Аргентинэм щыIэ гуэл хъурейм и хъыбар къэIуащ, хьэршым ит спутникым Гугл картэр зэхигъэувэн папщIэ ЩIы щхьэфэм сурэт щытрихам щыгъуэ. ЩIэныгъэлIхэм я гугъащ спутникым тэмэму а щIыпIэм сурэт тримыхыфауэ, щыуагъэ гуэр къыхэкIауэ. Ауэ Iуэхум и пэжыпIэр щызэхагъэкIым, наIуэ къэхъуащ циркулкIэ къатхъыхьу кърагъэжам хуэдэу, зэпэхъуреибзэу гуэл телъыджэ зэрыщыIэр.
Гуэлыр зэрыхъурейр аракъым цIыхухэм ягъэщIэгъуар. АтIэ, абы и кур хытIыгум зэрещхьырщ, ари зэрыхъурейрщ. А хытIыгум къеуэкI псым мазэ ныкъуэ теплъэ иIэщ.
Ар япэу къэзыхутари и хъыбар зыгъэIуари америкэ инженер-гидравлик Петрони Ричардщ. Гугл картэм къыщигъуэта щIыпIэ телъыджэр зищIысыр къищIэну, и лэжьэгъухэу Неспилерм Серджиорэ Мартинес Паблорэ зыщIигъури, Аргентинэм кIуат. Ауэ абыхэм зэрагугъам хуэдэу тыншу къахуэгъуэтакъым гуэлыр. Сыту жыпIэмэ, псыпцIэ хъужа Паранэ псым и зэхэжыпIэм иту аращи, япэрауэ, а и теплъэ дыдэр имыхъуэжу мэIэпхъуэ (плавучий жаIэ); етIуанэрауэ, набдзэгубдзаплъэу упхрымыкIмэ, напIэзыпIэм ущIилъэфэнущ. ЩIэныгъэлIхэм я мурадыр къащемыхъулIэм, вертолеткIэ къыщхьэщыхьэри, гуэл Iуфэм щепсыхащ.
КъызэрыщIэкIамкIэ, Iэхэлъахэм щыпсэухэм куэд щIауэ ящIэрт а гуэлыр зэрыщыIэр, ауэ бгъэдыхьэну зыри тегушхуэртэкъым. Сыту жыпIэмэ, абыхэм быдэу я фIэщ хъурт гуэлым пасэрей псэущхьэ шынагъуэ гуэр щыпсэууэ. ХытIыгум метри 118-рэ и бгъуагъщ, зэрыт гуэлыр нэхъ иныжщ. Петрони Гугл картэхэр къищтэжри ириплъэжати, къихутащ абы и сурэтыр спутникым 2003 гъэм трихауэ. Гугл картэхэр къыщежьар а гъэ дыдэращ. КъызэрыщIэкIымкIэ, абы ипэIуэкIи щыIагъэнущ гуэлыр. ИкIи илъэс къэс траха сурэтхэр зэбгъапщэмэ, зэрыжытIащи, хытIыгур гуэл Iуфэм къокIэрэхъуэкI, сыхьэтым зэманыр зэрыпибжыкIым хуэдэу, езыми зегъэджэрэз.
«Нэ» зыфIаща гуэлыр щIищыкIыну, иджыну зекIуэ ещанэ зэрегъэпэщ Ричард. МызыгъуэгукIэ абы игъэхьэзыращ а IуэхугъуэмкIэ сэбэп къыхуэхъуну Iэмэпсымэхэмрэ геологие техникэмрэ.
Уфологхэм а Iуэхугъуэм теухуауэ еплъыкIэ щхьэхуэ яIэжщ. Абыхэм зэрагугъэмкIэ, хытIыгур нэгъуэщI планетэ къикIа кхъухьлъатэ гуэрым и ихьэпIэу аращ.
«Гуэлым ит псыр къыпхуэмыIуэтэну къабзэщ икIи щIыIэщ. Мы щIыпIэхэм апхуэдэ щыIэн хуейтэкъым. Сыту жыпIэмэ, псыпцIэм къыхэтэджыкIа гуэлыр къабзэнкIэ Iэмал иIэкъым. КъищынэмыщIауэ, абы и щIэр быдэщ. ПсыпцIэм укIуэцIрощэт, ущIелъафэ. ХытIыгум зегъэджэрэз, гуэл Iуфэми къокIэрэхъуэкI, ЩIыр Дыгъэм зэреджэрэзэкIым хуэдэу. Абы щIэныгъэкIэ къыпхуэIуэтэфу щхьэусыгъуэ гуэр иIэн хуейщ», - жеIэ экспедицэм хэта сурэттехым.
Iуэхур зэхагъэкIыну гупым хэтщ геологхэр, биологхэр, уфологхэр. ЗэрыжаIэмкIэ, абыхэм яджынущ псым, щIым, хьэуам я зэхэлъыкIэр. Къэхутэныгъэ псори зэрекIуэкIым фильм трахынущ. ЩIэныгъэлIхэр щогугъ абы и щэхур къатIэщIмэ, гъэщIэгъуэныщэ куэд наIуэ къэхъуну.
