КъБР-м щыIэ МВД-м къет

Iуэхум хилъхьа мылъкур бзэхащ

Налшык щыIэ УМВД-м и лэжьакIуэхэм закъыхуигъэзащ илъэс 22-рэ хъу къалэдэсым - ар къагъэпцIащ сом 207000-кIэ.

ЩIалэм и цIыхугъэхэм ящыщ зым чэнджэщ къритащ хьэщIэщхэм рекламэхэр яхуэщIынымкIэ сайт щхьэхуэ къызэзыгъэпэщахэм мылъкукIэ (инвестицэ) уагуэувэмэ, фейдэ хъарзынэ къыпхуищIу уазэрыдэлэжьэфынум теухуауэ.

ИнтернетымкIэ къигъуэта апхуэдэ IуэхущIапIэхэм ящыщ зым щIалэр ядэлэжьэну ягурыIуащ. Абы теухуауэ къепсэлъылIа хъыджэбзым и пщэ кърилъхьащ, бронкIэ пэшхэр къищтэурэ, абыкIэ хьэщIэщ щхьэхуэхэм я пщIэмрэ яIэ щIэупщIэмрэ Iэтыным телэжьэну. Хъыджэбзым щIалэм и цIэкIэ «виртуальнэ кошелёк»-кIэ зэджэ ахъшэ гъэтIылъыпIэ къыхузэIуихащ, зыпэрыхьа Iуэхум къыхих фейдэр зыхуэдизым езыр тыншу абы щыкIэлъыплъ зэрыхъунумкIэ шэсыпIэ къыдихьэри.

Къыхуагъэува мардэхэм тету щIалэр лажьэурэ, цIыхубз мыцIыхум и жыIэкIэ, банкым и картэ къыхуагъэлъэгъуам ирилъхьащ сом 207000-рэ.

КъыкIэлъыкIуэ махуэм «бохъшэ нэпцIым» ирилъхьа ахъшэр езым и банк картэм къигъэкIуэжыну хуежьащ щIалэр, арщхьэкIэ зыри къикIакъым, цIыхубзми зыкъригъэгъуэтыжакъым - къызэрагъэпцIар наIуэт.

Налшык щыIэ УМВД-м Iуэху къиIэтащ, гъэпцIакIуэр къагъуэту, жэуапым ешэлIэн зэрыхуейм теухуауэ.

Сабийхэм я шынагъуэншагъэр япэ ирагъэщ

Шэрэдж щIыналъэм щыIэ РОВД-м и къэрал автоинспекцэм, абы и жылагъуэ советым, хабзэхъумэхэм зэгъусэу ирагъэкIуэкIащ «Сабийр пассажир нэхъыщхьэщ» зыфIаща акцэр.

Автоинспекторхэм, зи гугъу тщIа къудамэхэм я лIыкIуэхэу Аббасов Рамеш, Анахаевэ Аидэ сымэ къызэрагъэпэща Iуэхум хэтхэр Къэщкъэтау дэт курыт еджапIэм и гупэкIэ щызэхуэсри, транспорт зезыгъакIуэхэм зыхуагъэзащ, сабийхэм папщIэ шэнтжьейхэр къагъэсэбэпын зэрыхуейм теухуауэ.

- Илъэси 7 иримыкъуахэр шэнтжьейм ису къешэкIын хуейщ икIи ахэр къыхэхыпхъэщ сабийхэм я инагъымрэ я хьэлъагъымрэ тещIыхьауэ. А ныбжьым щIигъуа нэужь, къэвгъэсэбэп хъунущ бустерхэмрэ бгырыпххэмрэ, - жаIащ къызэгъэпэщакIуэхэм.

Полицэм и лэжьакIуэхэм транспорт зезыгъакIуэхэм къыхуахьащ, сабийхэр гъуэгум шынагъуэншэу къыщешэкIыным ехьэлIа мардэхэм ебэкъуэныр езыхэмкIи сабийхэмкIи лъэужьыншэ зэрымыхъум и щапхъэ куэд. Урысей Федерацэм и КоАП-м и 12.23 статьям и 3-нэ Iыхьэм ипкъ иту хабзэр зымыгъэзащIэхэм сом мини 3-кIэ етхьэкъунущ.

ЗэIущIэр щиухым, транспорт зезыгъакIуэхэм хуагуэшащ сабийхэр гъуэгу фэбжьхэм щызыхъумэ Iэмэпсымэхэм ятеухуа чэнджэщхэр зэрыт тхылъ цIыкIухэр.

Апхуэдэ Iуэху щхьэпэ щызэхэтащ Налшык къалэм дэт курыт школ №20-ми. Иджыблагъэ абы щекIуэкIащ гъэмахуэ зыгъэпсэхугъуэхэм къриубыдэу гъуэгухэм шынагъуэншэу щызекIуэнымрэ гъуэгу фэбжь зыгъуэтахэм япэ дэIэпыкъуныгъэ етынымрэ хуэгъэпса акцэ убгъуа.

