Зэрамыхьэж Iэщэт

Къэбэрдей-Балъкъэрым щыIэ МВД-м и ЦПЭ-м и лэжьакIуэхэм КъБР-м щыIэ Урысей гвардием и управленэм и «Эльбрус» СОБР-м хэтхэр ящIыгъуу налшыкдэсым и Iэщэр къытрахащ.
Налшык Лениным и проспектымрэ Лъостэным и цIэр зезыхьэ уэрамымрэ я зэхэкIыпIэм хуэзэу полицэм и лэжьакIуэхэм къыщагъэувыIащ «Лада Грант» автомашинэр. Аруан районым щыщ, илъэс 28-рэ хъу, ипэкIи суд зытращIыхьауэ щыта цIыхухъум абдежым къыщыкъуахащ ших зэрылъ икIи и теплъэкIи адрейхэм къащхьэщыкI Iэщэр.
ИрагъэкIуэкIа къэпщытэныгъэхэм къызэрагъэлъэгъуамкIэ, ар 1930 гъэхэм зэрахьа «Коровина» кIэрахъуэ лIэужьыгъуэрт. А зэманым заводым къыщыщIагъэкIа Iэщэр иджыпстуи къэбгъэсэбэп хъуну апхуэдэ щытыкIэм итт.
Налшык щыIэ УМВД-м дознаниемкIэ и къудамэм Iуэху къиIэтащ, Урысей Федерацэм и Уголовнэ кодексым и 222-нэ статьям и 1-нэ Iыхьэм (IэщэхэкIхэр къэщэхун, хъумэн) ипкъ иту. А статьям къызэрыщыгъэлъэгъуамкIэ, ягъэкъуаншэм къытралъхьэнкIэ хъунущ илъэси 3-м къыщыщIэдзауэ илъэси 5-м нэскIэ тутнакъэщым щаIыгъыну.

НыбжьыщIэхэм яIущIащ

КъБР-м щыIэ МВД-м и Дзэлыкъуэ щIыналъэ къудамэм и лэжьакIуэхэм класс нэхъыжьхэм щIэсхэм драгъэкIуэкIащ гъуэгухэм шынагъуэншэу щызекIуэным теухуа дерсхэр. 
«Транспортыр зегъэкIуэнымкIэ хуитыныгъэ къезыт дэфтэрыр ямыIэу рулым дэтIысхьэхэр, сабий-пассажир» фIэщыгъэм щIэту хабзэхъумэхэм ирагъэкIуэкI республикэпсо лэжьыгъэм хиубыдэу районым и автоинспекторхэм Сэрмакъ къуажэм дэт курыт школ №№1-3-хэм я класс нэхъыжьхэм щIэсхэм зэIущIэ драгъэкIуэкIащ гъуэгухэм къыщыхъу фэбжьхэр, насыпыншагъэхэр къызыхэкI щхьэусыгъуэхэмрэ абыхэм зэрызыщахъумэну Iэмалхэмрэ теухуа псалъэмакъ.
Абыхэм къадэкIуэу, ныбжьыщIэхэр щагъэгъуэзащ иджыпсту дэнэкIи узыщрихьэлIэ скутерхэр, лъакъуэрыгъажэхэр зэрызебгъэкIуэнумрэ абыхэмкIэ къыщыбжыхьыну щIыпIэхэмрэ ятеухуауэ щыIэ хабзэхэм. Апхуэдэу еджакIуэхэм иджыри зэ ягу къагъэкIыжащ, зи ныбжьыр илъэс16 иримыкъуахэм абыхэмкIэ транспорт гъуэгум къыщажыхьыну зэрыхуимытыр.
Автоинспекторхэр апхуэдэу тепсэлъыхьащ транспортыр зезыхуэхэм ябгъэдэлъын хуей щIэныгъэм, гулъытэм, сакъыныгъэм. 
ЗэIущIэм хэтахэр ирагъэплъащ гъуэгухэм къыщыхъу фэбжьхэм теухуа видеороликхэм, иужькIэ абыхэм хуагуэшащ гъуэгум шынагъуэншэу щызекIуэным теухуауэ ящIапхъэ псори зэрыт тхылъ цIыкIухэри.
 

