Тырныауз и вольфрам-молибден къыщIэхыпIэр зэрызэтрагъэувэжыр

КъБР-м и Iэтащхьэ КIуэкIуэ Казбек Моск­ва щыIущIащ «Ростех» корпорацэм и уна­фэщI Чемезов Сергей.

ЗэIущIэм щытепсэлъыхьащ республикэм и инвестицэ проект нэхъ иныр - Тырныауз и ­вольфрам-молибден къыщIэхыпIэр - зэтегъэу­вэжыныр зэрагъэзащIэм. Ар металлургие унэтIыныгъэмкIэ КИФЩI-м щыIэ проект нэхъыщхьэщ икIи 2030 гъэ пщIондэ Кавказ ­Ищхъэрэ федеральнэ щIыналъэм зиужьы­ным­кIэ программэм увыпIэ щхьэхуэ щы­зыу­быдщ.
Iуащхьэмахуэ щыIэ комбинатым хэтынущ щIы щIагъ пщIий къыщIэхыпIэрэ илъэсым ­руда тонн зы мелуанрэ ныкъуэм елэжьын фабрикэрэ. Инвестицэ мылъкуу абы халъ­хьащ сом мелард 55,7-рэ, абы щыщу сом ­мелард 46-р трагъэкIуэдэнущ республикэм и щIыналъэхэм предприятэ зэхуэмыдэхэр щыу­хуэным. ЛэжьапIэ IэнатIэу 800-м нэс къы­зэIуахынущ, абыхэм щыIэну IэщIагъэлIхэри зыпэрыувэну Iуэхухэм хуагъэсэнущ.
«Гъуэгу картэм» къызэрыщыгъэлъэгъуамкIэ, проектыр «Ростех»-м егъэзащIэ «Кавказ.РФ»-мрэ къэралым и финанс институт па­жэ­хэмрэ и дэIэпыкъуэгъуу. КъБР-м и щIыналъэ­хэр газкIэ къызэгъэпэщын про­граммэмкIэ объектым газ зэрыкIуэ бжьамийхэр ирашэ­лIэнущ. ЭлектрокъарукIэ къы­зэгъэпэщыным теухуа зэгурыIуэныгъэр зэ­ращIылIащ. Абы екIуалIэ гъуэгур ухуэныр и кIэм нагъэс.
Апхуэдэу «Ростех»-м Михайлов Б.И. и цIэр зезыхьэ дыщэ къыщIэхыпIэми елэжьын щIи­дзэнущ. IэщIагъэлIхэм къызэралъытамкIэ, а хъугъуэфIыгъуэ къыщIэхыпIэр Кавказ Ищхъэ­рэм щынэхъ ин дыдэхэм ящыщщ.
ЩIым и хъугъуэфIыгъуэ къыщIэхыпIитIри зы щIыналъэм щыIэщ, ар IэмалыфIщ про­мышленнэ парк зэхэт къызэгъэпэщыным-кIэ.
Тырныауз комбинатым металл гъуэты­гъуейхэр къыщыщIахыу зэтеублэжыныр хьэп­шып зэмылIэужьыгъуэхэр къыщIэгъэкIы­нымкIэ къэ­ралым къыпэщыт къалэн нэхъыщхьэхэр гъэзэщIэнымкIэ хэкIыпIэфIщ.

КъБР-м и Iэтащхьэмрэ
Правительствэмрэ я пресс-IуэхущIапIэ.