Кавказыр зэрызэкъуэтым и нэщэнэу

22 июля, 2023 - 06:00
Ди щIыналъэр игъащIэми къогъуэгурыкIуэ IуэхугъуэфIхэм я хэщIапIэу, жэрдэмыщIэхэм я къигъэхъуапIэу, хьэщIэ махуэхэм я етIысэхыпIэу. Мы гъэмахуэ дахэми абы щызэхаублэ зэхыхьэ купщIафIэхэр. Апхуэдэхэм ящыщщ Къэбэрдей-Балъкъэрым къы­щызэIуаха «Кавказ зэкъуэт» дунейпсо щIалэгъуалэ турист-хэкупсэ форумыр. Абы хэтщ Кавказ Ищхъэрэ, Ипщэ фе­деральнэ щIыналъэхэм, Абхъазымрэ Осетие Ипщэмрэ я лIыкIуэхэр. 
 
Зэхуэсышхуэм кърихьэлIа щIалэ­гъуа­лэ жыджэрхэм фIэхъус псалъэ гуа­пэкIэ захуигъэзащ УФ-м и Президентым и полномочнэ лIыкIуэу Кавказ Ищхъэрэ щIыналъэм щыIэ Чайкэ Юрий. Абы зэрыжиIамкIэ, «Кавказ зэкъуэт» зэIущIэм и утыку къыщаIэт Iуэхугъуэхэр иджырей лъэхъэнэм мыхьэнэшхуэ зиIэхэщ, гулъы­тэ хэха зыхуэщIыпхъэхэщ. 
- Урысей Федерацэр мы зэманым дэ­къузэныгъэ хьэлъэм итщ, фIы зигу къытхуимылъ къэралхэм я зэракIэ. Абы къыхэкIыу ди къэралым зыужьыныгъэфI щедгъэгъуэтыжын хуейщ экономикэм ­лъабжьэ хуэхъу Iуэхугъуэхэм. Абыхэм ящыщщ туризмэм нэхъри зегъэужьыным ехьэлIа лэжьыгъэхэри. ЖыпIэнурамэ, ди къэралым и мащIэкъым зыщыбгъэпсэху, уи нэгу зыщебгъэужь хъуну щIыпIэ ­дахэхэр, - къыхигъэщащ и псалъэм Чайкэ Юрий. - УФ-м и Президентымрэ Прави­тельствэмрэ я арэзыныгъэрэ дэIыгъыныгъэрэ хэлъу, щIалэгъуалэ туризмэм иужьрей лъэхъэнэм хъарзынэу зеужь. 2022 гъэр къапщтэмэ, студент программэхэр я лъабжьэу ди къэралым зыщагъэпсэхуащ ныбжьыщIэ мини 5-м нэсым. Ар хуэди 8-кIэ нэхъыбэщ, Iуэхур щаубла 2021 гъэм еплъытмэ. 
Ди республикэм щекIуэкI зэхуэсышхуэм хэт зи щIалэгъуэхэм апхуэдэу гуапэу зы­хуагъэзащ Абхъаз Республикэм и Президент Бжание Аслъэн, Осетие Ипщэ Республикэм и Президент Гаглоев Алан, Адыгей Республикэм и Iэтащхьэ КъумпIыл ­Мурат, Къэрэшей-Шэрджэс Республикэм и Iэтащхьэ Темрезов Рашид, Осетие Ищхъэрэ - Алание Республикэм и Iэтащхьэ Меняйлэ Сергей, Дагъыстэн, Ингуш, Шэ­шэн республикэхэм, Ставрополь крайм къикIа лIыкIуэхэм я пашэхэм. 
Ди республикэм и Iэтащхьэ КIуэкIуэ Казбек апхуэдэу ехъуэхъуащ ди щIыналъэм къытхуеблэгъахэм. Абы зэрыжиIамкIэ, къэрал властым иригъэкIуэкI политикэ Iуэхухэм я нэхъыщхьэхэм ящыщщ щIалэгъуалэм яхуэгъэза лэжьыгъэр. 
- А унэтIыныгъэр игъэбелджылащ УФ-м и Президентым икIи абы ипкъ иткIэ къэралым защIегъакъуэ щIалэгъуалэм зегъэу­жьыным хуэгъэпса проект зэмылIэужьыгъуэхэм, - къыхигъэщащ КIуэкIуэ Казбек. - Урысей Федерацэм, Кавказым я щIалэгъуалэр, къэралыр зэрыт дэкъузэныгъэ ткIийм емылъытауэ, къонэж Хэкум и къыщхьэщыжакIуэрэ текIуэныгъэр къытхуэзыхьауэ щыта я адэшхуэхэм яхуэфащэ щIэблэу. Дэ дызыхэт зэхуэсым и фIэщыгъэр - «Кавказ зэкъуэтыр» - абы и щы­хьэтщ. Кавказыр ипэжыпэкIэ зэкъуэтщ, псом япэрауэ, ис щIалэгъуалэмкIэ, абы­хэм яку дэлъ зэныбжьэгъугъэ быдэмкIэ, къэкIуэнум хуэгъэпсауэ яIэ гупсысэ нэхухэмкIэ. Си фIэщ мэхъу: цIыхухэм яку дэлъ зэхущытыкIэ гуапэхэращ мамырыгъэр хъумэным и джэлэсыр, ди къэралым, дуней псом я къэкIуэну дахэр зыунэтIыр. Си гуапэщ лъэпкъыбэу зэхэт ди Хэку иным и зыужьыныгъэмрэ ехъу­лIэныгъэмрэ яхуэгъэпса ехъулIэныгъэ­щIэхэр фиIэну. 
Зэхуэсышхуэм кърихьэлIа хьэщIэ лъапIэхэр яхуэзащ абы хэт щIалэгъуалэм, щыгъуазэ зыхуащIащ щIыналъэхэм турист IэнатIэм зэрызыщиужьым ехьэлIауэ къызэрагъэпэща еплъыныгъэхэм. Iуэху зехьэкIэ пэрытхэмкIэ жыджэру зэдэгуашэ щIалэгъуалэ гупхэм я пашэхэр абыхэм зэпкърыхауэ къахутепсэлъыхьащ я щIыбагъ къыдэлъ лэжьыгъэхэм я купщIэм, я къызэгъэпэщыкIэ мардэхэм. Апхуэдэт, къапщтэмэ, журналист цIэрыIуэ, Урысейм и щIыуэпс телъыджэм теухуа теленэтынхэр езыгъэкIуэкI Железняк Александр. 
Ди къэралым гъунэгъу щIыналъэм ­щригъэкIуэкI дзэ Iуэху хэхами гулъытэ щигъуэтащ зэхуэсым. «Iуащхьэмахуэ» университет зэхэтым игъэлъэгъуащ абы хэт зауэлIхэм я унагъуэхэм, я сабийхэм защIэгъэкъуэным хуэгъэзауэ лажьэ «ЛIы­­хъужь­хэм я бынхэр» проектым хиубыдэ лэ­жьыгъэхэр. «ИкIуэт къытхэмыту» жыла­гъуэ зэгухьэныгъэм утыку ирихьащ ­СВО-м и зауэлIхэм яхуэгъэза проект хьэ­лэмэтыр. Абы хэтащ дзэм ираджа ди зауэлIхэм ящыщу республикэм иджыпсту щыIэхэр. Апхуэдэ зэIущIэхэр хъуащ форумышхуэр купщIафIэ, хьэлэмэт зыщIхэм. Iуэхур ягъэдахэт, нэхъ щIэщыгъуэ ящIырт ди республикэм и артист цIэрыIуэхэм ягъэзащIэ хэкупсэ уэрэдхэм. Куэдым зэрыжаIамкIэ, зэхуэс иныр хъуащ Кавказыр зэрызэкъуэтым и нэщэнэхэм ящыщ зы.
  • 67 просмотров
Поделиться: