ТхъуцIынэ нэпцIхэм фахуэсакъ

«Кавказ Ищхъэрэ МВЛ» IуэхущIапIэм къет

ТхъуцIынэр дэтхэнэ зы унагъуэми махуэ къэс жыхуаIэм хуэдэу къыщащтэ ерыскъыхэкIщ икIи сыт щыгъуи кIэлъыплъын хуейщ абы и фIагъымрэ ар къыщыщIагъэкIа пIалъэмрэ.

«Кавказ Ищхъэрэм и щIыналъэпсо ветлабораторэ» къэрал IуэхущIапIэм химие-токсикологиемкIэ и къудамэм дызэрыщигъэгъуэзамкIэ, «Масло сливочное» жиIэу зытет зэкIуэцIылъу щы къаIэрыхьащ. IэщIагъэлIхэм ар хэнейрэ къапщытащ икIи къыщIагъэщащ стерин пкъыгъуэу, гъэшхэкIрэ дагъэу абы хэлъыр зекIуэ мардэхэм къазэрыщхьэщыкIыр.

ТхъуцIынэр къыщыфщэхукIэ Iэмал имыIэу феплъ: и пIалъэр зы мазэщ, ар кIуэцIылъын хуейщ абы хуащIа, бдзэху тхылъымпIэпсым. ТхылъымпIэ къызэрыгуэкIхэм кIуэцIалъхьэр спредхэмрэ къэкIыгъэ пкъыгъуэхэр зыхалъхьэ дагъэмрэщ.

ТхъуцIынэ къабзэм хэлъын хуейр шатэпсщ, шэкъым икIи шэхэкIкъым. Ар зыкIуэцIылъ тхылъымпIэм тетын хуейщ «СТР» хьэрфищыр, мардэхэм зэрытемыкIар къигъэлъагъуэу. Ауэ а псоми къащхьэщыкIыу, «заменитель молочных жиров» жиIэу тетхамэ, ар маргаринщ.