ТхылъыфIхэр зи IэрыкIхэрХъыбар гуапэ «Красная площадь» тхылъ фестивалым хиубыдэу ирагъэкIуэкI «2022 гъэм и тхылъ нэхъыфIхэр» зэпеуэм и лIэужьыгъуищым щытекIуащ лъахэхутэ-къэхутакIуэхэу, тхылъ тедзапIэм и унафэщIхэу Котляровхэ Викторрэ Мариерэ я тхылъ тедзапIэм къыщыдагъэкIа «Кабардино-Балкария: природный курорт, всероссийская здравница, туристическая Мекка» томитI хъу альбомыр. Фестивалыр къызэригъэпэщащ Урысейм и тхылъ тедзапIэхэм я зэгухьэныгъэм. Урысейм и щIыналъэ 49-м я къыдэкIыгъуэ 512-рэ хэтащ къэралым и тхылъ тедзапIэхэм я лэжьакIуэхэм, полиграфистхэм, тхылъ зыщэхэм папщIэ Москва щекIуэкIа фестиваль-зэхьэзэхуэм. Абы хыхьэ «Урысейм и щIыналъэхэм ятеухуа тхылъ нэхъыфI» жыхуиIэмкIэ къыдэкIыгъуэр нэхъыфIу щалъытащ. Апхуэдэу, «Книга года на родине П. И. Чайковского» IV фестиваль-зэпеуэми щагъэлъэпIащ лэжьыгъэр. «Лучшее художественно-графическое оформление издания», «Лучшее краеведческое издание» зэпеуэхэми къыщыхэжаныкIащ. Къэбэрдей-Балъкъэрым и зыгъэпсэхупIэхэмрэ туризмэмрэ я тхыдэм теухуа Iуэхур КъБР-м КурортхэмкIэ и министерствэмрэ Котляровхэ Викторрэ Мариерэ я зэдай лэжьыгъэщ. Альбом гъэщIэрэщIар къыдагъэкIат республикэм и къэралыгъуэр илъэси 100 зэрырикъум и щIыхькIэ. КъыдэкIыгъуэр иджырей тхылъеджэхэр зыхуей-зыхуэфIхэм тету дунейм къытехьащ. Иужьрей илъэсипщIым зэпеуэ зэмылIэужьыгъуэхэм Котляровхэ къыщыхожаныкI, я тхылъхэм я фIагъыр къыщалъытэ. Зэщхьэгъусэхэм я лэжьыгъэхэм ехьэлIауэ къаIэрыхьа дамыгъэхэр мащIэкъым. Гуапэщ щIыналъэпсо, урысейпсо зэпеуэхэм фIыкIэ я цIэ къызэрыщраIуэр. ТЕКIУЖЬ Заретэ.
Поделиться:
Читать также:
18.05.2024 - 12:48 →
Кинофестивалым и махуэхэр
18.05.2024 - 12:26 →
Дохутырхэр лэжьыгъэ и пIалъэкIэ зохъуажэ
18.05.2024 - 10:01 →
ЕджапIэ нэхъ ин дыдэр
15.05.2024 - 17:01 →
«ТекIуэныгъэм и щIэблэр»
14.05.2024 - 12:36 →
Алий и пшыхь
|