Зэкъуэш зэхущытыкIэм зиубгъун папщIэ

 Къэбэрдей-Балъкъэрым къеблэгъа, Псыхуабэрэ Черкесскрэ я Iэгъуэблагъэр зи нэIэ щIэт архиепископ Феофилакт Урысейм чыристан диныр къыщищта махуэм ирихьэлIэу IущIащ КъБР-м и Iэтащхьэ КIуэкIуэ Казбек. Дин лэжьакIуэм чыристаныгъэм пыщIа дауэдапщэхэр щригъэкIуэкIащ Прохладнэ щIыналъэм хыхьэ Новополтавскэ къуажэм дэт, джыназ Владимир и тхьэелъэIупIэм. 
 Мэкъуауэгъуэм и 1-р хабзэкIэ Урысейм чыристан диныр къыщищта махуэу 2010 гъэ лъандэрэ хабзэкIэ зэрагъэувар игу къигъэкIыжу, КIуэкIуэ Казбек архиепископ Феофилакт и цIэкIэ республикэм чыристан диным тету ис псоми ехъуэхъуащ. Республикэм и Iэтащхьэм и гуапэщ дэтхэнэ зыми узыншагъэрэ ехъулIэныгъэрэ иIэну. 
 Архиепископ Феофилакт КIуэкIуэ Казбек тыгъэ къыхуищIащ Серафим Саровскэ лъапIэм и цIэр зезыхьэ, Урыс Православ члисэм и орденым и етIуанэ нагъыщэр. А тыгъэр КъБР-м и Iэтащхьэм къэрал хабзэкIэ къыхуигъэфэщащ Мэзкуурэ Урысеймрэ я патриарх Кирилл. Дэфтэрым къызэригъэлъагъуэмкIэ, республикэм и Iэтащхьэм а тыгъэр къыхуащIащ «дин зэхуэмыдэ зезыхьэхэм я зэхуаку дэлъ мамыр зэхущытыкIэм зэрызригъэубгъум папщIэ». 
 КIуэкIуэ Казбекрэ архиепископымрэ тепсэлъыхьащ дяпэкIи республикэм лъэпкъ, дин Iуэхухэр зэрыщызэфIахынум, Къэбэрдей-Балъкъэрым щыпсэу лъэпкъхэм я зэхуакум зэкъуэшыгъэ дэлъыным зэрыхущIэкъуну щIыкIэм.