«ЛIыхъужьхэм я бынхэр»

Ди республикэм и Iэтащхьэ КIуэкIуэ Казбек лэжьыгъэ IуэхукIэ яхуэзащ КъБР-м егъэджэныгъэмрэ щIэныгъэмкIэ и министр Езауэ Анзоррэ КъБР-м и Iэтащхьэм и чэнджэщэгъу Миронов Николайрэ. Ахэр тепсэлъыхьащ «ЛIыхъужь­хэм я бынхэр» республикэ проектыр щIыналъэм зэ­ры­щагъэзащIэм. 

Къэбэрдей-Балъкъэ­рым къы­щызэрагъэпэщащ гъэсапIэхэм екIуалIэ сабийхэм, курыт школхэм я еджа­кIуэхэм, курыт щIэныгъэрэ IэщIагъэрэ щрагъэгъуэт IуэхущIапIэхэм я студентхэм я Iуэхур зыIутыр къызэрапщытэ, бжыгъэр зи лъабжьэ IэнатIэ. Абы иIэ Iэмалхэм я фIыгъэкIэ наIуэ къыбощIыф дэтхэнэ ныбжьы­щIэри зэ­-рыт щытыкIэр. БалигъыпIэ имыу­вахэр щхьэхуэу къыхэгъэбелджылыкIащ. А лэжьыгъэхэр тэрэз хъун пап­щIэ, Iуэхум жыджэру хэтщ класс унафэщIхэр, педагог-психологхэр, IуэхущIапIэхэм я унафэщIхэм гъэсэныгъэ лэ­жьы­гъэмкIэ я къуэдзэхэр, егъэ­­джэныгъэмкIэ щIыпIэ Iэ­на­тIэ­хэм я унафэщIхэр. 
Программэр зэхагъэувауэ щIыщытар СВО-м хэтхэм я бынхэр зэрыт щытыкIэр къапщытэн папщIэт, ауэ мы зэманым абы зрагъэшэщIащ икIи еджакIуэ ныбжьым ит ныбжьыщIэ псори къызэ­щI­рагъэубыдащ. «Абы и мура­дыр ди сабий псори къэрал гулъытэрэ дэIэпыкъуныгъэрэ щыдмыгъэщIэнырщ, щIэныгъэ зрагъэгъуэтынымкIэ, гъащIэм щызрихьэлIэ лъэпо­щхьэ­похэм пэлъэ­щы­нымкIэ сэбэп дахуэхъу­нырщ», - къыхигъэщащ КIуэ­кIуэ Казбек. 
ШколакIуэхэм папщIэ яубзыхуа а программэм хуэдэ 2024 гъэм щIышылэм и 1-м къыщыщIэдзауэ къызэра­гъэ­пэщынущ сабий гъэсапIэ­хэм­рэ курыт щIэныгъэрэ IэщIагъэрэ щрагъэгъуэт IуэхущIапIэхэм папщIи. Мы зэманым къызэрагъэпэщ унагъуэхэм чэнджэщ ща­гъуэ­тыфыну ­центр. Ар щылэ­жьэнущ Психолого-медико-социальнэ дэ­Iэ­пыкъуны­гъэ­хэмкIэ респуб­ликэ центрым и унэм. Абы и IэщIагъэлIхэм чэнджэщкIэ зыхуа­гъазэ хъунущ щытыкIэ гугъум ихуа еджакIуэхэм, апхуэдэ уна­гъуэхэм ис псоми. 
КъищынэмыщIауэ, рес­пуб­­ликэм и унафэщIхэр иджыпсту йолэжь СВО-м хэ­тахэмрэ (ветеранхэмрэ) абы­хэм я уна­гъуэхэм исхэмрэ я узыншагъэр щызэтрагъэувэж хъуну, Iуэху куэд щызэ­фIах реаби­литацэ центр ухуэным. Абы щагъэзэщIэнущ балигъыпIэ имыу­ва ныбжьыщIэхэм яхуэгъэза программэ зэмылIэу­жьы­гъуэ куэди.