КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ зыбжанэм щыхэплъа зэIущIэ.
2024, 2025 - 2026 гъэхэм ятещIыхьауэ КъБР-м и социально-экономикэ зыужьыныгъэм зэрыщыгугъым тепсэлъыхьащ, бжыгъэ щхьэхуэхэр игъэбелджылащ КъБР-м экономикэ зыужьыныгъэмкIэ и министр Рахаев Борис:
- Къыхэзгъэщыну сыхуейт дызэрыт илъэсым къигъэлъэгъуа бжыгъэ щхьэхуэхэр: промышленностым къыщIигъэкIыр проценти 106,8-рэ, мэкъумэш IуэхущIапIэхэм - 105-рэ, инвестицэм - 105,8-рэ, ухуэныгъэхэм - 117,5-рэ, розничнэ сатум - 105,5-рэ, пщIэ зыщIат Iуэхутхьэбзэхэм - 111,6-рэ хъуащ. Экономикэм и апхуэдэ бжыгъэхэм я фIыгъэкIэ лэжьапIэншэхэр нэхъ мащIэ мэхъу. Илъэс ныкъуэм къриубыдэу IэнатIэ зимыIэхэм яхэщIащ цIыху мини 5,3-рэ. Зезыгъэтха лэжьапIэншэхэм я бжыгъэр процент 1,2-рэ мэхъу. Илъэс кIуам ар проценти 2-т. Илъэс ныкъуэм къриубыдэу ику ит улахуэр хъуащ проценти 113-рэ - сом мин 38,821-м нэсащ.
2024, 2025 - 2026 гъэхэм и социально-экономикэ зыужьыныгъэр щытетщIыхьым ищхьэкIэ зи гугъу сщIа бжыгъэхэри къэтлъытащ. Илъэсищым и прогнозыр лIэужьыгъуитIу дгъэхьэзыращ. Япэр инвестицэхэм ятещIыхьа экономикэ зыужьыкIэщ, инфраструктурэ проектышхуэхэр хэтщ. ЕтIуанэр - къатщтэ хабзэ мардэм тетырщ.
Илъэсищ нэужьым макроэкономикэ зыужьыныгъэм къигъэлъэгъуэну дыщогугъ мыпхуэдэ бжыгъэхэр: щIыналъэм къилэжьар (валовый продукт) - сом мелард 367,6-рэ (япэ лIэужьыгъуэмкIэ), сом мелард 306-рэ (етIуанэ лIэужьыгъуэмкIэ). Экономикэм зиужьыным нэхъыбэу хэлъхьэныгъэ хуащIынущ розничнэ сатум - сом меларди 124,7-рэ, мэкъумэш IэнатIэм - сом мелард 15,5-рэ, ухуэныгъэм - сом меларди 9,5-рэ, промышленностым - сом меларди 3,5-рэ.
Дгъэбелджылы илъэсищым и кIэухым бжыгъэ щхьэхуэхэр къыдитыну дыщогугъ: республикэм къыщыщIагъэкI хьэпшыпхэм, ящIэ Iуэхутхьэбзэхэм сом мелард 89,6-рэ (проценти 110-рэ) - япэ лIэужьы-гъуэмкIэ, е сом мелард 64,2-рэ (проценти 102,2-рэ) - етIуанэмкIэ; мэкъумэшым - сом мелард 123,5-рэ (проценти 103,2-рэ) - япэ лIэужьыгъуэмкIэ, сом меларди 104,3-рэ (проценти 102,4-рэ) - етI- уанэмкIэ; ухуэныгъэм - сом мелард 58,5-рэ (проценти 110-рэ) е сом мелард 48,5-рэ (проценти 104,2-рэ); розничнэ сатум - сом мелард 453-рэ (проценти 110-рэ) е сом мелард 426-рэ (проценти 107,7-рэ); инвестицэм - сом мелард 82,9-рэ (проценти 105-рэ) е сом мелард 78,5-рэ (проценти 102-рэ). Дызытепсэлъыхь пIалъэм республикэм къэкIуэну туристхэм я бжыгъэр хуэгъэфэщауэ цIыху 1 мелуанрэ мин 474-рэ е 1 мелуанрэ мин 417-рэ хъунущ. Илъэсищым и кIэухым лэжьапщIэм и фондым сом мелард 76-рэ е сом мелард 71-рэ (базовэ лIэужьыгъуэмкIэ) къыхэхъуэн хуейщ. Ику ит лэжьапщIэр сом мин 52,5-рэ е сом мин 49,8-рэ хъуну худогъэфащэ, - жиIащ министрым.
КъБР-м щIы, мылъку зэхущытыкIэхэмкIэ и министр Тэхъу Аслъэн игъэбелджылащ зы лIэужьыгъуэм хиубыдэ щIы Iыхьэр нэгъуэщI лIэужьыгъуэм хуэгъэкIуэным теухуауэ КъБР-м и Правительствэм и проектыр. Ар Шэджэм щIыналъэм и администрацэм и лъэIукIэ ягъэбелджылащ. Гектар хуэдиз хъу щIы Iыхьэр промышленнэ хуэIухуэщIэхэр щихъумэн папщIэ къигъэсэбэпыну хуит ящIынущ администрацэр.
КъБР-м и Правительствэмрэ «Кавказ Ищхъэрэ пассажир компание» акционер зэгухьэныгъэмрэ цIыхухэр гъущI гъуэгу транспорткIэ къызэгъэпэщынымкIэ зэраухылIа зэгурыIуэныгъэм теухуауэ зэIущIэм къыщыпсэлъащ КъБР-м транспортымрэ гъуэгу хозяйствэмкIэ и министр ДыщэкI Аслъэн.
КъБР-м узыншагъэр хъумэнымкIэ и министр Къалэбатэ Рустам игъэбелджылащ «Психоневрологие диспансер» къэрал кIэзонэ IуэхущIапIэр «Психоневрологие диспансер» къэрал бюджет Iуэху- щIапIэм хуэгъэкIуэжыным теухуауэ Правительствэм игъэхьэзыра проектыр.
Олимп, мыолимп, паралимп, сурдлимпийск джэгухэмкIэ Урысей Федерацэм и гупхэм хэтхэм я бжыгъэр убзыхуным, 2023 гъэм и етIуанэ мазищым ахъшэ саугъэт зратыну спортсменхэмрэ тренерхэмрэ гъэбелджылыным теухуауэ проектхэр къигъэнэIуащ КъБР-м спортымкIэ и министр Хьэсанэ Ислъам.
«КъБР-м щIалэгъуалэ политикэм зыщегъэужьын» къэрал программэм зэхъуэкIыныгъэ щхьэхуэхэр хэлъхьэным тепсэлъыхьащ КъБР-м щIалэгъуалэм я IуэхухэмкIэ и министр Лу Азэмэт.
ГУГЪУЭТ Заремэ.
