Ди гуапэ зэрыхъущи, Зыуэ щыт къэрал экзаменхэр мы гъэм зытахэм куэду къахэкIащ къэпщытэныгъэхэмкIэ балли 100 къэзыхьахэр. ЖыпIэнурамэ, гъащIэм и зы Iыхьэу щыт школ илъэсхэр апхуэдэ ехъулIэныгъэ лъагэкIэ къепхьэлIэныр ар щIэныгъэ нэхум и лъэмыж быдэ къэкIуэнум хуэзыщI, уи пщIэри уи нэмысри жылагъуэм щызыIэт Iуэхугъуэщ. Апхуэдэу абы къегъэлъагъуэ а еджакIуэхэм илъэс бжыгъэкIэ къадэлэжьа, ахэр зыунэтIа IэщIагъэлIхэри зыпэрыт IэнатIэм ехъулIэ, щIэныгъэ куурэ зэфIэкI лъагэрэ зыбгъэдэлъ лэжьакIуэу зэрыщытыр.
А псоми иджыблагъэ щытепсэлъыхьащ КъБР-м егъэджэныгъэмрэ щIэныгъэмкIэ и министр Езауэ Анзоррэ ЕГЭ-м балли 100 къыщызыхьа ныбжьыщIэхэмрэ я зэIущIэм. Iуэхум кърихьэлIат ныбжьыщIэ акъылыфIэхэр щеджа курыт школхэм я унафэщIхэр, егъэджакIуэхэр. ПщIэ хуащIу абы ирагъэблэгъат апхуэдэ бын щэныфIэхэр, зэфIэкI лъагэ зыбгъэдэлъхэр щагъэса унагъуэхэм я нэхъыжьхэр.
ГуфIэгъуэ зэIущIэр къызыIузыха Езауэ Анзор и гуапэу ехъуэхъуащ еджэным щыпэрыт щIалэгъуалэм. Министрым къызэрыхигъэщамкIэ, балли 100 нэхъыбэ дыдэу къызэрахьар химиемкIэщ, инджылызыбзэмкIэ балли 100 ди республикэм щыщ еджакIуэм иджы япэу къихьауэ аращ. Езауэм апхуэдэу жиIащ ныбжьыщIэхэр нэхъыбэу дэзыхьэхыр естественнэ щIэныгъэхэмрэ информатикэмрэу зэрыщытыр. А предметхэмкIэ екIуэкI къэпщытэныгъэхэм еджакIуэхэм ику иту къыщахьыф балл бжыгъэхэм хэхъуащ, балли 100 къэзыхьхэри яхэту. А псоми я тегъэщIапIэщ щIыналъэм и егъэджэныгъэ IэнатIэм зыужьыныгъэфI зэригъуэтыр, зэхъуэкIыныгъэ нэрылъагъухэри зэрыщекIуэкIыр. Абыхэм сэбэп яхуохъу «Зыужьыныгъэм и къежьапIэ» IэнатIэхэр курыт школхэм къызэрыщызэIуахри, къуажэ школхэр IэщIагъэлIхэмкIэ нэсу къызэгъэпэща зэрыхъури, егъэджакIуэхэр лэжьыгъэм нэхъри зэрыдихьэхри.
- Догушхуэ икIи допагэ фэркIэ, ныбжьыщIэхэ. Вбгъэдэлъ Iэдэбагъым, егугъуныгъэм, а псори лъабжьэ зыхуэхъуа щIэныгъэ лъагэм фи пщIэр къыщиIэтащ республикэми жылагъуэми. ЗыIэрывгъэхьа апхуэдэ ехъулIэныгъэфIхэм я фIыгъэкIэ фи цIэ дахэр къыхэнащ ди щIыналъэм и егъэджэныгъэ IэнатIэм и тхыдэм. Ар пщIэшхуэщ, атIэми фэ ар къэвлэжьащ фи акъылыфIагъкIэ, зэфIэкIкIэ, гъэсэныгъэкIэ, - жиIащ Езауэ Анзор, ныбжьыщIэхэм захуигъазэу. - Хуабжьу ди гуапэщ къыфпэщылъ гъащIэ гъуэгуанэр ехъулIэныгъэрэ текIуэныгъэ защIэкIэ гъэнщIауэ ефхьэкIыну. Курыт школым фызэрыщIэса илъэс 11-м къриубыдэу а Iуэхум хэлъхьэныгъэфI хуэфщIащ, лъабжьэ быдэ фхуэхъун гъащIэ гъуэмылэ зэвгъэпэщащ. Зыуэ щыт къэрал экзаменхэм къыщыфхьа балли 100-р ирехъу фызыхуеджэну мурад фщIа IэщIагъэмкIэ зэвгъэгъуэтыну щIэныгъэмрэ зэфIэкIымрэ я тегъэщIапIэ. Фи Iуэху фIы ирикIуэ, дызэрыгушхуэ, куэдкIэ дызыщыгугъ зи щIалэгъуэхэ. Си фIэщ мэхъу фи цIэхэр фIыкIэ иджыри мызэ-мытIэу къызэрыIунур.
АдэкIэ министрыр къытеувыIащ егъэджэныгъэм и пкъоуэ къалъытэ егъэджакIуэм дэтхэнэ школакIуэм и гъащIэми щиубыд увыпIэм. Шэч хэлъкъым - зи IэнатIэр хьэлэлу, жэуаплыныгъэр зыхащIэу езыхьэкI а IэщIагъэлIхэм лэжьыгъэшхуэ ирахьэлIащ я нэIэм щIэту щIэныгъэм и нэхум хуаша щIэблэм апхуэдэ ехъулIэныгъэфIхэр зыIэрагъэхьэным. Министрым фIыщIэ ин яхуищIащ апхуэдэ егъэджакIуэхэмрэ школ лэжьыгъэр тэрэзу зыунэтIыф унафэщIхэмрэ.
- Гулъытэншэ сщIынукъым дызэрыпагэ ныбжьыщIэхэр къызэрыкIа унагъуэхэри, - къыхигъэщащ министрым. - Фэ, адэ-анэхэм, гугъу задевгъэхьащ фи бынхэм, абыхэм я махуэр къызэрызэгъэпэщам, дэзыхьэх унэтIыныгъэхэмрэ гулъытэ зыхуащI Iуэхугъуэхэмрэ набдзэгубдзаплъэу фыкIэлъыплъу, фи сабийм и зыужьыныгъэмрэ дуней еплъыкIэу бгъэдэлъымрэ фыхуэсакъыу. ФIыщIэшхуэ фхузощI апхуэдэ бынхэр зэрывгъэсам папщIэ. Жылагъуэр зэрыгушхуэ щIэблэ узыншэ къызыщIэхъуэ унагъуэхэм афэрым!
НыбжьыщIэхэм псалъэ щратым, абыхэм къэрал къулыкъущIэм фIыщIэ хуащIащ апхуэдэ гулъыт лъагэ зэрагъуэтам папщIэ. Зи щIалэгъуэхэр министрым гупсэхуу епсэлъылIащ, я мурадхэмрэ хъуэпсапIэхэмкIэ дэгуашэу. КъисIуэну сыхуейщ ди республикэм щекIуэкIа мыгъэрей ЕГЭ-м балли 100 къыщызыхьа еджакIуэ 13-м я цIэ-унэцIэхэр. Апхуэдэхэщ Тыкъуэ Лаурэ, Мысыр Саидэ, Къущхьэ Сэримэт, Къэгъэзэж Андемыркъан, Дыкъуэ Iэминэ (химие); Якушенкэ Илья, Мэремыкъуэ Дарье, Батыр Данизэ (урысыбзэ); Хьэжы Ренат (математикэ); Хьэгъэбанэ Залинэ (тхыдэ); Соблыр Мухьэмэд, Сокъур Идар (информатикэ, ИКТ); Сэхъурокъуэ Артур (инджылызыбзэ).
ЗэIущIэм и кIэухыу Езауэ Анзор иджыри зэ гуапэу ехъуэхъуащ еджэным ехъулIэныгъэфIхэр щызыIэрызыгъэхьа ныбжьыщIэхэм, фэеплъ сурэтхэри зытрагъэхащ.
- Мурад лъагэхэр зыхуэвгъэувыж, ахэр зэвгъэхъулIэным ерыщу фыхущIэкъу. Дыфщогугъ ди республикэм, къэралышхуэм я унафэр зезыгъэкIуэн, я къэкIуэнур зыубзыхун IэщIагъэлI щыпкъэхэр, къулыкъущIэшхуэхэр къыфхэкIыну, - жиIащ министрым. - Ди лъахэр зэрыгушхуэ и бынхэм сынывохъуэхъу нобэ фызытехьа лъагъуэ нэхур гъащIэм гъуэгу бгъуэшхуэу къыщыфхущIэкIыну.
