Я зэфIэкIыр Налшык щагъэлъагъуэ

Тхэквондо

Къэбэрдей-Балъкъэрым СпортымкIэ и министерствэм и пресс-IуэхущIапIэм къызэритамкIэ, Налшык къалэм дэт «Гладиатор» спорт комплексым дыгъэгъэзэм и 1- 5-хэм щекIуэкIащ тхэквондомкIэ (ВТФ, Олимп джэгухэм хыхьэ лIэужьыгъуэмкIэ) Iуащхьэмахуэ и Кубокыр къэхьыным хуэунэтIа 22-нэ урысейпсо зэхьэзэхуэр. Абы кърихьэлIащ къэралым и щIыналъэ 20-м я спортсмен ныбжьыщIэрэ щIалэгъуалэу 700-м щIигъу.

Къэбэрдей-Балъкъэрым и командэм хэту зэхьэзэхуэм щызэуащ Кэнжэ къуажэм дэт «Пять колец» спорт академием и гъэсэнхэр икIи ехъулIэныгъэфI дыдэхэр абы щызыIэрагъэхьащ. 
Я хьэлъагъ елъытауэ нэхъыжьхэр зыхэта гупхэм дыщэ медалхэр къыщахьащ Щоджэн Басир, Къэзанш Къасболэт, Тхьэмокъуэ Элинэ, Къумахуэ Рианэ, Ахъмэт Борис, Iусен Дамир, Иуан Дианэ сымэ.
ПщыхьэщIэ Эстеллэ, Хаджиевэ Салмэ, Хъубылэ Анжеликэ сымэ зэпеуэм и етIуанэ увыпIэм дэкIуеящ.
Домбеякъ медалхэр къахьащ Мэлъкъуэнды Дамир, Джэш Имран, Iусен Къамболэт, Шыд Данэ, КъуэщIысокъуэ Аминэ, Атэлыкъ Амелие, Шалгынбаевэ Софие, Пхъэш Астемыр, Гъубжокъуэ Астемыр, Лэкъун Маленэ, Асановэ Даринэ сымэ.
Абыхэм нэмыщI, ди республикэм щыщ ныбжьыщIэхэм дыщэ медалу 8-рэ, домбеякъыу 6-рэ къахьащ.
Командэ зэхьэзэхуэм КъБР-м етIуанэ увыпIэр иубыдащ, Дагъыстэным и спортсменхэр япэ ирагъэщри. Ещанэ хъуащ Ростов областым къикIахэр. 
Мыдрейуэ, къыхэдгъэщынщи, Iуащхьэмахуэ и Кубокыр къэхьыным хуэунэтIауэ екIуэкIа зэхьэзэхуэм щIалэгъуалэм я деж япэ увыпIэхэр къыщызыхьахэм Урысей Федерацэм спортымкIэ и мастер цIэ лъапIэхэр къыфIащащ. 
Ди тхэквондоистхэм я тренерхэр Ахъмэт Амир, Унэжокъуэ Абдельджабар, Унэжокъуэ Къантемыр, Бозиев Муслим, Тикаев Идрис сымэщ.