Абы хэтащ Къэбэрдей-Балъкъэрым щыIэ МВД-м и къэрал автоинспекцэм и управленэм, Налшык щыIэ УМВД-м и ОГИБДД-м, мафIэсым пэщIэтынымкIэ щIэныгъэ гуэдзэ щрат икIи щагъэхьэзыр центрым я лэжьакIуэхэр.

Инспекторхэм сабийхэмрэ ныбжьыщIэхэмрэ драгъэкIуэкIащ лъэсырызекIуэхэр, лъакъуэрыгъажэхэмрэ роликхэмкIэ къэзыжыхьхэр гъуэгухэм шынагъуэншэу зэрызэпрыкIынумрэ абыхэм къыщажыхьыну щIыпIэхэмрэ теухуа псалъэмакъ щхьэпэ.

КъБР-м мафIэсым пэщIэтынымкIэ и центрым и егъэджакIуэ Аброкъуэ Мадинэ акцэм хэтхэм ядригъэкIуэкIащ гъуэгум фэбжь щызыгъуэтахэм япэ дэIэпыкъуэгъур зэрептынум теухуа дерсхэр: абы манекенымкIэ игъэлъэгъуащ гумрэ тхьэмбылымрэ я лэжьэкIэр зэрызэтраублэж, лъыр къызэрагъэувыIэ, уIэгъэхэр зэрапхэ Iэмалхэр. ЕджакIуэхэм я Iуэху еплъыкIэ гъэнщIэгъуэнхэмкIэ, упщIэхэмрэ жэуапхэмкIэ гъэнщIа дерсхэм сыткIи удахьэхыу къызэгъэпэща хъуат.

Гъуэгум шынагъуэншэу щызекIуэным ехьэлIа еджэныгъэхэри гъэщIэгъуэну екIуэкIащ. Автоинспекторхэм, егъэджакIуэхэм, мафIэс къегъэлакIуэхэм ящIыгъуу цIыкIухэр автобускIэ ирашажьэри, гъуэгум къыщыхъункIэ хъуну шынагъуэхэмрэ фэбжьхэмрэ къызыхэкI  щхьэусыгъуэхэр гурагъэIуащ, зэрызахъумэжыну Iэмалхэми щагъэгъуэзащ. Махуэ псокIэ ирагъэкIуэкIа дерсхэм хэтащ школакIуэ 720-рэ.

ЦIыхугъэншагъэ зезыхьар жэуапым ирашалIэ

Къэбэрдей-Балъкъэрым щыIэ МВД-м Уголовнэ IуэхухэмкIэ и управленэмрэ Къэрал кIуэцI IуэхухэмкIэ министерствэм и «Прохладнэ» щIыналъэ къудамэмрэ я лэжьакIуэхэм яубыдащ илъэс 36-рэ хъу, Прохладнэ къалэм щыщ, ипэкIи суд зытращIыхьа цIыхухъур. Ар ягъэкъуаншэ гъущIым къыхэщIыкIа кхъэлэгъунэхэр къызэридыгъуамкIэ.

КъызэрахутамкIэ, гъэ кIуам и мэкъуауэгъуэ мазэм къыщыщIэдзауэ шыщхьэуIум нэсыху абы зыIэригъэхьащ кхъащхьэ 26-м трагъэува гъущI пкъыгъуэ зэмылIэужьыгъуэу сом мин 30 и уасэ. Полицэм и лэжьакIуэхэм наIуэ къызэращIамкIэ, гъущIыр къыхихын папщIэ, зыми емыплъу, абы кхъащхьэхэм ятелъ плитахэр къызэригъэдзэкIащ, фэеплъ мывэхэмрэ къэухьхэмрэ къытричащ. Абы нэхъыбэу зэтрикъутар куэд лъандэрэ кIэлъыплъыншэу щыт кхъащхьэхэрщ. Апхуэдэ щIыкIэкIэ зыIэригъэхьар гъущIхэр Iызых щIыпIэхэм ярищащ. Къэпщытэныгъэхэр здекIуэкIым, ягъэкъуаншэм зигъэпщкIуащ. Къэралым къыщалъыхъуэу хуежьа нэужь, ар къыщагъуэтыжащ Аруан щIыналъэм хыхьэ Старэ Щэрэдж къуажэм. Хабзэхъумэ IэнатIэм и лэжьакIуэхэм щIэпхъаджагъэ зылэжьам теухуа Iуэху къиIэтащ, УФ-м и уголовнэ кодексым и 244-нэ статьям и 1-нэ, 158 статьям и 1-нэ Iыхьэхэм япкъ иткIэ жэуап ирагъэхьыну.

Мы зэманым ирихьэлIэу Прохладнэ къалэм щыщу цIыхуи 6-м хабзэхъумэхэм зыкъыхуагъэзащ, я Iыхьлыхэм я кхъащхьэхэм ягъуэта сэкъатышхуэхэм теухуауэ.

КъБР-м  щы1э  МВД-м  и къудамэм и лэжьак1уэхэм  къалэм щыпсэухэм зыхуагъазэ, апхуэдэ IуэхукIэ тхьэусыхафэ зиIэхэм икIэщIыпIэкIэ хъыбар кърагъэщIэну.