Театрыр цIыху гъащIэм и гъуджэщ

- Театрым и утыку зэ уихьамэ, абы укъиутIыпщыжыркъым, псэкIэ упыщIа мэхъу. Москва дыщыщыIа илъэсхэм зэман куэд щыдгъэкIуащ Вахтанговым и цIэр зезыхьэ театрым. Абы лъагъуныгъэшхуэ хуэсщIащ, - жеIэ актрисэм.

Киномрэ театрымрэ щызэригъапщэкIэ, Заирэ а тIур куэдкIэ зэрызэщхьэщыкIыр къыхегъэщ. 

- Ди гупым щыщ зыбжанэм Iэмал яIащ фильмым хэтыну, абыхэм нэхъ жаIэфыну къыщIэкIынщ театрымрэ киномрэ ущылэжьэныр зищIысыр. Ауэ Къэбэрдей-Балъкъэрым дыкъэкIуэжа нэужь, ди телецентрым и зы лэжьыгъэ дыхагъэхьати, пэжыр жыпIэмэ, гугъу дехьащ, - къыхегъэщ МафIэдзым. - Кином деж щыщIэныгъэ цIыкIу пIэщIэкIами, зы щIыпIэ деж щебгъэлеями псори щыболъагъу. Театрыр аракъым. Абы и утыкум укъихьэхукIэ, бгъэзащIэ ролыр пхуегъэфIэкIуэнущ. Кином узыхуэарэзыж-узыхуэмыарэзыжым емылъытауэ, а зыкъызэрыщыбгъэлъэгъуам хуэдэу къэнэнущ». Ди егъэджакIуэу щыта Сазоновэ Галини чэнджэщэгъуу сиIа Къэжэр Бориси къызжаIауэ щыта Iущыгъэ гуэрхэр си гум къинащ. ЖаIарат: «Театрым ухэтын папщIэ, уи хьэлри Iэпкълъэпкъри абы хуэбгъэпсын хуейщ». Шэч хэмылъу, а псалъэхэр сыт щыгъуи сэбэп къысхуохъу. Актерым утыкум иту гъащIэ Iэджэ зэхуэмыдэу къепсэуф, цIыхум и фэм дигъэхуэфыр, хьэл зэмылIэужьыгъуэхэр богъэунэху. ЗымащIэкIэ а псом дазэрылъэIэсыфыр ди насып кърихьэкIауэ къысщохъу.

Актёр къэс нэхъыфIу къехъулIэ жанр яIэжщ. ДгъэщIэгъуакъым ди псэлъэгъу актрисэм драмэр нэхъ пэгъунэгъуу зэрыжиIар - театрым и лэжьакIуэ куэдым абы нэхъ трагъащIэ. МафIэдз Заирэ мы зэманым роль нэхъыщхьэр щегъэзащIэ Шэрджэс Мухьэмэд игъэува «Дахэнагъуэ» драмэм. Ар хэтщ «Пшэплъ даущыншэхэр» спектаклым (Понаровский Антон игъэуващ, Бричкинэ Лизэ и ролыр щегъэзащIэ), Дэбагъуэ Роман и «Странная миссис Сэвидж» лэжьыгъэм (Флоренс и гъащIэр къыщегъэлъагъуэ), Вьюшин Родион и «Ревизор» спектаклым (Марья Антоновэ ейр). Дубровская Аннэ зи режиссёр «Таланты и поклонники» лэжьыгъэм МафIэдзым Смельскэм и ролыр къыщыхуагъэфэщащ. Абы и Iэзагъэр щынэрылъагъущ Любимцев Павел и «Ханума», Фырэ Руслан и «ХьэжьэIужьэ», Дэбагъуэ Роман и «ЦIыхухъур, цIыхубзыр, хьэдэ мыцIыхур» спектаклхэми. 

- ГушыIэ, драмэ ролхэм узэрелэжьыр зэи зэхуэдэкъым. Драмэм хьэзыр ухуэхъуным зэман нэхъыбэ текIуадэми, сэ сызэреплъымкIэ, гушыIэ спектаклыр къохъулIэныр сыт щыгъуи нэхъ гугъущ, - жеIэ МафIэдзым. - ГушыIэм и гъунапкъэр пщIэуэ щытын хуейщ, пэшым щIэсыр зэ пхуэгъэдыхьэшхрэ ар уи фIэщ хъужмэ, занщIэу ебгъэлеиныр хэлъщ. Театр институтым къыщыддэлэжьа режиссёр, актёр цIэрыIуэ Любимцев Павел «Ханума» спектаклыр къыщыддигъэувым, Ханума и ролыр къызитауэ щытащ. Абы щыгъуэм сигъэIущащ: «БгъэзащIэ ролыр уипкъми уи псэми пхыгъэкI, абы и гъащIэр ууейм хуэдэу къызыщыгъэхъу», - жиIэри. 

Къэбэрдей театрым югослав драматург Нушич Бранислав и «Доктор философии» пьесэм къыщытращIыкIа «Диплом» спектаклым Заирэ Сойкэ и ролыр щигъэзэщIащ. «Ар апхуэдэу лэжьыгъэшхуэтэкъым, ауэ ролыр щыцIыкIум и деж утыкум укъихьэу цIыхум я гум укъинэжын щхьэкIэ, уегугъун хуейщ. Уеблэмэ роль нэхъыщхьэ зыIыгъхэм нэхърэ нэхъыбэж пхуэщIэн хуейщ», - жеIэ абы. 

Актрисэр щIохъуэпс Къэбэрдей театрым IутIыж Борис и «Тыргъэтауэ» пьесэр щагъэувыжыну. Дехьэх Медея, Филумена Мартуранэ я ролхэм хуэди игъэзэщIэну. 

- Сэ нэхъыбэу лIыхъужьыгъэ зыхэлъ, сыт хуэдэ къаруми пэщIэтыф, дунейр «зэрагъэдзэкIыну» зыхузэфIэкI цIыхубзхэм я ролхэр нэхъ си гум дохьэ. Джульеттэ е Дездемонэ хуэдэхэм сапэжыжьэщ. Зи гугъу сщIыр романтикэ теплъэ зиIэхэм си хьэлкIи цIыху щIыкIэкIи сатемыхуэу къызэрыслъытэрщ. Ролым псэкIэ упэжыжьэмэ, абы уеныкъуэкъукIэ къикI щыIэкъым, цIыхухэм я фIэщ зыпхуэщIынукъым. Ауэ псори зэлъытыжар режиссёрырщ, абы спектаклыр зэрилъагъумрэ зэригъэувымрэщ, - жеIэ Заирэ.