Башкирием къикIа артистхэр

29 сентября, 2023 - 10:44
Гафури Мэжит и цIэр зезыхьэ Башкир академическэ драмэ театрым и унафэщIхэмрэ актёрхэмрэ Къэбэрдей-Балъкъэрым и хьэщIащ «Большие гастроли» къэрал Iуэхум хыхьэу. Iуэху дахэр къызэрагъэпэщащ УФ-м ЩэнхабзэмкIэ и министерствэм и нэIэм щIэту. 
Къэрал концерт гъэлъэгъуапIэм фокIадэм и 19-м хьэщIэхэмрэ бысымхэмрэ я пресс-конференц щекIуэкIащ. КъБР-м и цIыхубэ артист Балъкъэр Юрэ зэхыхьэр къыщызэIуихым жиIащ «Большие гастроли» проектым хыхьэу къэралыр лъэпкъ театрхэм зэрадэIэпыкъум и фIыгъэкIэ иджы театрхэм нэгъуэщI щIыналъэхэм зыкъыщагъэлъэгъуэну Iэмал зэраIэр. 
Башкир театрым и унафэщI Файзулин Иршат къызэхуэсахэм фIыщIэ яхуищIа нэужь къыхигъэщащ «Большие гастроли» Iуэхур зэрыщхьэпэр, я театр лэжьыгъэр абы нэхъри зэригъэкIуатэр. Файзулиныр республикэм и журналистхэм яхутепсэлъыхьащ хигъэгъуэзащ я IуэхущIапIэр илъэси 100 щрикъум ирихьэлIэу Башкортостаным къыщыдагъэкIа тхылъым. 
- Ди театрыр мы гъэм илъэси 104-рэ ирокъу. Лэжьэгъуэ махуэ къэс сыхьэт 19-м, зыгъэпсэхугъуэхэмрэ махуэшхуэхэмрэ сыхьэт 18-м театреплъхэм ди бжэхэр яхузэIудох. 2019 гъэм Оренбург, 2021 гъэм Симферополь дыщыIащ. Зэпымыууэ Уфа щыдгъэлъагъуэ, щIэупщIэ зиIэ «Весна без тебя» спектаклыр Налшык къыздэтшащ. Зыбжанэрэ къызытедгъэзэж лэжьыгъэхэри ди мащIэкъым. Къэбгъэлъагъуэмэ, Анкара, Китайм нэс тшаи диIэщ. НэхъапэIуэкIэ Ялтэ, Саранск, Будапешт дыщыIащ.  Налшык япэу дыкъеблагъэу аращи, цIыкIуи ини гуапэу къытIущIащ, - жиIащ Файзулиным. - Сабийхэм яхуэгъэза спектаклхэри диIэщ. Фи сабийхэр «Все мыши любят сыр» лэжьыгъэм едгъэплъа нэужь, гурыIуэгъуэ тщыхъуащ театрыр зыфIэгъэщIэгъуэн щIэблэ узыншэ къызэрыфщIэхъуэр.
Пресс-конференцым къыщыпсэлъащ Башкортостан Республикэм и цIыхубэ артист Маликовэ Гузяль, Хайруллинэ Минзаля, а республикэм щIыхь зиIэ и артист Аминов Урал, актёр Рафиков Мурат сымэ. 
Башкир театрым Налшык къыздишащ «Внутри меня цунами», «Мышиная история», «Весна без тебя» спектаклхэр. ХьэщIэхэм жаIащ я театрым и артистхэм макъамэр зэраIэпэгъур, къэфэнми зэрыхуэмыхамэр. Абыхэм ди щIыналъэр ягу ирихьащ икIи ябзыщIакъым ди деж щагъэкIуа махуэхэр псынщIэу зэрыблэлъэтар. Лъэпкъ музейм, ХьэтIохъущыкъуей хадэм, Iуащхьэмахуэ лъапэ яфIэгъэщIэгъуэну зыщаплъыхьащ, щIыналъэм щыпсэу лъэпкъхэм я щэнхабзэм зыхагъэгъуэзащ. Абыхэм фIыщIэ хуащIащ проектыр зи жэрдэм «Росконцерт» IуэхущIапIэм, Башкортостан Республикэм щэнхабзэмкIэ и министерствэм, Iэгуауэ инхэр яхуэзыIэта ди театреплъхэм. 
ТЕКIУЖЬ Заретэ.
  • 21 просмотр
Поделиться: