Санкцэхэм щхьэкIэКитайм зыхъумэжыныгъэмкIэ и министрым идакъым США-м и апхуэдэ къулыкъущIапIэм и пашэм хуэзэн. Псори къызыхэкIар Урысейм и С-400 комплексыр Китайм ищэхуныр къулыкъущIэм диIыгъауэ зэрыщытарщ. Су-35 кхъухьлъатэмрэ С-400 зэрызахъумэж Iэмэпсымэмрэ илъэситху и пэкIэ Китайм къызэрищэхуам папщIэ санкцэ зытралъхьауэ щыта Шанфу Ли а къэралым зыхъумэжыныгъэмкIэ и министру ягъэуващ. Абы къыхуэзэну хуейщ Пентагоным и лIыщхьэр, ауэ Пекин Вашингтон хуигъэуващ тралъхьа санкцэр трихыжыну. КъэралитIым зыхъумэжыныгъэмкIэ я министрхэр шынагъуэншагъэм ехьэлIауэ Сингапур щекIуэкIыну саммитми щызэIущIэну фIэщщIыгъуейщ. США-м зэрыжиIэмкIэ, министрым хуэгъэза къуэдыр трамыхыжми, Остинрэ Лирэ зэхуэзэным ар зыкIи зэран хуэхъуркъым. Китайм и унафэщIхэм апхуэдэ бгъэдыхьэкIэр ядэркъым, ауэ Америкэми санкцэхэр трихыжын Iуэхуи зэрихуэркъым. Шанфу Ли зыхъумэжыныгъэмкIэ министр зэрыхъурэ мазитI дэкIами аращ. Ар нэхъапэм космодромым и унафэщIу щытащ. 2017 - 2022 гъэхэм Китайм и дзэ совет нэхъыщхьэм и департаментым и унафэщIу лэжьащ. Пентагоным зэрыщыжаIамкIэ, щэкIуэгъуэ мазэ лъандэрэ Китайм щыщ я лэжьэгъухэм пыщIэныгъэ хуаIэкъым. Абы и щхьэусыгъуэр Тайваным США-м щилэжьхэмрэ китай аэростатыр Америкэм къызэрыриудыхамрэщ. Апхуэдэуи, Китайм и унафэщI Цзиньпин Си США-м и президент Байден Джо епсэлъылIэну пIащIэркъым. КъэралитIым я зэхуакум дэлъ хъуа апхуэдэ зэхущытыкIэм узыхуишэнур IупщIкъым, жаIэ Америкэм и журналистхэм, ауэ псори зи зэраныжыр езыхэрщ.
Поделиться:
Читать также:
07.05.2024 - 11:21 →
Къэбэрдей-Балъкъэр Республикэм и Iэтащхьэм и Указ
03.05.2024 - 13:00 →
ЗэгурыIуэнукъым
27.04.2024 - 15:09 →
«Репатриант»-кIэ узэджэ хъунур хэт?
27.04.2024 - 09:58 →
Урысейм и парламентаризмэм и махуэм теухуа КъБР-м и Iэтащхьэ КIуэкIуэ Казбек и хъуэхъу
25.04.2024 - 12:00 →
Къэбэрдей-Балъкъэр Республикэм и Правительствэм и Унафэ
|