СССР-м и зэманым зауэми, лэжьыгъэми къащыхэжаныкIахэр зэрагъэпажэ къэрал дамыгъэ куэд щыIащ. Ахэр иджырей Урысейми щымащIэкъым. АрщхьэкIэ псоми къыхагъэщхьэхукIыу зы къадогъуэгурыкIуэ. Ар «За отвагу» медалырщ. Езым хуэдэхэм ар я нэхъ лъапIэщ. ИкIи зэи ирату щытакъым ирахуэупсэн е зи юбилейр ягъэлъапIэ цIыхум пщIэ зэрыхуащIыр кърагъэлъэгъуэн папщIэ. Ар къыпхуагъэфэщэнутэкъым лIыгъэ зумыхьауэ.
Иджыблагъэ илъэс 85-рэ ирикъуащ СССР-м и Совет Нэхъыщхьэм и Президиумым 1938 гъэм жэпуэгъуэм и 17-м а дамыгъэр зэригъэуврэ. АбыкIэ ягъэпажэрт Совет Союзым и бийхэм езауэурэ, СССР-м и къэрал гъунапкъэр ихъумэурэ, псэзэпылъхьэпIэ щытыкIэм иту и зауэлI къалэныр игъэзащIэурэ, лIыгъэрэ хахуагъэрэ къэзыгъэлъэгъуахэр.
Хэку зауэшхуэм и лъэхъэнэм а медалыр орденхэм япэ ирагъэщу щытащ. Ар дыжьын лъапIэм къыхащIыкIырт икIи и инагъкIэ адрейхэм хэпщIыкIыу къахэщырт.
Медалыр хуагъэфащэрт зауэлI къызэрыгуэкIхэми офицерхэми. Хэбгъэзыхьмэ, иужьрейхэм ящыщу ар зыхуамыгъэфэщахэм ягу ныкъуэт.
Хэку зауэшхуэм и зэманым полкхэм я унафэщIхэр хуит ящIат езыхэм я жыIэм щIэт сэлэтхэмрэ сержантхэмрэ а дамыгъэр зэуапIэ губгъуэм щратыну. Ар къагъэсэбэпащ: псори зэхэту цIыху мелуани 4-рэ мин 230-м щIигъум я бгъэхэм халъхьащ.
Хэнейрэ «За отвагу» медалыр иратащ медицинэ къулыкъум и сержант Грецов Семен, тхуэнейрэ цIыху 14-р ягъэпэжащ.
Зи гугъу тщIы медалыр хуабжьу щыцIэрыIуэт тезыр зытралъхьахэр зыхэт батальонхэм. ЩIыхь орденым и ещанэ нагъыщэмкIэ, а медалымкIэ ягъэпэжахэр хей ящIыжырт. Зи нэгу щIэкIахэм къызэраIуэтэжамкIэ, къуэдыр зытралъхьахэр псом хуэмыдэу зыщыгуфIыкIыр ЩIыхь орденыртэкъым: ипэжыпIэкIэ ар сэлэтхэм я ордент, офицерхэм иратыххэртэкъым. Дауи, куэдыр хуейт къызэрыгуэкI сэлэту штрафбатым зэрыхэтар ябзыщIыну. Ауэ зи гугъу тщIы орденым ар сэтей къищIырт.
ЖытIэнщи, дзэзешэхэми я дежи «За отвагу» медалым и пщIэр щыинт.
Абы щыхьэт тохъуэ Совет Союзыр лъэлъэжа иужькIи «СССР» псалъэр Iуахыу а медалыр Урысеймрэ Белоруссиемрэ щIэрыщIэу зэрыщагъэувыжар.