Хьэгъэщагъэ зылэжьар жэуапым ирашалIэ 

Къэбэрдей-Балъкъэрым щыIэ МВД-м Экономикэ шынагъуэншагъэмрэ Iулъхьэм пэщIэтынымкIэ и управленэм и лэжьакIуэхэм ирагъэкIуэкIа оперативнэ къэлъыхъуэныгъэхэм япкъ иту къыщIагъэщащ къэрал мылъкуу сом зы мелуаным щIигъу зыIэрызыгъэхьа, илъэс 63-рэ хъу, щIэныгъэ гуэдзэ щрат IуэхущIапIэхэм ящыщ зым и унафэщI цIыхубзым илэжьа гъэпцIагъэр. 
Хабзэхъумэхэм къызэрахутамкIэ, 2021 гъэм и щIышылэ мазэм зи гугъу тщIа IуэхущIапIэм и генеральнэ директор къулыкъур зезыхьэм игъэхьэзыращ я гъэсэн 74-м Iуэхутхьэбзэ зэмылIэужьыгъуэхэр зэрыхуащIам щыхьэт техъуэ тхылъымпIэ нэпцI икIи абы ипкъ иткIэ сом мелуани 2,3-рэ къыхуаутIыпщащ.
Хабзэхъумэхэм апхуэдэу сэтей къащIащ тхылъымпIэм къыщыгъэлъэгъуа сабийхэм ящыщу 38-р а центрым зэи зэремыкIуэлIамрэ зэрадэмыIэпыкъуамрэ. Апхуэдэ щIыкIэм тету сом зы мелуаным щIигъур ягъэкъуаншэм зыIэригъэхьащ.
Хабзэр къызэпызыудам ехьэлIа уголовнэ Iуэху къаIэтащ икIи УФ-м и Уголовнэ кодексым и 159-нэ статьям и 4-нэ Iыхьэм (гъапцIагъэкIэ мылъку зыIэрыгъэхьэн) ипкъ иткIэ жэуап ирагъэхьынущ.

Этил спирту тонн 40

Къэбэрдей-Балъкъэрым щыIэ МВД-м езым и шынагъуэншагъэмкIэ IэнатIэмрэ КъБР-м щыIэ МВД-м и Тэрч щIыналъэ къудамэмрэ я лэжьакIуэхэм ирагъэкIуэкIа оперативнэ къэлъыхъуэныгъэхэм япкъ иту яубыдащ этил спирт куэд зэрыт цистернэр зыпыщIа автомобилыр.
Ипэ иту къаIэрыхьа хъыбарым тету Прохладнэ - Елъхъуэт гъуэгум и 39-нэ километрыр щиухым деж къыщагъэувыIащ Нартан къуажэм щыщ, илъэс 59-рэ зи ныбжь цIыхухъур зэрыс хьэлъэзешэ машинэр къыщащым, хабзэхъумэхэм къагъуэтащ псым ещхь изу зэрыт гъэпщкIупIэ щэхур. Транспортыр зейм иIыгътэкъым ар зищIысыр къыщыгъэлъэгъуа икIи къришэкIыну зэрыхуитым щыхьэт техъуэ тхылъымпIэхэр. Ягъэкъуаншэм зэрыжиIамкIэ, ар гъунэгъу щIыналъэхэм язым къыщыIэрыхьащ, зейхэри ицIыхуркъым.
КIэщIкIэ ирагъэкIуэкIа къэхутэныгъэхэм къызэрагъэлъэгъуамкIэ, цистернэм итт ГОСТ-м тету ягъэхьэзыра, сом мелуани 2,6-рэ и уасэ спирт.
Полицэм и щIыналъэ къудамэм хабзэр къызэпызыудам ехьэлIауэ уголовнэ Iуэху къиIэтащ, УФ-м и Уголовнэ кодексым и 171.3 статьям и 2-нэ «б» Iыхьэм ипкъ иту.