Изабеллэ лыпцIэ къызэрищэхуар

Актрисэ цIэрыIуэ Раневская Фаинэ и шыпхъу Изабеллэ илъэс куэдкIэ Париж щыпсэуауэ, Совет Союзым къигъэзэжат. Арыххэуи бостей дахэрэ капрон лъэпэдрэ къызыщитIагъэщ, шылэ бэлътор и дамащхьэм триубгъуэщ, Iэлъэ зыIэритIагъэщ, пыIэ дахэр зыщхьэригъэсщ, «Шанель №5» дыхур зытриутхэри, и шыпхъум жриIащ:

- Фаинэ, си псэ! Сэ лы щапIэм сокIуэ, лыпцIэ Iыхьэ къэсщэхунщи, пщыхьэщхьэшхэр згъэхьэзырынщ.

- Хуейкъым! - къыщылъэтащ Фаинэ.

Къэралым ерыскъыр щызэпэубыдат, зыгуэр къэпщэхун папщIэ уи чэзур къэсыху уежьэу сыхьэт бжыгъэкIэ очрэм ухэтын хуейт, Париж сытри щигъуэту еса и шыпхъум ар зэремызэгъынури фIы дыдэу къыгурыIуэрт Фаинэ.

- Хуейкъым! Сэ езым къэсщэхунщ!

- Фаинэ, си псэ! ЛыпцIэр куэдым къахухэхыркъым. Ауэ сэ а Iуэхум фIы дыдэу хызощIыкI, умыгузавэ! - жиIэри, Изабеллэ бжэмкIэ иунэтIащ.

- АтIэ, уи гъусэу сынэкIуэнщ, - жиIэу, Фаинэ зыщиIэтым, ари шыпхъу гъэфIам идакъым.

- Лы килограмм ныкъуэм цIыхуитI щIыкIэлъыкIуэн щыIэкъым…

- А лы щапIэ жыхуэпIэр дэнэкIэ гъэзами пщIэркъым уэ! - идэртэкъым Фаинэ.

- Лы щапIэр къысхуэмыгъуэтын уи гугъэу ара? - гуакIуэу пыгуфIыкIри, Изабеллэ зигъэбзэхащ.

Я псэупIэм зы хьэблэкIэ нэхъ пэмыжыжьэу лы щапIэ къигъуэтащ бзылъхугъэм. Абы къэпщIэнтIэжауэ щIэт лIым къупщхьэлъапщхьэр зэхикъутэурэ тэрэзэм тридзэрт, «лыкIэ» еджэу. Ахъшэр Iызых цIыхубз щхьэ бацэр щхьэгъубжэ цIыкIумкIэ къикIиикIыу, кассэм ист, хуабэм игъэмэхарэ къытехьауэ.

Изабеллэ бгъунжырыкIуэ зищIщ, очрэм пхрыкIри, цIыхухъум зыбгъуригъэхуащ:

- Уи махуэ фIыуэ, месье! Сыт ухуэдэ?

Очрэм хэтхэр зэуэ щым зэрыгъэхъури, бзылъхугъэ телъыджэм къыхуеплъэкIащ, лыр зыгуэш щIалэжьри Iэнкуну иувыкIащ. Изабеллэ пещэ:

- ЖейкIэ урикъурэ, месье? ЖэщкIэ умыжеифмэ, ущыгъуэлъыжкIэ шагъыр лошкIэшхуитI еIуб… Уи сабийхэр сыт хуэдэ, месье? Уахуэгубжьрэ, уи Iэр яхуэпIэтрэ? Сабийхэм я гур ибуд хъунукъым апхуэдэ щIыкIэкIэ, абы фIы къишэркъым… Уарэзы абыкIэ, месье?

- НтIэ! - и щхьэр ищIри, жэуап итащ лIым.

- Шэч лъэпкъ къытесхьэркъым! Си егъэджакIуэу щытам урещхьщ уэ, узэрыгубзыгъэр уи нэгум кърех!

ЩIалэжьым и нэгум кърих дыдэр къыгурымыIуэу, и напэм къекIуа пщIэнтIэпсыр ирилъэщIэкIащ Iэ фIеймкIэ.

- Месье, - къызыкIэлъыкIуамкIэ къигъэзэжащ Изабеллэ. - Сэ лыпцIэ килограмм ныкъуэ сыхуейт. УиIэу согугъэ!

- НтIэ, - и щхьэр ищIри, щIалэр лы хъумапIэм щIэлъэдащ.

Куэдрэ къэтащ ар, Iэщыр иукIауэ зэIих нэхъей. ИкIэм-икIэжым, тхылъымпIэ гъуабжэм лыпцIэ IыхьэфI кIуэцIылъу къигъэзэжащ. Езым и щхьэ щхьэкIэ игъэтIылъахэм щыщ хъунт ар!

- Упсэу! Сэ гъубж, мэрем къэс сыкъэкIуэнущ лыпцIэ щхьэкIэ, сыхьэт 16-м ирихьэлIэу. Ухуэхъуну?

- НтIэ, - ещанэу жиIащ лIым.

Лым и уасэр итыну кассэм щыIухьэм, абы дэс хъыджэбз сырыхушхуэми жриIэн къигъуэтащ Фаинэ и шыпхъу гуакIуэм:

- Уи щхьэц плъыфэр Париж къыщекIуэкI модэм къозэгъ, дахэ! Ауэ, къэбутIыпщмэ нэхъыфIщ, уи дамащхьэм тепхъауэ телъу. Абы уи нэгуфIэр нэхъри нэхутхьэху щIэхъукIынущ.

А псалъэхэр кассирым и гуапэ хъуати, гухэхъуэу пыгуфIыкIащ.

Изабеллэ унэм къэсыжу лыр тхылъымпIэм къыщыкIуэцIихым, Фаинэ къэуIэбжьащ. Апхуэдэ лы дахэ Iэджэ щIауэ илъэгъуатэкъым абы.

- ЛыпцIэ къызэрыхах пщIэн хуейщ! - зыхуэарэзыжу пыгуфIыкIащ Изабеллэ.

Абдеж щыщIэдзауэ, зы гъубжрэ мэремрэ къэмынэу, Изабеллэ лы щIапIэм кIуащ. И хьэщIэ лъапIэр къызэрилъагъуу, щIалэм тыкуэныр зэхуищIырт, шэнт екIу къыхуигъэувырти, сыхьэт бжыгъэкIэ щIэдэIурт бзылъхугъэм къиIуэтэж париж хъыбархэм...