Налшык щызэхэтащ КъБР-м Наркотикхэм пэщIэтынымкIэ и комиссэм хэтхэм я зэIущIэ. Ар иригъэкIуэкIащ КъБР-м и Iэтащхьэ КIуэкIуэ Казбек.
ЗэIущIэм и лэжьыгъэм хэтащ КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщI Мусуков Алий, УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэм и Аппаратым и федеральнэ инспектор нэхъыщхьэ Мэкъуауэ Тимур, республикэм и щIыналъэхэм я Iэтащхьэхэр, хабзэхъумэ, къарузехьэ IэнатIэхэм я лIыкIуэхэр.
- ХъыбарегъащIэ-телекоммуникацэ технологиехэр иужьрей лъэхъэнэм нэхъыбэрэ къагъэсэбэп хабзэр къызэпызыудхэм, наркотикхэр апхуэдэ щIыкIэм тету зезыгъакIуэхэри яхэту. IT-технологиехэм я зэфIэкIхэр я тегъэщIапIэу, абыхэм щIэпхъаджагъэхэр зэфIахыф, я цIэ-унэцIэхэр хэIущIыIу ямыщIу. Апхуэдэ дыдэуи фейдэ кърагъэщIыф а Iуэхугъуэм, - къыхигъэщащ КIуэкIуэм, зэIущIэр къыщызэIуихым. - Ауэ щыхъукIэ, оперативнэ-къэлъыхъуэныгъэ лэжьыгъэхэр егъэфIэкIуэныр, профилактикэ Iуэхугъуэхэм зегъэубгъуныр, интернетымрэ нэгъуэщI хъыбарегъащIэ технологиемрэ я тегъэщIапIэу щIэпхъаджагъэхэр ялэжьыным пэщIэтыфын IэмалыщIэхэмрэ Iуэху бгъэдыхьэкIэщIэхэмрэ къэгъэсэбэпыныр Iэмалыншэщ.
Зэхуэсым къыщаIэта Iуэхугъуэхэм я лъэныкъуэкIэ щIыналъэм щыщыIэ щытыкIэм къызэхуэсахэр щыгъуазэ хуащIащ КъБР-м къэрал кIуэцI IуэхухэмкIэ министру щыIэ Павлов Василий, КъБР-м щIалэгъуалэ IуэхухэмкIэ и министр Лу Азэмэт, Бахъсэн щIыналъэм и администрацэм и Iэтащхьэ Балъкъыз Артур, Май районым и администрацэм и Iэтащхьэ Бездудная Ольгэ. Абыхэми къыхагъэщащ хъыбарегъащIэ Iэмалхэр къагъэсэбэпурэ щIэпхъаджагъэ куэд зэралэжьыр. АбыкIэ къагъэсэбэп, къалэ зэхуакухэм щызекIуэ транспорт IэнатIэми лэжьыгъэхэр щыщIэгъэхуэбжьапхъэу къалъытащ. А къулыкъущIэхэм зэрыжаIамкIэ, хабзэхъумэ IэнатIэхэр, узыншагъэр хъумэнымрэ егъэджэныгъэмрэ я IуэхущIапIэхэр, жылагъуэ зэгухьэныгъэхэр зэгъусэу а Iуэхугъуэм елэжьмэ, итIанэщ ехъулIэныгъэ къыщихьынур.
Республикэм и Iэтащхьэм къызэрыхигъэщамкIэ, щIэблэр наркотикхэм щыхъумэнымкIэ лэ-жьыгъэшхуэ зэфIагъэкI щIалэгъуалэ зэгухьэныгъэхэм. АтIэми, наркотикхэм япэщIэтыным зи лэжьыгъэр хуэгъэпса щIалэгъуалэ зэщIэхъееныгъэм адэкIи нэхъ жыджэру зегъэужьын хуейщ. Апхуэдэуи лэжьыгъэм хэшэн хуейщ а унэтIыныгъэмкIэ IэщIагъэлIхэр.