Жэпуэгъуэм и пэм щIэрыщIэу къэхъеижащ илъэс бжыгъэ хъуауэ екIуэкI израиль-палестинэ зэпэщIэтыныгъэр. УФ-м и Президент Путин Владимир сыт хуэдэ зэхуэсми къэралым и еплъыкIэр утыку къыщрехьэ.
Къаугъэ къэхъеижам теухуауэ Путин Владимир нэхъ убгъуауэ къыщыпсэлъащ «Урысейм и гъэсыныпхъэхэм я тхьэмахуэ» зэхуэсышхуэм: «Палестинэ Iуэхур дэтхэнэ муслъымэнми и гум узу илъщ, кIэ зимыIэ залымыгъэ егъэлеям и щапхъэу. ГъащIэр апхуэдэу къокIуэкI, мыбы щыщIидзар нобэкъым. Илъэс пщIы бжыгъэ хъуауэ нэгум щIокI гъунэ зимыIэ гущIэгъуншагъэр. Сыт ар апхуэдэу щIэхъуар? ЩIэхъуар Израиль къэрал доухуэ щыжаIам щыгъуэ, занщIэу Палестинэ къэралри яухуэну ягъэIуа щхьэкIэ, ар нобэр къыздэсым зэрамыгъэзэщIарщ».
Дунейпсо цIыхубэм я нэгу щIокI нобэ Израилым зэрихьэ лейр. Урысейр ООН-м ШынагъуэншагъэмкIэ и советыр зэхуашэсыну лъэIуати, къабыл ящIакъым. Жэпуэгъуэм и 17-м Израилыр аргуэру лагъымкIэ сымаджэщым еуэри, хьэдэ бжыгъэншэхэр щIалъхьэжащ, ныкъуэдыкъуэхэр, сабий ибэхэр, ящIэр зымыщIэж цIыху щхьэрыуахэм я бжыгъэм хэхъуащ. Палестинэм щIэрыщIэу иIэпхъукIахэм я бжыгъэр цIыху мелуаным щIегъу.
Китай къэралым щыIэу къыщыщыпсалъэм, Путиным аргуэру къытригъэзащ мы Iуэхум:
- Политикэ гугъуехьыр цIыхухэм ауэ сытми зыгуэр яIурыбдзэкIэ зэфIэха хъунукъым, - жиIащ Президентым. - И щхьэ хуитыж Палестинэ къэрал яухуапхъэщ, КъуэкIыпIэ Иерусалимыр и къалащхьэу. Ар Урысейм 1948 гъэ лъандэрэ жеIэ. Иджыпсту екIуэкIыр гузэвэгъуэшхуэщ. Дэ къыдгурыIуоуэ лъэныкъуитIри къызэрызэщIэплъар. Ауэ сыт хуэдиз гуащIагъ а зэпэщIэтыныгъэм имыIэми, сабийхэр, цIыхубзхэр, зи ныбжь хэкIуэтахэр зэрыхъукIэ пэIэщIэ щIын хуейщ лей къащытехьэ щIыпIэхэм.
Израилым зэрихьэ лейр залымыгъэу къызэрилъытэр къэзыгъэнэIуа зэгухьэныгъэхэм яхэтщ КъБР-м и Муслъымэнхэм я IуэхущIапIэри, Кавказ Ищхъэрэм ис муслъымэнхэм я зэзыгъэуIу советри.
«Дэ, Кавказ Ищхъэрэм и муфтийхэм, ООН-р къыхудоджэ Палестинэм и цIыхухэм лъэпкъгъэкIуэд иращIылIэныр къагъэувыIэну. ООН-м къабыл ищIауэ щыта, «Палестинэм и Iуэху гъэзэкIуэжынымкIэ» резолюцэм къыщащта унафэм ипкъ иткIэ, Палестинэ къэралыгъуэ яухуэныр тфIэигъуэщ», - дыкъыщоджэ зэгухьэныгъэм цIыхубэм зырызахуигъэза псалъэм. Алыхьталэм долъэIу Палестинэ цIыхубэм я дунейр икIэщIыпIэкIэ мамырыгъэм хуишэну, дэри и гущIэгъум дыхимыныну.
