Ялэжьахэм ироплъэж

23 сентября, 2023 - 08:00

КъБР-м и Iэтащхьэ КIуэкIуэ Казбек хэтщ «Урысейм и тхыдэ-щэнхабзэ щIэиныр» IX Парламент зэIущIэу Дербент щекIуэкIым. Дауэдапщэр ещIэ­кIащ Дагъыстаным и цIыхубэ усакIуэ Гамзатов ­Расул къызэралъхурэ илъэси 100 зэрыри­къум. 

Форумым ипкъ иту Урысей Федерацэм и Федеральнэ Зэхуэсым ФедерацэмкIэ и Советым и УнафэщI Матвиенкэ Валентинэ зэIущIэ иригъэкIуэкIынущ. Абы щытепсэлъыхьынущ иужьрей илъэсхэм ялэжьамрэ зэфIахамрэ. Гулъытэ щхьэхуэ хуащIынущ къалэ цIыкIухэмрэ къуажэхэмрэ дэт щэнхабзэ IуэхущIапIэхэм зэрызрагъэужьам, «Щэнхабзэ» лъэпкъ Iуэхум и фIыщIэкIэ ахэр къызэрагъэщIэрэщIэжам. 
Псалъэм и хьэтыркIэ, 2022 гъэм къриубыдэу къуа­жэ 400-м щIигъум щэнхабзэмкIэ унэхэр къэралым щаухуащ икIи щызэрагъэпэщыжащ. Къэбэрдей-­Балъкъэр Республикэр къапщтэмэ, 2019 гъэм щэнхабзэм и унэ 31-рэ къыщагъэщIэрэщIэжащ, 9 яухуащ, а лэжьыгъэр, нобэми къызэтемыувыIауэ, йокIуэкI.
- Нобэрей зэIущIэм мыхьэнэшхуэ хэлъщ. Абы ди гукъыдэжыр нэхъри къиIэтынущ, адэкIи ди лэжьыгъэм зэрыпытщэн, щэнхабзэм зэрызедгъэужьын, ди хабзэхэр зэрытхъумэн къару къытхилъхьэну ­согугъэ, - жиIащ КIуэкIуэ Казбек а зэхуэсым къы­щыщыпсэлъам. 

  • 24 просмотра
Поделиться: