«Туризмэмрэ гъэхьэщIэн IэнатIэмрэ» лъэпкъ проектыр ди республикэм гъэзэщIа зэрыщыхъум теухуа зэIущIэ иригъэкIуэкIащ КъБР-м и Iэтащхьэ КIуэкIуэ Казбек.
ЗэIущIэм хэтащ КъБР-м и Правительствэм и УнафэщI Мусуков Алий, абы и япэ къуэдзэ Къуныжь МуIэед, КъБР-м курортхэмрэ туризмэмкIэ и министр ЩоджэнцIыкIу Мурат.
КIуэкIуэ Казбек зэрыжиIамкIэ, зи гугъу ящIа лъэпкъ проектыр УФ-м и Президентым и унафэкIэ зэхалъхьащ икIи Путин Владимир иджыблагъэ Дербент щыкIуам Кавказ Ищхъэрэм туризмэм зыщегъэужьыным щхьэхуэу тепсэлъыхьауэ щытащ. «Туризм IэнатIэр ди щIыналъэ экономикэм щIэгъэкъуэн зэрыхуэхъум хэхъуэ зэпытщ, дяпэкIи нэхъри егъэфIэкIуапхъэщ. Иджыпсту ди къалэн нэхъыщхьэр туристхэр здэщыIэну хьэщIэщхэр нэхъыбэ щIынырщ, сыт щхьэкIэ жыпIэмэ, Къэбэрдей-Балъкъэрым зыгъэпсэхуакIуэ къакIуэхэм я бжыгъэм хохъуэ», - къыхигъэщащ Iэтащхьэм.
Гъэмахуэ мазищым турист мин 600 къэкIуащ КъБР-м. Ар нэгъабэ и апхуэдэ пIалъэм елъытауэ процент 25-кIэ нэхъыбэщ. БлэкIа мазийм цIыху мелуан 1,1-рэ хьэщIапIэ щыIащ ди лъахэм, ар нэгъабэ елъытауэ процент 20-кIэ нэхъыбэщ. Iуащхьэмахуэ лъапэ и бгы-лыжэ зыгъэпсэхупIэм и закъуэ цIыху мин 740-рэ щыIащ. Илъэсым и кIэм туристхэм я бжыгъэр мелуан 1,4-рэ хъуну хуагъэфащэ.
Республикэр туризмэм ехьэлIа лъэпкъ проектым 2022 гъэ лъандэрэ хэтщ. ИкIи мы гъэм ар хэхуащ модульнэ хьэщIэщхэр ящIын папщIэ субсидие нэхъыбэ зыхуаутIыпща щIыналъитхум. Абы папщIэ ди республикэм къыIэрыхьэнущ сом мелуан 755,8-рэ. АбыкIэ кемпингхэр, хьэщIэщ зэхэтхэр, хьэщIэщ пщIантIэхэр, эко-паркхэр, зыгъэпсэхупIэхэр ящIыну я мурадщ. Апхуэдэ щIыпIэу 51-рэ яухуэнущ, абы пэш 582-рэ иIэнущ. ХьэщIэщхэр щащIынущ Налшык къалэм, Прохладнэ, Дзэлыкъуэ, Iуащхьэмахуэ, Шэрэдж, Шэджэм, Аруан районхэм икIи 2024 гъэм и кIэ хъуху яухыну я мурадщ.
