Шэджэм хуабэщ абрагъуэ къыщызэIуах

22 июля, 2023 - 07:00
Кавказ Ищхъэрэ федеральнэ щIыналъэм и зыужьыныгъэ программэм хагъэхьа, инвестицэ проект лъэщхэм ящыщ зыуэ щыт, «Шэджэм-Агро» хуабэщ комплексым и япэ IуэхущIапIэр къызэIуахащ. Абы нэхъ ин Кавказ Ищхъэрэм итынукъым. ­Хуабэщ комплексыр яухуэ УФ-м Мэкъумэш хозяйствэмкIэ и министерствэр, КъБР-м и Правительствэр, «Россельхозбанк»-р я дэIэпыкъуэгъуу, «ЭКО-культура» мэкъумэш холдингым и мылъку­кIэ.
 
IуэхущIапIэщIэр къызэIуахащ УФ-м и Президентым и полномочнэ лIыкIуэу КИФЩI-м щыIэ Чайкэ Юрий, КъБР-м и Iэтащхьэ КIуэкIуэ Казбек, УФ-м мэкъу­мэш хозяйствэмкIэ и министрым и ­къуэдзэ Лут Оксанэ, «Рос­сельхоз­банк»-м и правленэм и тхьэмадэ Листов Борис сымэ.
«Мэкъуэмэш хозяйствэм Кавказ Ищхъэрэм и инвестицэ политикэм увыпIэ нэхъыщхьэ щеубыд икIи ар хамэ къэрал къраш хьэпшыпхэм хуэдэ къэралым къыщыщIэгъэкIынымкIэ ягъэзащIэ программэм и Iыхьэ нэхъыщхьэщ. ЩIэуэ къызэIуаха ­хуабэщхэм я фIыгъэкIэ урысейм и щIыналъэ куэдым я тыкуэнхэм илъэс псом къриубыдэу щыб­гъуэтынущ а IуэхущIапIэхэм къыщагъэкIа хадэхэкI къабзэхэр. Проектыр щагъэзащIэм къагъэ­сэбэпащ бэвагъ нэхъыбэ къегъэтыным хуэщIа технологиещIэ­хэр. IуэхущIапIэм ехъулIэныгъэ­хэр иIэу зиужьыну, къыщIигъэкI хадэхэкIхэм я куэдагъми я фIагъми хэхъуэ зэпыту и Iуэхухэр екIуэкIыну си гуапэщ», - жиIащ Чайкэ Юрий.
«Мыпхуэдэ проектхэм къэралым ерыскъыхэкI шынагъуэншагъэ щыIэным хэлъхьэныгъэшхуэ хуащI. «ЭКО-культура» мэкъу­мэш холдингыр инвестор цIэ­рыIуэщ икIи илъэс къэс къыщIигъэкI продукцэм хигъахъуэу ­щIыгу зэхуэщIам хадэхэкIхэр къыщызыгъэкI IуэхущIапIэ инщ», - къыхигъэщащ Лут Оксанэ. 
Хуабэщ комплексым и лэжьыгъэм зэрыщIидзэм и щIыхькIэ зэIущIэ гуапэм хэтахэм жылэхэр хасащ. «Шэджэм-Агро»-м и IэщIагъэлIхэм хьэщIэхэм жраIащ предприятэр Iэмэпсымэ лъэ­щ­хэмкIэ къызэрызэгъэпэщар, а унэтIыныгъэмкIэ щыIэ IэнатIэ пэрытхэм я жыпхъэм зэрыхуэ­кIуэр, апхуэдэуи Iуэхум фIыуэ хэзыщIыкI хадэхэкIгъэкI IэщIагъэлIхэр щагъасэ щIыпIэуи зэрыщытынур. Ар фIагъ лъагэ зиIэ технологиехэмкIэ къызэгъэ­пэща, илъэс псокIэ хадахэкIхэр къыщагъэкIыну IэнатIэ зызыу­жьауэ щытынущ.
«Шэджэм-Агро» хуабэщ комплексым и япэ IуэхущIапIэм гектар 37,6-рэ хъу щIыналъэ еубыд. Абы халъхьащ сом меларди 9-м щIигъу мылъку. Илъэсым ­по­мидору тонн мин 19,2-м нэблагъэ къыщагъэкIыну я мурадщ. Япэ щIэдзэгъуэу лэжьыгъэ IэнатIэкIэ къызэрагъэпэщынущ цIыху 4­61-рэ. Илъэсым республикэ ­бюд­жетым налогым къыпэкIуэу сом мелуан 223-рэ къыхэхъуэнущ.
КъБР-м и Iэтащхьэ КIуэкIуэ Казбек къыхигъэщащ ивестицэ проектыр адэкIи зэрыдаIыгъынур. Иджы яухуэну IэнатIэм хуха­хащ щIы гектари 100, инвестицэ мылъкуу сом мелард 24,5-рэ ­халъхьэнущ, хадэхэкIыу тонн мин 50-м щIигъу къыщагъэкIынущ. КъищынэмыщIауэ, лэжьапIэ IэнатIэкIэ иджыри цIыху 1226-рэ къызэрагъэпэщыну я мурадщ, проектыщIэм илъэсым къыпэ­кIуэну налогыр сом мелуан 593-рэ хъунущ.
  • 84 просмотра
Поделиться: