Мэзыкъуэ Елдар Москва ягъакIуэТэрч щIыналъэм хыхьэ Ботэщей къуажэм дэт курыт еджапIэ №2-м и 10-нэ классым щеджэ Мэзыкъуэ Елдар щытекIуащ Къэбэрдей-Балъкъэрым щрагъэкIуэкIа «Iущхэмрэ Iущыцэхэмрэ» хэгъэгу телевизионнэ зэпеуэм и гуманитар унэтIыныгъэм. Абы ипкъ иткIэ, щIалэр ягъэкIуэнущ «Iущхэмрэ Iущыцэхэмрэ» урысейпсо телезэпеуэм (Москва). Шэч хэмылъу, апхуэдэ ехъулIэныгъэ зыIэрызыгъэхьэфынур фIыуэ еджэ, куэд зыфIэгъэщIэгъуэн, жэуаплыныгъэ зыхэлъ цIыхущ. Елдар и егъэджакIуэхэм жаIэ а щIалэ жыIэщIэр ерыщу и мурадхэм зэрыхуэкIуэр, щIэныгъэ зэрызригъэгъуэтыр. Елдар зэрыцIыкIурэ фIэгъэщIэгъуэну тхыдэр едж. Дауэ фIэмыгъэщIэгъуэнынрэ? Ар щIалэ цIыкIум и лъым хэлъу къалъхуащ. Абы и адэшхуэ Мэзыкъуэ Адэлбийрэ абы ипхъу Фаинэрэ тхыдэмкIэ егъэджакIуэщ. Елдар 3-нэ классым щыщIэсым щегъэжьауэ, куэдым ягъэщIагъуэу, тхыдэр фIыуэ ищIэрти, я курыт еджапIэм «Созвездие» фIэщыгъэм щIэту иIэ щIэныгъэ зэгухьэныгъэм хагъэхьат. 5-нэ классым ар щытекIуат «Интеллект» зэпеуэм. Тэрч щIыналъэм, республикэм, хэгъэгум, къэралым тхыдэмкIэ къыщызэрагъэпэща зэпеуэ куэдым абы пашэныгъэ щиубыдащ. Я щIыналъэм щрагъэкIуэкIа «Iущхэмрэ Iущыцэхэмрэ» зэпеуэм гъэ кIуам тIэунейрэ хэтати, тIум щыгъуэми щытекIуащ. Апхуэдэурэ щIалэр республикэ зэпеуэм хуэкIуащ. Ар гъэ еджэгъуэ псокIэ екIуэкIати, абы хэтахэр Iуэхугъуэ зэмылIэужьыгъуэхэмкIэ зэпрагъэуащ. Зэпеуэхэм я унэтIыныгъэр абы хэтынухэм ипэ иту жраIэрти, езыр-езыру загъэхьэзырырт. Зэхьэзэхуэр зытеухуауэ щытар тхыдэм и закъуэкъым. Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетыр къызэрызэрагъэпэщрэ илъэс 90 зэрырикъум, Кином и дунейпсо махуэм, тхакIуэхэу Ушинский Константинрэ Островский Афанасийрэ ятеухуа упщIэхэр хэтащ абы. ЗэрыгурыIуэгъуэщи, зэпеуэр тыншу щытакъым, ауэ щIалэщIэм ар къехъулIащ. Елдар МГИМО-м щIэтIысхьэну йохъуапсэ, хабзэхъумэ Iуэхухэм и гъащIэр пищIэну и мурадщ. «Iущхэмрэ Iущыцэхэмрэ» къэралпсо зэпеуэм щытекIуэмэ, ар и хъуэпсапIэм лъэIэсауэ бжы. ЩIалэщIэм и Iуэху дахэ хъуну, и мурадхэр къехъулIэну ди гуапэщ, и хъыбарыфI дыпоплъэ! Инэрокъуэ Данэ.
Поделиться:
Читать также:
19.04.2024 - 17:44 →
ЩIэблэ къабзэ къытщIохъуэ
15.04.2024 - 14:52 →
Агуий и Iэхэлъахэм
15.04.2024 - 12:10 →
Гагарин и гуфIэкIэ
11.04.2024 - 09:30 →
УнафэщIхэмрэ IэнатIэ лъыхъуэхэмрэ зэрощIэ
10.04.2024 - 11:00 →
Дисанэ и ехъулIэныгъэ
|