Ди спортсменхэм медалих къахьащ

 Дзюдо

  Санкт-Петербург «Корнеевым и Кубокыр» къэхьыным хуэунэтIа урысейпсо зэхьэзэхуэ щекIуэкIащ. Къэбэрдей-Балъкъэрым и дзюдоистхэм мыбы медалих къыщахьащ. Мыбы спортсмени 150-м нэблагъэ я ныбжьыр илъэс 21-рэ нэхърэ мынэхъыжьу, щIыпIэ зэмылIэужьыгъуэ 31-м къикIауэ зэрыхэтар къэплъытэмэ, ар ехъулIэныгъэшхуэщ.

 Пщыбий Амир килограмм 55-рэ зи хьэлъагъхэм я деж, Къуныжь Ролан   килограмм 90 хъухэм я деж япэ увыпIэр щаубыдащ.

Килограмм 81-рэ хъухэм я зэпеуэм Къуныжь Тамерлан етIуанэ увыпIэр, ещанэр Зэмбатэ Къантемыр къыщахьащ. Апхуэдэу ещанэ увыпIэр Глашев Джамбулат къихьащ (килограмми 100).

Япэ увыпIэр къэзыхьахэмрэ  бжьыпэм щIэбэнахэмрэ Урысейпсо зэхьэзэхуэу щэкIуэгъуэ мазэм Тулэ щекIуэкIынум хэтынущ.

Алыдж-урым бэнэкIэ

 Джылахъстэнейм и спортсменхэр ягъэлъэпIащ

Тэрч куейм и администрацэм и унафэщI къалэнхэр зыгъэзащIэ Хъущт Аслъэнбий ахъшэ саугъэт къызэрыратыну сертификатхэр щIыналъэм и бэнакIуэхэм яритащ. Ахэр мы гъэм Тэтэрстаным алыдж-урым бэнэкIэмкIэ щызэхэта зэхьэзэхуэм дыщэ медаль къыщызыхьахэу, ди къэралым и командэ къыхэхам хэтхэу КIэмпIарэ Марат (килограмми 130-рэ), Абазэ Темболэт (килограмм 87-рэ), зи узыншагъэм дерт иIэхэм я деж мы бэнэкIэ лIэужьыгъуэмкIэ Орел къалэ щекIуэкIа Урысейпсо зэпеуэм япэ увыпIэр къыщызыхьа КIыщ Аслъэнбэч сымэщ.

Хъущт Аслъэнбий спортсменхэмрэ абыхэм я гъэсакIуэхэмрэ адэкIи ехъулIэныгъэ яIэну ехъуэхъуащ.

    ШАФИЙ Аслъэн.