Хабзэхэм я проектхэм хоплъэж

КъБР-м и Парламентым и УнафэщI Егоровэ Татьянэ иригъэ­кIуэкIащ хабзэубзыху Iуэху­щIапIэм и Президиумым и зи чэзу зэIущIэ. 

ЗэIущIэм и пэщIэдзэм Егоровэ Татьянэ ехъуэхъуащ ­КъБР-м и Парламентым мэкъу­мэш по­литикэмкIэ, щIыуэпсыр хъумэнымрэ ар къэгъэсэ­бэ­пы­нымкIэ и комитетым и уна­фэ­щIым и къуэдзэ, «Удзыфэхэр» фракцэм и унафэщI, биологие щIэныгъэхэмкIэ доктор Щхьэгъэпсэу Сэфарбий, ар «БотаникэмкIэ урыс жылагъуэ зэгу­хьэныгъэм» и вице-президенту зэрагъэувамкIэ. ЕхъулIэны­гъэфI­хэр иIэу, къалэн зыхуи­гъэувыжахэмрэ и проектхэмрэ зэригъэзэщIэн къару къыкъуэ­кIыу лэжьэну ехъуэхъуащ спикерыр депутатым. 
Лэжьыгъэм къыдэкIуэу, Парламентым хэтхэр тепсэлъыхьащ «ЦIыхухэмрэ абыхэм я хьэп­шыпхэмрэ таксикIэ къешэкIа хъуным теухуа» хабзэу КъБР-м зи проектыр щагъэхьэзырам. КъБР-м и Парламентым Про­мышленностымкIэ, транспортымрэ гъуэгу хозяйствэмкIэ и комитетым и унафэщI Байдаев Сэлихь къыхигъэщащ республикэм щагъэхьэзыра а хабзэм и проектыр 2022 гъэм дыгъэгъазэм и 29-м къыдэкIа, «Урысей федерацэм цIыху­хэм­рэ абыхэм я хьэпшыпхэмрэ ­таксикIэ къыщешэкIыным теухуа», Федеральнэ хабзэ №580-ФЗ-м ипкъ иткIэ зэрызэхалъхьар: 
- Хабзэм и проектым къызэригъэувымкIэ, КъБР-м и Прави­тельс­твэмрэ республикэм и гъэзэщIакIуэ органым (Парламентым) щыщу къудамэм епха IуэхущIапIэмрэ зэхагъэщхьэхукIыу аращ цIыхухэмрэ абыхэм я хьэпшыпхэмрэ къешэкIынымкIэ щхьэж къытехуэ къалэныр. Абы иджыри хохьэ цIыхухэмрэ абыхэм я хьэпшыпхэмрэ республикэм къыщезышэкIыну ­хуит таксихэм лэжьэгъуэ пIалъэ­хэр зэрыхуагъэувыну щIыкIэр: хьэрычэтыщIэхэмрэ IэнатIэ Iутхэмрэ (юридическое лицо) - илъэси 5, я щхьэ хуэлэжьэжхэм (физическое лицо) - илъэси 5 е нэхъ мащIэ, иужьрейм а пIалъэр и лъэIу тхылъым къыщыхи­гъэщамэ. КъинэмыщIауэ, такси уасэхэр зытет мардэхэр къызэ­рагъэнэIуэну щIыкIэри хабзэкIэ ягъэувынущ. 
Хабзэм и проектыр хуагъэ­хьащ и еплъыкIэр къагъэлъэ­гъуэну, зыгуэр халъхьэну, тепсэ­лъыхьыну гукъыдэж зиIэ псоми. 
Хабзэубзыхухэр иджыри теп­сэлъыхьащ Iулъхьэм ебэ­ны­ным, УФ-м турист Iуэхур зэры­щызекIуэм, хьэщIэщхэмрэ абы­хэм хуагъадэ унэхэмрэ епха ­экспериментхэр зэ­ры­ра­гъэ­­кIуэкIыну щIыкIэхэм епха хабзэхэм я проектхэм, къинэ­мы­щIауэ унафэ къащтащ егъэ­джэныгъэ IэнатIэм и лэжьакIуэ зыбжанэм, мэкъумэшым, физическэ щэнхабзэмрэ спортымрэ къыщыхэжаныкIахэм Парламентым и ЩIыхь тхылъ иратыну.