РейхстагРейхстагыр - нэмыцэ парламентым и унэщ. 1894 гъэм щыщIэдзауэ 1933 гъэ пщIондэ абы щекIуэкIащ парламентым и зэIущIэхэр. 1999 гъэм ухуэныгъэм и цIэр БундестагкIэ зэрахъуэкIащ. Ар здэщыIэр Берлин и щIыпIэ нэхъ дахэхэм ящыщу къалъытэ икIи абы зыплъыхьакIуэ мелуанхэр макIуэ. Бундестагым и кIуэцIымкIи и щIыбымкIи иджыри ущрохьэлIэ урыс сэлэтхэм традзауэ щыта тхыгъэхэм, фочышэхэм кърауда блынхэм. Унэшхуэр зыхуей хуагъэзэжами, зауэм и лъэужьхэр къагъэнащ цIыхухэр мелуан бжыгъэкIэ зыхэкIуэда гузэвэгъуэр ящымыгъупщэжын папщIэ. Ухуэныгъэм и тхыдэм уриплъэжмэ, ар ящIащ Франкфурт щыщ архитектор Валоттэ Пауль и проектымкIэ. Рейхстагым и ухуэныгъэр 1884 гъэм ирагъэжьами, ар куэдрэ яхунэгъэсакъым. Дипломат Радзинский Дюк а щIы Iыхьэр и щхьэзакъуэ мылъкуу зэрыщытым къыхэкIыу, псэуху хуит ищIатэкъым. Ауэ абы къыщIэна и къуэм Iэ щIидзащ ухуэныгъэр и кIэм нагъэсыну хуит зэрищIым теухуа дэфтэрым. КъызэтрагъэувыIауэ щыта Рейхстаг ухуэныгъэр илъэсипщI дэкIыжауэ нагъэсыжат. XX лIэщIыгъуэм и пэщIэдзэхэм лэжьакIуэхэм къагъэхъу зэрыхьзэрийр Германиеми нэсат. Рейхстагым и пырхъуэхэм ящыщ зым щыжаIащ а щIыналъэр республикэ щхьэхуит зэрыхъуар. Езы ухуэныгъэр революционерхэм яубыдащ. 1933 гъэм Рейхстагым мафIэсышхуэ къыщыхъуащ. Властыр а зэманым зыIэщIэлъ Гитлер абыкIэ коммунистхэр игъэкъуэншат. Тхыдэтх куэдым къалъытэ мафIэсыр национал-социалистическэ рабочэ партым и унафэщIхэм я IуэхущIафэу. 1945 гъэм ирихьэлIэу ухуэныгъэм къыхэнэжар мащIэт. Хэку зауэшхуэр иуха нэужь илъэсипщIым нэблагъэ дэкIыжауэщ къэралым и Правительствэм Рейхстагыр зэригъэпэщыжыну къыщыхилъхьар. 1972 гъэм архитектор Баумгартен Пауль Рейхстагыр щIэрыщIэу иухуэжащ. Ар япэ проектым къыщхьэщыкIми, абы и теплъэм щыщ гуэрхэр яхъумащ. 1992 гъэ пщIондэ абы тхыдэ институт щыIащ. А гъэ дыдэм британ архитектор цIэрыIуэ Фостер Норман унащхьэм абдж купол хуищIащ, лифтымкIэ абы удэкIуейуэ къалэм укъыхэплъэ хъууэ. Абы и фIыгъэкIэ дэтхэнэ зыплъыхьакIуэми иджы Iэмал иIэщ Берлин къыхэплъэну. 1999 гъэм Рейхстагыр (Бундестагыр) аргуэру Правительствэ ухуэныгъэ хъужащ.
Поделиться:
Читать также:
17.05.2024 - 17:18 →
Хэкурщ нэхъапэр
17.05.2024 - 10:01 →
Пасэрей хасэ зэхэшэкIэ
16.05.2024 - 10:12 →
ХэкIыпIэншэу къагъэнат
13.05.2024 - 12:04 →
Кавказым бэнэныгъэр къызэрыщежьар
26.04.2024 - 17:06 →
Тызылыкъуэр пэщIэдзэт
|