IэщIагъэ гуапэ

Нэхущ Светланэ «Дельфин-Нальчик» сабий зегъэужьыпIэм и логопедщ. Абы иIэщ психолог, дефектолог IэщIагъэхэри. Къапщтэмэ, а IэщIагъэхэр зэпхауэ къызэдогъуэгурыкIуэ. Езым зэрыжиIэмкIэ, зыр адрейм сэбэп щохъу. Светланэ щыцIыкIум щIэхъуэпсу щытащ психолог хъуну. «Къапщтэмэ, а хъуапсапIэм сылъэIэсащ, уеблэмэ нэхъыби къызэхъулIащ. Сызэрылажьэ IэщIагъэр психологием пэгъунэгъу дыдэщ, и лъабжьэр арауэ жыпIэ хъунущ. Нэхъыщхьэращи, иджыпсту къызэхъулIахэмкIэ сыарэзыщ, сынасыпыфIэщ», - жи.

2008 гъэм Иджырей гуманитар академиер (СГА) психологыу къиухащ. 20I7 гъэм - логопед, 2019-м - дефектолог IэщIагъэхэри зэригъэгъуэтащ. «Сэ психологиемкIэ къызэрыщIэздзар сэбэп къысхуэхъуауэ къызолъытэ. Абы Iэмал къует адэкIэ сыт хуэдэ лъэныкъуэкIэ уи щIэныгъэм зебгъэужьынуми нэхъ тыншу зэхэбгъэкIыну. Психологыу еджэн щыщIэздзам къызгурыIуат сабийм зегъэужьыным си щIэныгъэр еспхыну сызэрыхуейр», - жеIэ езым. Психолог IэщIагъэм ирилэжьэну къыхуихуакъым, унагъуэ хъууэ, къалэнхэр и куэд зэрыхъуам къыхэкIыу. И бынхэр къыдэкIуэтея нэужь, щIэныгъэ щыхагъахъуэ центрым етIуанэ IэщIагъэу логопедием щыхуеджащ.

«Сабийхэм гугъу зарызыдезгъэхьым мыхьэнэ зэриIэр, абыхэм зэрызаужьыр щыслъагъукIэ, езы цIыкIухэми адэ-анэхэми ар фIыщIэ щащIкIэ, си гур хохъуэ. Аращ си IэщIагъэм къыхэсх гукъыдэжыр къыздикIыр», - жеIэ Нэхущым и IэщIагъэм тепсэлъыхьу. Абы и дежкIэ нэхъ гугъур сэбэп узыхуэмыхъуфыну сабий къыщыхуашэрщ.

Сабийхэм я бзэр къегъэутIыпщыным зи IэщIагъэр епха бзылъхугъэм жиIащ ди зэманым цIыкIухэм я зыужьыныгъэмрэ узыншагъэмрэ теухуауэ телефонхэмрэ гаджетхэмрэ зэран зэрыхъур, къыпхуэмыIуэтэным хуэдизу: «Сабийм дэлажьэ сыт хуэдэ дохутырми еупщIи, жиIэнщ ар телефоным дебгъэхьэх зэрымыхъунур, адэ-анэ куэдым я бынхэр зэпымыууэ зрагъэплъ видеохэм, таурыхъ цIыкIухэм я хъым сабийм и гупсысэ зэрымыубыдар зэрихуэр. Сэ си IэщIагъэр сабийм и бзэм епхащи, адэ-анэхэм яжызоIэ гаджетхэм узыхуашэнкIэ хъуну гугъуехьхэр. Псом хуэмыдэу ар яхуэгъэзащ нэхъ цIыкIу дыдэхэм, сыту жыпIэмэ, абыхэм я псэр махэщ. Сабийм и гупсысэр а техникэм къыIэщIэхын хуейщ - ар зыхуэныкъуэр хуабагъэрэ гулъытэрэщ», -жеIэ.

И мурадхэм я гугъу щищIым, къыхигъэщащ и IэщIагъэми щIэныгъэми хигъэхъуэну и ужь зэритыр, зыдэлажьэ сабийхэм ифI яригъэкIыну, нэхъыбэм сэбэп яхуэхъуну хуейщи.