуэ абы и жэрдэмкIэ дэIэпыкъуэгъу яхуэхъуащ Налшык къалэм дэт клиникэ сымаджэщ №1-мрэ узыфэр нэхъыбэу зэран зыхуэхъункIэ хъуну къалъытэ цIыхухэмрэ. Мы зэманми ар жыджэру хэтщ Украинэм къулыкъу щызыщIэхэм защIэгъэкъуэнымкIэ республикэм къыщызэрагъэпэщ Iуэхухэм.